អាជ្ញាធរស្រុកសេសាន ខេត្តស្ទឹងត្រែង បានសហការជាមួយខណ្ឌជលផល ប្រជាសហគមន៍ដាក់កម្លាំងប្រចាំការចុះល្បាតតំបន់ទំនប់វារីអគ្គិសនីសេសានក្រោម២ ដើម្បីធ្វើការអភិរក្សត្រីមេពូជផង និងការពារដល់ពពួកសត្វស្លាបរស់នៅក្នុងតំបន់នេះផង។

លោក សុវណ្ណ ពិសេដ្ឋ អភិបាលស្រុកសេសានបានបញ្ជាក់ថា៖ តំបន់វារីអគ្គិសនីសេសានក្រោម២ ត្រូវបានបង្កើតទីស្នាក់ការខណ្ឌរដ្ឋបាលជលផលស្ទឹងត្រែង និងបានសហការជាមួយអាជ្ញាធរស្រុកសេសាន ដើម្បីពង្រឹងយន្តការអភិរក្សធនធានជីវចំរុះ នឹងមច្ឆជាតិអោយសម្បូរបែបឡើងវិញ។

លោកបន្តថាអាជ្ញាធរបានប្រឹងប្រែងសហការជាមួយប្រជាសហគមន៍ និងបានដាក់កម្លាំងចុះល្បាលជាប្រចាំ នេះក្នុងគោលបំណងដើម្បីអភិរក្សត្រីមេពូជផងនិងការពារដល់ពពួកសត្វស្លាបផង ជាពិសេសសត្វននៀលខ្យងដែលវាមករស់នៅទីនេះ។

លោក ស្រី សំវិចិត្រ នាយខណ្ឌរដ្ឋបាលជលផលខេត្តបានបញ្ជាក់ថា៖ តំបន់នេះត្រូវបានក្រសួងកសិកម្មរុក្ខាប្រមញ្ញ និងនេសាទ បានដាក់បញ្ចូលជាតំបន់អភិរក្សធនធានមច្ឆជាតិ និងឱ្យរដ្ឋបាលជលផលអនុវត្តឱ្យមានប្រសិទ្ធភាព ទើបបង្កើតឱ្យមានស្នាក់ការអភិរក្សនៅតំបន់នេះ។

លោកនាយខណ្ឌបានពន្យល់ថា៖ បញ្ហានេះភាគីពាក់ព័ន្ធត្រូវជួយទប់ស្កាត់បទល្មើសផ្សេងៗ។ លោកបន្ថែមទៀតថាមានន័យថាទាំងអាជ្ញាធរ ស្រុក ឃុំនឹងប្រជាអ្នកនេសាទផង ត្រូវរួមគ្នា ដោយគិតថាធនធានទាំងអស់នេះ ជារបស់យើងទាំងអស់គ្នាមិនមែនជា របស់បុគ្គលមួយណាម្នាក់ឡើយ។

លោកសុខណាវីប្រធានសហគមន៍នេសាទឃុំស្រែគរបានបញ្ចាក់ថា៖ តាមរយៈការចុះល្បាតសង្កេតឃើញ ប្រជាអ្នកនេសាទភាគច្រើនគាត់បានយល់ដឹងពីច្បាប់ជលផលហើយ តែនៅមានជនខិលខូចមួយចំនួនដែលចេះតែលួចលាក់ធ្វើសកម្មភាពបទល្មើស នេសាទខុសច្បាប់នៅឡើយ។

លោកអះអាងថា៖ ការប្រព្រឹត្តខុសនោះគឺភាគច្រើនជនសង្ស័យធ្វើសកម្មភាពឆក់ ប្រភេទ ទី១ ឆក់ក្តៅ ទី២ ត្រជាក់ ហើយបទល្មើស បន្ទាប់បន្សំទៀតដូចជាលួចដាក់មួង ក្នុងតំបន់ហាមឃាត់ជាដើម។

សូមបញ្ជាក់ថា៖ តំបន់ខាងលើទំបន់វារីអគ្គិសនីសេសានក្រោម២នេះក្រសួងកសិកម្ម រុក្ខាប្រមញ្ញ និងនេសាទបានចេញប្រកាសលេខ៥៥៥ ចុះថ្ងៃទី៣០ ខែធ្នូ ឆ្នាំ២០១៩ ស្តីពីការបង្កើតកន្លែងអភិរក្សជលផល ដែលមានទំហ៊ំផ្ទៃ(៦.១៤៣ហិកតា)​ ដើម្បីឱ្យស្ថាប័នមានសមត្ថកិច្ចអនុវត្តឱ្យមានប្រសិទ្ធភាព៕

អត្ថបទ៖ ងិន លីម