សម្ដេច ហ៊ុន ម៉ាណែត បញ្ជាឲ្យអគ្គស្នងការនគរបាលជាតិ ស្រាវជ្រាវពិនិត្យការតែងតាំងមេប៉ុស្តិ៍ឃុំសំព្រោជ ស្រុកស្ទោង

សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញបទបញ្ជាឲ្យលោក ស ថេត អគ្គស្នងការនៃស្នងការដ្ឋាននគរបាលជាតិ ពិនិត្យស្រាវជ្រាវជាមួយស្នងការនគរបាលខេត្តកំពង់ធំ ជាបន្ទាន់ ពាក់ព័ន្ធការតែងតាំងបុគ្គលម្នាក់ធ្វើជាមេប៉ុស្តិ៍នៅឃុំសំព្រោជ ស្រុកស្ទោង ខេត្តកំពង់ធំ បន្ទាប់មានផ្សព្វផ្សាយលើបណ្ដាញសង្គមថា មានប្រវត្តិប្រព្រឹត្តបទឧក្រិដ្ឋ។

បើតាមសំណេររបស់សម្ដេចបវរធិបតី ហ៊ុន ម៉ាណែត បានបង្ហោះនៅលើទំព័រហ្វេសប៊ុកផេកផ្លូវការនៅព្រឹកថ្ងៃទី១០កញ្ញានេះថា ក្រោយពីបានទទួលព័ត៌មានតាមប្រភពផ្សេងៗរួមទាំងប្រព័ន្ធផ្សព្វផ្សាយសង្គម ពាក់ព័ន្ធនឹងការតែងតាំងបុគ្គលម្នាក់ធ្វើជាមេប៉ុស្តិ៍នៅឃុំសំព្រោជ ស្រុកស្ទោង ខេត្តកំពង់ធំ ដែលធ្លាប់មានប្រវត្តិប្រព្រឹត្តបទឧក្រិដ្ឋ ខ្ញុំបានចេញបទបញ្ជាភ្លាមទៅ ឯកឧត្តម ស ថេត អគ្គស្នងការនគរបាលជាតិ ឱ្យពិនិត្យ ស្រាវជ្រាវជាមួយ ឯកឧត្តម ម៉ែន លី ស្នងការនគរបាលខេត្តកំពង់ធំ ជាបន្ទាន់។ ក្នុងករណីជារឿងពិត ត្រូវធ្វើការកែសម្រួលភ្លាម។

សម្ដេច ហ៊ុន ម៉ាណែត ក៏សូមឱ្យមានការត្រួតពិនិត្យ និងវាយតម្លៃឲ្យបានច្បាស់លាស់ នូវបុគ្គលិកលក្ខណៈរបស់បុគ្គលនីមួយៗ ឲ្យបានហ្មត់ចត់មុននឹងធ្វើការតែងតាំង នៅតាមបណ្ដាស្ថាប័នរដ្ឋទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិនិងក្រោមជាតិ៕