Kim Soo Hyun ប្រឈមបញ្ហាធំក្នុងអាជីព ត្រូវគេដកកិច្ចសន្យាចោលខ្ទេច ក្រោយសន្និសីទចប់ភ្លាមៗ

កាលពីពេលថ្មីៗនេះ ប្រព័ន្ធផ្សព្វផ្សាយបានរាយការណ៍ថា ក្រុមហ៊ុនគ្រឿងសំអាង Y.O.U បានប្រកាសពីការបញ្ចប់កិច្ចសន្យាទូតសុឆន្ទៈរបស់ខ្លួនជាមួយ Kim Soo Hyun រួមទាំងការផ្សាយពាណិជ្ជកម្មដល់ទៅជាង ២០ក្រុមហ៊ុនផ្សេងទៀតដែលតារាសម្ដែងជួរមុខធ្លាប់បានចូលរួម ត្រូវដកចេញខ្ទេចខ្ទីគ្មានសល់ បន្ទាប់ពីសន្និសីទសារព័ត៌មានទាំងទឹកភ្នែករបស់គាត់ភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែង កាលពីរសៀលថ្ងៃទី៣១ ខែមីនា តារាសម្ដែងកូរ៉េវ័យ៣៧ឆ្នាំ និងមេធាវីរបស់លោកបានធ្វើសន្និដើម្បីស្រាយបំភ្លឺដល់អ្នកសារព័ត៌មានជុំវិញរឿងអាស្រូវស្នេហាជាមួយអតីតតារាសម្តែង Kim Sae Ron ដោយបដិសេធ​ម្ដង​ទៀត​ថា​​លោកមិនបានស្រលាញ់គ្នា​ កាល​នាង​នៅជាអនីតិជនឡើយ។

មិនតែប៉ុណ្ណោះ តារាប្រុសថែមទាំងបញ្ចាក់ទៀតថា អ្នក​ទាំង​ពីរ​មាន​ទំនាក់ទំនង​ស្នេហា​ជាមួយ​គ្នា​រយៈពេល​មួយ​ឆ្នាំ​មក​ហើយ​ដែល​ Kim Sae Ron មាន​អាយុ​ពេញវ័យ។ ទោះជាបែបនេះក្ដី ការយំឥតឈប់ឈររបស់ Kim Soo Hyun អស់រយៈពេល ៣០ នាទីក្នុងអំឡុងពេលសន្និសីទសារព័ត៌មាន បានក្លាយជាចំណុចកណ្តាលនៃការចាប់អារម្មណ៍នៅលើបណ្តាញសង្គម រហូតអាចទាញអ្នកទស្សនានៅចិនជាង ១៣ លាននាក់ សឹងមិនគួរឲ្យជឿ។

យ៉ាងណាមិញ បន្ទាប់ពីសន្និសីទសារព័ត៌មានចប់ភ្លាមៗ ក្រុមហ៊ុនគ្រឿងសំអាង Y.O.U បាននិយាយថា លក្ខណៈវិនិច្ឆ័យរបស់យើង គឺដាក់សុខភាព និងផលប្រយោជន៍របស់ស្ត្រីគ្រប់រូបជាអាទិភាព។ ក្នុងពេលជាមួយគ្នានេះ យើងមិនទទួលយកអាកប្បកិរិយាណាមួយ ដែលបំពានលើតម្លៃស្នូលនេះទេ។

លើសពីនេះ Disney+ ដែលជាអ្នកផលិតរឿង «Knock-Off» បាននិយាយថា ភាពយន្តនេះមិនស្ថិតនៅក្នុងកាលវិភាគនៃការចេញផ្សាយរបស់ Disney+ ទេ។ នោះ​មាន​ន័យ​ថា ​ភាពយន្ត​អាច​នឹង​ត្រូវ​ផ្អាក​មិន​កំណត់​រហូត​ដល់​មាន​ការ​ជូន​ដំណឹង​បន្ថែម​ទៀត។

«Knock-Of» ជា​ភាពយន្ត​ដែល​ចំណាយ​ថវិកា​យ៉ាង​ច្រើន​ដល់​ទៅ ៦០​ពាន់​លាន​វ៉ុន ដែល​សម្ដែង​ដោយ Kim Soo Hyun និង Jo Bo Ah។ កន្លងមក ប្រព័ន្ធផ្សព្វផ្សាយបានបង្ហើបថា ប្រាក់ខែរបស់តារាប្រុសក្នុងមួយវគ្គគឺ៨០០លានវ៉ុន ដែលជាចំនួនខ្ពស់បំផុតនៅក្នុងឧស្សាហកម្មកម្សាន្តកូរ៉េ។ យ៉ាងណា ខ្សែភាពយន្តនេះ ដើមឡើយគ្រោងនឹងចាក់បញ្ចាំងនៅខែមេសា ប៉ុន្តែដោយសារតែរឿងអាស្រូវរបស់តួប្រុស ពេលនេះការថតត្រូវបានបញ្ឈប់ភ្លាមៗ។

ជាពិសេសថែមទៀត ចាប់តាំងពីរឿងអាស្រូវបានផ្ទុះឡើង ការផ្សាយពាណិជ្ជកម្មចំនួន ២០ ដែលតារាសម្តែងចូលរួមត្រូវបានដកចេញ។ មិនមានតួលេខសំណងកិច្ចសន្យាជាក់លាក់ដែល Kim Soo Hyun ត្រូវបង់នោះទេ។ ភ្លាមៗនោះដែរ ក្រុមហ៊ុនគ្រប់គ្រងរបស់តួឯកប្រុស​ ដែលជា Gold Medalist កំពុងស្ថិតក្នុងវិបត្តិហិរញ្ញវត្ថុធ្ងន់ធ្ងរ។

អ្នកជំនាញផ្នែកឧស្សាហកម្មបាននិយាយថា ក្រុមហ៊ុននេះធ្លាប់មានសាច់ប្រាក់ច្រើន ដោយសារតែក្រុមហ៊ុនមានតារាកំពូល Kim Soo Hyun ប៉ុន្តែស្ថានភាពពេលនេះខុសគ្នា។ ការបង្កកទាំងស្រុងនៃប្រតិបត្តិការ ការលុបចោលព្រឹត្តិការណ៍ដែលបានគ្រោងទុក និងការចំណាយបន្ថែមជាបន្តបន្ទាប់បានធ្វើឱ្យគណនីរបស់ក្រុមហ៊ុនស្ទើរតែអស់។ អ្នកខាងក្នុងឧស្សាហកម្មហិរញ្ញវត្ថុម្នាក់បានចែករំលែកថា ពួកគេបានឮថា មុនពេលធ្វើសន្និសីទសារព័ត៌មាន Gold Medalist ត្រូវរៃអង្គាសប្រាក់ចំនួន ៦ ពាន់លានវ៉ុន ដើម្បីដោះស្រាយវិបត្តិ ៕

អត្ថបទ៖ សាង ស្រីល័ក្ខ

ចុចអាន៖បងប្រុស Sulli រម្លឹកថា Kim Soo Hyun ចូលរួមបុណ្យសពប្អូនស្រី ដូចធ្វើតាមបញ្ជាគេប៉ុណ្ណោះ