តុលាការសម្រេចឃុំខ្លួនអ្នកលក់ជ្រូកម្នាក់ ពាក់ព័ន្ធករណីឆបោក

លោក ជុំ សង្វា ចៅក្រមស៊ើបសួរនៃសាលាដំបូងរាជធានីភ្នំពេញ នៅថ្ងៃទី២៧ ខែមីនា ឆ្នាំ២០២៥នេះ បានសម្រេចចេញដីការបង្គាប់ឲ្យឃុំខ្លួនជនជាប់ចោទឈ្មោះ គឹម រដ្ឋា អាយុ៣៧ឆ្នាំ ពាក់ព័ន្ធករណីចបោក តាមបញ្ញាត្តិមាត្រា ៣៧៧ និងមាត្រ ៣៧៨ នៃក្រមព្រហ្មទណ្ឌ។

សូមបញ្ជាក់ថា ជនជាប់ចោទឈ្មោះ គឹម រដ្ឋា ភេទប្រុស អាយុ៣៧ឆ្នាំ មានមុខរបរជាអាជីវករលក់ជ្រូក និងមានកម្រិតវប្បធម៌ អនុបណ្ឌិត ត្រូវបានកម្លាំងនាយកដ្ឋាននគរបាលទេសចរណ៍ នៃអគ្គស្នងការដ្ឋាននគរបាលជាតិ​ ឃាត់ខ្លួនកាលពីថ្ងៃទី២៣ ខែមីនា ឆ្នាំ២០២៥ នៅចំណុចអគារដឺឃ្វីន បន្ទប់២២២២ ជាន់ទី១ ខណ្ឌសែនសុខ រាជធានីភ្នំពេញ បាក់ព័ន្ធករណីឆបោក។

តាមចម្លើយសារភាពរបស់ជនជាប់ចោទបានសារភាពថា ខ្លួនបានឆបោកជនរងគ្រោះជាបន្តបន្ទាប់ដែលសរុបជាទឹកប្រាក់ប្រមាណជាង១០ម៉ឺនដុល្លារមកហើយ។ បើតាមចម្លើយសារភាព ជនជាប់ចោទបានបង្កើតអាខោន Facebook Page និងអាខោន Telegram ក្លែងក្លាយជាច្រើន ដោយដាក់ឈ្មោះផ្សេងៗគ្នា និងបានផ្សព្វផ្សាយលក់សាច់សត្វគ្រប់ប្រភេទនៅលើបណ្ដាញសង្គម ហើយនៅពេលទទួលបានលុយកក់រួច ជននេះបានផ្ដាច់ទំនាក់ទំនងជាមួយជនរងគ្រោះ ក្នុងនោះមានទាំងជនបរទេសផងដែរ៕

អត្ថបទ៖ សំណាង