ធ្ងន់ហើយ! ក្រោយចាញ់យប់មិញ អ្នកគាំទ្រ Man UTD ទទូចឱ្យកីឡាករម្នាក់ចាកចេញ

អ្នកគាំទ្រក្រុម Manchester United ជាច្រើន បានបង្ហាញការមិនពេញចិត្តចំពោះការលេងរបស់ខ្សែប្រយុទ្ធស្លាប Alejandro Garnacho ឡើយ បន្ទាប់ពីក្រុមបិសាចក្រហមបរាជ័យក្រោមថ្វីជើងក្រុម Nottingham Forest កាលពីយប់រំលងអាធ្រាត្រឈានចូលថ្ងៃ ពុធ ទី ២ ខែ​មេសានេះ។

នៅក្នុងការប្រកួតសប្តាហ៍ទី ៣០ នៃក្របខណ្ឌ Premier League កាលពីយប់មិញ ក្រុម Man United បានរាជ័យយ៉ាងអាមាសក្រោមថ្វីជើងក្រុមម្ចាស់ផ្ទះ Nottm Forest ក្នុងលទ្ធផល ១ ទល់នឹង ០ ខណៈមួយគ្រាប់នោះ គឺរកបានដោយកីឡាករ Anthony Elanga នៅនាទីទី ៥។

បន្ទាប់ពីការប្រកួតបញ្ចប់ភ្លាម Garnacho បានក្លាយជារ៉ាដារិះគន់ធំរបស់អ្នកគាំទ្រ ក្រោយរូបគេបង្ហាញទម្រង់លេងមិនបានល្អទាល់តែសោះ។ ក្នុងនោះ តាមរយៈស្ថិតិលេងពេញ ៩០ នាទី ខ្សែប្រយុទ្ធសញ្ជាតិ អាហ្សង់ទីន វ័យ ២០ ឆ្នាំ មិនបានស៊ុតចំគោលដៅសូម្បីមួយជើង ក្នុងចំណោមការស៊ុត ៦ លើក ហើយអ្វីដែលកាន់តែស្តាយថែមទៀត គឺរូបគេមានឱកាសស៊ុតនៅមុខទី ១ លើក ប៉ុន្តែបែរជាស៊ុតមិនចូលទៅវិញ។

ទាក់ទងនឹងរឿងខាងលើ អ្នកគាំទ្រ Man UTD បាននាំគ្នាបង្ហោះសារនៅបណ្តាញសង្គម X យ៉ាងដូច្នេះថា៖

«ខ្ញុំមិនចង់ឃើញ Garnacho ពាក់អាវ United ម្តងទៀតទេ វាពិតជាគួរឱ្យអៀនខ្មាសណាស់»។

«ពួកគេគួរតែបណ្តេញ Garnacho ចេញ ដូចអ្វីដែលពួកគេធ្លាប់ធ្វើដាក់ Ronaldo ដែរទៅ។ មើលទៅ គាត់ចង់ធ្វើឱ្យដូចនិម្មិត​រូប របស់គាត់ពេកហើយ»។

«បញ្ជូន Garnacho ទៅកន្លែង ដែលសក្តិសមទៅ»៕

ប្រែសម្រួលអត្ថបទ៖ សេម កុសល
ប្រភព៖ Sportskeeda