គម្រោងព្រែកជីកទន្លេបាសាក់ទៅសមុទ្រនឹងជួយជំរុញកំណើនសេដ្ឋកិច្ចជាតិ

លោក ហ៊ាង សុទ្ធាយុត្តិ អ្នកនាំពាក្យ​ក្រសួង​សាធារណការ និង​ដឹក​ជញ្ជូនបានថ្លែងថា ​មជ្ឈមណ្ឌល​ភស្តុភាកម្ម​ និងព្រែកជីទន្លេបាសាក់ ជាគម្រោងដែល​ជំរុញកំណើនសេដ្ឋកិច្ចជាតិ​ បង្កើតការងារ​ ធ្វើឱ្យប្រជាពលរដ្ឋកាន់តែមានជីវភាពធូរធា​ កាត់បន្ថយពេលវេលា​ និងចំណាយលើការដឹកជញ្ជូន។

​អ្នកនាំពាក្យរូបនេះបញ្ជាក់ថា បច្ចុប្បន្នការដឹកជញ្ជូនតាមផ្លូវទឹក​ គឺត្រូវចេញដំណើរពីភ្នំពេញ​ទៅវៀតណាម​ តាមកំពង់ផែ​ Cai Mep ឆ្លងនីតិវិធីរបស់អ្នកជិតខាងរួចបានត្រឡប់មក កែប​ កំពត​ កំពង់សោម​ កោះកុង​ តាមផ្លូវទឹកបច្ចុប្បន្ន។

លោកថា តាមគម្រោងនេះកម្ពុជានឹងមានលទ្ធភាពដូរមកដកដង្ហើមតាមច្រមុះខ្លួនឯងវិញគឺ​ចេញពីភ្នំពេញ​ ឆ្លងកាត់​ខេត្តកណ្តាល​ តាកែវ​ រួចដល់កែប​ តែម្តង​ កាត់បន្ថយចំណាយ​ និងពេលវេលា​ ក្នុងការ​ដឹកជញ្ជូន​យ៉ាង​ពិតប្រាកដ។

បើតាមលោក ហ៊ាង សុទ្ធាយុត្តិ គម្រោងនេះ​នឹងនាំមកនូវផលចំណេញ​ដល់សេដ្ឋកិច្ចជាតិ​ខ្ពស់​ បង្កើតការងារជាច្រើន​ រំដោះទឹកជំនន់​ និងគ្រោះរាំងស្ងួតយ៉ាងមានប្រសិទ្ធភាព​ ខណៈវៀត​ណាមដែលជាប្រទេសជិតខាង​ និងចិន​សុទ្ធតែបានកសាងសង់ព្រែកជីក​ដើម្បីសម្រួល​ដល់ការបើកទូលាយ​ការដឹកជញ្ជូន​តាមផ្លូវទឹក​៕