ឧកញ៉ា លឹម ហេង៖ ការបង្កើតការិយាល័យ​តំណាងសភាពាណិជ្ជកម្មកម្ពុជា នៅអូស្ត្រា​នឹងជំរុញពាណិជ្ជកម្មរវាងវិស័យឯកជន និង​ឯកជន

កម្ពុជា បានសម្រេចបង្កើតការិយាល័យតំណាងសភាពាណិជ្ជកម្មកម្ពុជា ចំនួនពីរ នៅប្រទេសអូស្រ្តាលី គឺនៅទីក្រុងម៉ែលប៊ន និងទីក្រុងស៊ីដនី។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់កម្ពុជាថ្មីថា កម្ពុជា បានបង្កើតការិយាល័យ​តំណាងសភាពាណិជ្ជកម្មសរុបចំនួន៤ហើយ គិតទាំងនៅអូស្ត្រាលីនេះ។ លោកឧកញ៉ា បានបញ្ជាក់ថា ទី១ គឺការិយាល័យតំណាងសភាពាណិជ្ជកម្មនៅប្រទេសកាណាដា និងទី២ នៅជប៉ុន។

លោកឧកញ៉ា លឹម ហេង បានគូសបញ្ជាក់ទៀតថា ក្រោយការបង្កើតការិយាល័យនេះ គឺមានលទ្ធផលល្អប្រសើរ។ ជាក់ស្តែងដូចជានៅតូរិនតូ ប្រទេសជប៉ុន មានទំនាក់ទំនងផ្នែកសហប្រតិបត្តិការសេដ្ឋកិច្ចពាណិជ្ជកម្មបានយ៉ាងល្អ។

 អនុប្រធានសភាពាណិជ្ជកម្មកម្ពុជា បានសង្កត់ធ្ងន់ថា ការបង្កើតការិយាល័យតំណាងសភាពាណិជ្ជកម្ម នឹងធ្វើឱ្យទំនាក់ទំនងសហគមន៍សេដ្ឋកិច្ចរវាងវិស័យឯកជន និងវិស័យឯកជនធ្វើការរួមគ្នាកាន់តែបានជិតស្និទ្ធ ជាពិសេសដូចជានៅប្រទេសអូស្រ្តាលីនេះ គឺស្ថិតនៅក្នុងកិច្ចព្រមព្រៀងថ្នាក់តំបន់អាសិប ដែលជាកត្តាជំរុញកាន់​តែខ្លាំងលើសកម្មភាពសេដ្ឋកិច្ចពាណិជ្ជកម្មរវាងប្រទេសទាំងពីរ។

តាមរយៈការិយាល័យតំណាងសភាពាណិជ្ជកម្មនេះ នឹងផ្តល់ភាពងាយស្រួសសម្រាប់វិស័យឯកជន ក្នុងការបញ្ជូនបញ្ហាផ្សេងៗទៅដល់រាជរដ្ឋាភិបាលប្រទេសទាំងពីរ។ លើសពីនេះទៀត ការិយាល័យនេះ នឹងផ្តល់ភាពងាយស្រួលក្នុងការផ្សព្វផ្សាយអំពីច្បាប់វិនិយោគថ្មី ក៏ដូចជា កិច្ចព្រមព្រៀងពាណិជ្ជកម្មផ្សេងៗ និងសក្តានុពលនៃការនាំចេញ-នាំចូល ជាដើម។ នេះជាការបន្ថែមរបស់លោកឧកញ៉ា លឹម ហេង។

សូមបញ្ជាក់ថា ការបង្កើតការិយាល័យតំណាងទាំងពីរខាងលើ គឺអនុលោមទៅតាមសេចក្តីសម្រេច​របស់រាជរដ្ឋាភិបាល​កម្ពុជា លេខ ២៦,២៧ សសរ ចុះថ្ងៃទី ៣១ ខែមីនា ស្តីអំពីការបង្កើតការិយាល័យ​តំណាងសភាពាណិជ្ជកម្ម​នៅទី​ក្រុងម៉ែលប៊ន និងទីក្រុងស៊ីដនី ប្រទេសអូស្រ្តាលី៕