កម្ពុជា និងកូរ៉េខាងត្បូង សម្លឹងមើលកិច្ចសហប្រតិបត្តិការកាន់តែធំ ទាំងការទូត និងពាណិជ្ជកម្ម ទ្វេភាគី

ដំណើរ​ទស្សនកិច្ច​រយៈពេល​៤​ថ្ងៃ​របស់នាយករដ្ឋមន្រ្តី សម្តេចធិបតី ​ហ៊ុន ម៉ា​ណែ​ត នៅ​សាធារណរដ្ឋ​កូរ៉េ គឺជា​ព្រឹត្តិការណ៍​ដ៏​សំខាន់​ក្នុង​ទំនាក់ទំនង​ការទូត និង​ពាណិជ្ជកម្ម​រវាង​កម្ពុជា និង​កូរ៉េខាងត្បូង​។ ដំណើរទស្សនកិច្ចនេះត្រូវបានរំពឹងថា នឹងពង្រឹងទំនាក់ទំនងទ្វេភាគី បង្កើនកិច្ចសហប្រតិបត្តិការ និងស្វែងរកឱកាសថ្មីៗសម្រាប់កំណើនសេដ្ឋកិច្ច និងកាអភិវឌ្ឍន៍។
ក្នុងដំណើរទស្សនកិច្ចចាប់ពីថ្ងៃទី ១៥-១៨ ខែឧសភា ឆ្នាំ ២០២៤ សម្តេចធិបតី ក៏នឹងអញ្ជើញចូលរួមក្នុងវេទិកាធុរកិច្ចកម្ពុជា-សាធារណរដ្ឋកូរ៉េ និងជួបជាមួយ​ក្រុម​​ហ៊ុនកូរ៉េ សំខាន់ៗមួយចំនួន។

សារៈសំខាន់ចំណងការទូត

ដំណើរទស្សនកិច្ចនេះគឺជាព្រឹត្តិការណ៍ដ៏សំខាន់មួយនៅក្នុងទំនាក់ទំនងទ្វេភាគីរវាងកម្ពុជា និងកូរ៉េខាងត្បូង ដែលកាន់តែរីកចម្រើនខ្លាំងក្នុងរយៈប៉ុន្មានឆ្នាំកន្លងមកនេះ។ ប្រទេសទាំងពីរបាននិងកំពុងរីករាយនឹងទំនាក់ទំនងមិត្តភាព និងកិច្ចសហប្រតិបត្តិការយ៉ាងរឹងមាំលើវិស័យផ្សេងៗ រួមទាំងពាណិជ្ជកម្ម ការវិនិយោគ វប្បធម៌ អប់រំ និងទេសចរណ៍។ ដំណើរទស្សនកិច្ចនេះត្រូវបានគេរំពឹងថានឹងលើកកម្ពស់ភាពជាដៃគូទៅកាន់កម្រិតថ្មីមួយ ដោយផ្តោតលើការបង្កើនការយល់ដឹង និងការជឿទុកចិត្តគ្នាទៅវិញទៅមក។

យោងសេចក្តីជូនដំណឹងរបស់ក្រសួងការបរទេស និងកិច្ចសហប្រតិបត្តិការអន្តរជាតិ ក្នុងដំណើរទស្សនកិច្ចនេះ សម្តេចធិបតី នាយករដ្ឋមន្ត្រី  នឹងជួបពិភាក្សាជាមួយលោកប្រធានាធិបតីសាធារណរដ្ឋកូរ៉េ Yoon Suk-Yeol លោកនាយករដ្ឋមន្ត្រី Han Duck-soo និងមន្ត្រីជាន់ខ្ពស់ផ្សេងទៀត ដើម្បីពិភាក្សាអំពីបញ្ហាសំខាន់ៗដែលមានផលប្រយោជន៍ទៅវិញទៅមក។ កម្ពុជា-កូរ៉េ ក៏បានត្រៀមចុះហត្ថលេខាលើកិច្ចព្រមព្រៀង និង MoU ជាច្រើនលើវិស័យដូចជា ពាណិជ្ជកម្ម ការវិនិយោគ ការអភិវឌ្ឍន៍ហេដ្ឋារចនាសម្ព័ន្ធ និងការអប់រំ។

ដំណើរ​ទស្សន​កិច្ច​នេះ​ក៏​ត្រូវ​បាន​គេ​មើល​ឃើញ​ថា ​ជា​ឱកាស​សម្រាប់​កម្ពុជា​ក្នុង​ការ​ពង្រឹង​ទំនាក់​ទំនង​ជាមួយ​កូរ៉េ​ខាង​ត្បូង​ក្នុង​បរិបទ​នៃ​ស្ថានការណ៍​ក្នុង​តំបន់។ ប្រទេសទាំងពីរ ក៏នឹងចែករំលែកក្តីកង្វល់រួមអំពីភាពតានតឹងដែលកំពុងកើនឡើងនៅក្នុងតំបន់ ហើយទំនងជានឹងពិភាក្សាគ្នាអំពីវិធីលើកកម្ពស់សន្តិភាព និងស្ថិរភាព។

ទំនាក់ទំនងពាណិជ្ជកម្ម និងសេដ្ឋកិច្ច

ដំណើរ​ទស្សនកិច្ច​នេះ​ត្រូវ​បាន​គេ​រំពឹង​ថា​នឹង​ជំរុញ​ទំនាក់ទំនង​ពាណិជ្ជកម្ម ​និង​សេដ្ឋកិច្ច​រវាង​កម្ពុជា​និង​កូរ៉េ​ខាង​ត្បូង ក្រោមហេតុផលប្រទេសទាំងពីរ កំពុងរីករាយនឹងទំនាក់ទំនងពាណិជ្ជកម្មដ៏រឹងមាំ ហើយកូរ៉េខាងត្បូងគឺជាដៃគូពាណិជ្ជកម្មដ៏ធំបំផុតមួយរបស់កម្ពុជា។ ក្នុងឆ្នាំ ២០២០ ពាណិជ្ជកម្មទ្វេភាគីរវាងប្រទេសទាំងពីរបានឈានដល់ប្រមាណ ១ ពាន់លានដុល្លារ ដោយការនាំចេញរបស់កម្ពុជាទៅកាន់កូរ៉េខាងត្បូងភាគច្រើនរួមមាន វាយនភ័ណ្ឌ សម្លៀកបំពាក់ និងស្បែកជើង។ ក្នុងរយៈពេល៣ខែឆ្នាំ២០២៤ ពាណិជ្ជកម្មទ្វេភាគី សម្រេចបានជិត ២០០ លានដុល្លារអាមេរិក។

ទំនិញសំខាន់ៗដែលកម្ពុជានាំចេញទៅកូរ៉េក្នុងឆ្នាំ២០២៣ រួមមាន ម៉ាស៊ីន និងឧបករណ៍​អគ្គិ​សនី ស្បែកជើង សម្លៀកបំពាក់ និងគ្រឿងបន្ទាប់បន្សំ អាលុយមីញ៉ូម ម៉ាស៊ីន និងបរិធាន​មេកា​និក វត្ថុធ្វើអំពីស្បែក ប្រដាប់ប្រដាក្មេងលេង វត្ថុចាំបាច់សម្រាប់កីឡា ផលិតផលឱសថ ប្លា​ស្ទិក ក្រដាស កៅស៊ូ ផ្លែឈើជាដើម។

ទំនិញសំខាន់ៗដែលកម្ពុជានាំចូលពីកូរ៉េ ក្នុងឆ្នាំ២០២៣ រួមមាន យានជំនិះ ម៉ាស៊ីន ឧប​ករណ៍​អគ្គិសនី ភេសជ្ជៈ ស្រា និងទឹកខ្មេះ ស្បែកឆៅ (ក្រៅពីស្បែកជាប់រោម) ស្បែកសម្លាប់ ប្លាស្ទិក ផលិតផលឱសថ វត្ថុវាយនភណ្ឌកែច្នៃរួចផ្សេងទៀត កៅស៊ូ ម៉ាស៊ីន និងបរិធាន​មេកានិក។

ក្នុង​ដំណើរ​ទស្សនកិច្ច​នេះ សម្តេចធិបតី ទំនង​ជា​ពិភាក្សា​អំពី​វិធី​បង្កើន​ពាណិជ្ជកម្ម និង​ការ​វិនិយោគ​រវាង​ប្រទេស​ទាំង​ពីរ។ ភាគីទាំងពីរត្រូវបានគេរំពឹងថានឹងស្វែងរកឱកាសសម្រាប់កិច្ចសហប្រតិបត្តិការលើវិស័យដូចជា ការអភិវឌ្ឍន៍ហេដ្ឋារចនាសម្ព័ន្ធ ថាមពលកកើតឡើងវិញ និងការផ្ទេរបច្ចេកវិទ្យា។

កូរ៉េខាងត្បូងក៏ជាវិនិយោគិនដ៏ធំនៅកម្ពុជាផងដែរ ដោយមានក្រុមហ៊ុនកូរ៉េជាច្រើនកំពុងប្រតិបត្តិការក្នុងវិស័យផលិតកម្មរបស់ខ្លួនក្នុងទឹកដីកម្ពុជា។ បន្ថែមពីនេះ ដំណើរទស្សនកិច្ចដែលមានរយៈពេលរហូតដល់ ៤ថ្ងៃនេះត្រូវបានគេរំពឹងថា នឹងទាក់ទាញការវិនិយោគថ្មីពីប្រទេសកូរ៉េខាងត្បូង ជាពិសេសនៅក្នុងវិស័យដូចជា អេឡិចត្រូនិក គ្រឿងបន្លាស់រថយន្ត និងឱសថ។

សូមជម្រាបថា អញ្ជើញអមដំណើរសម្ដេចធិបតី និងលោកជំទាវបណ្ឌិត រួមមាន លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី សុខ ចិន្តា​សោភា រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំងរដ្ឋមន្ត្រី មន្ត្រីសំខាន់ៗ​នៃ​រាជរដ្ឋាភិបាល និងតំណាងពីសភាពាណិជ្ជកម្មកម្ពុជា។

ជារួម ដំណើរទស្សនកិច្ចរយៈពេល៤ថ្ងៃរបស់ នាយករដ្ឋមន្ត្រី ហ៊ុន ម៉ាណែត នៅសាធារណរដ្ឋកូរ៉េ គឺជាព្រឹត្តិការណ៍ដ៏សំខាន់មួយ ដែលរំពឹងថានឹងពង្រឹងទំនាក់ទំនងការទូត និងពាណិជ្ជកម្មរវាងកម្ពុជា និងកូរ៉េខាងត្បូង ព្រមទាំងលើកកម្ពស់ភាពជាដៃគូទៅកាន់កម្រិតថ្មីមួយ ដោយផ្តោតលើការបង្កើនការយល់ដឹង និងការជឿទុកចិត្តគ្នាទៅវិញទៅមក។
ប្រវត្តិទំនាក់ទំនង និងសកម្មភាពនៃកិច្ចសហប្រតិបត្តិការនានាទ្វេភាគីទាំងពេលកន្លងមក និងបច្ចុប្បន្ន បានធ្វើឱ្យចំណងទំនាក់ទំនងការទូតរវាងប្រទេសទាំងពីរកាន់តែរឹងមាំ និងបន្តរហូតដល់បច្ចុប្បន្ន ដែលជាសករាជប្រវត្តិសាស្រ្តថ្មីមួយទៀត។

ប្រវត្តិទំនាក់ទំនងការទូត

ព្រះរាជាណាចក្រកម្ពុជា និងសាធារណរដ្ឋកូរ៉េ បានបង្កើតទំនាក់ទំនងការទូតនៅក្នុងឆ្នាំ១៩៧០ ប៉ុន្តែទំនាក់ទំនងរវាងប្រទេសទាំងពីរមិនបានល្អប្រសើរនោះទេ ដោយសារនៅឆ្នាំ១៩៧៥ ប្រទេសកម្ពុជាបានធ្លាក់ចូលទៅក្នុងរបបដឹកនាំរបស់ខ្មែរក្រហម។ ក្រោយមករបបដឹកនាំដោយខ្មែរក្រហមនេះ ក៏ត្រូវបានដួលរលំនៅឆ្នាំ១៩៧៩ ដែលអាចឱ្យប្រទេស​​កម្ពុជាក្រោកឈរសាជាថ្មី និងបានខិតខំប្រឹងប្រែងដើម្បីឱ្យមានស្ថិរភាពក្នុងប្រទេសឡើងវិញ។

ក្រោយមកទំនាក់ទំនងរវាងប្រទេស​កម្ពុជា- កូរ៉េ ត្រូវបានបង្កើតឡើងវិញនៅក្នុងឆ្នាំ១៩៩៧ ដែលចាប់ពីពេលនោះមក ទំនាក់ទំនងទ្វេភាគីត្រូវបានអភិវឌ្ឍន៍យ៉ាងខ្លាំងក្លា។ ក្រោមទំនាក់ទំនងការទូតជាថ្មីនៃប្រទេសទាំងពីរ រដ្ឋាភិបាលនៃសាធារណរដ្ឋកូរ៉េ បានសម្រេចបង្កើតស្ថានទូតប្រចាំនៅព្រះរាជាណាចក្រកម្ពុជា នៅក្នុងឆ្នាំ ១៩៩៨។ ចំណែកឯរាជរដ្ឋាភិបាលនៃព្រះរាជាណាចក្រកម្ពុជាវិញ ក៏បានបង្កើតស្ថានទូតរបស់ខ្លួនប្រចាំនៅសាធារណរដ្ឋកូរ៉េ នៅក្នុងឆ្នាំ២០០១។

ការប្រែក្លាយពីទំនាក់ទំនងការទូត ទៅជាចំណងការទូតក្រោយការបង្កើតឱ្យមានស្ថានទូតប្រចាំនៅប្រទេសរៀងខ្លួន បានជំរុញឱ្យមានកិច្ចសហប្រតិបត្តិការជិតស្និទ្ធ និងកាន់តែមានលក្ខណៈស៊ីជម្រៅ ដោយប្រមុខរដ្ឋាភិបាលនៃប្រទេសទាំងពីរ រួមទាំងសមាជិកសំខាន់ៗនៃរដ្ឋបាលទាំងពីរ បានធ្វើការប្រាស្រ័យទាក់ទងគ្នាជាប្រចាំ និងក្នុងដំណើរទស្សនកិច្ចផ្លូវការទៅវិញទៅមក៕

អត្ថបទ៖ ឡាយ សាមាន