ព័ត៌មានជាតិ

ជនសង្ស័យ៤នាក់ ត្រូវបាននគរបាលចាប់ខ្លួនពាក់ព័ន្ធករណីគ្រឿងញៀន ទៅតុលាការ

បានផុស

៣ years មុន

នៅ

ថ្ងៃអង្គារ ២ មីនា ២០២១

ដោយ

រតនគិរី ៖ កម្លាំងអធិការនគរបាលក្រុងបានលុង បានធ្វើការចុះស្រាវជ្រាវ និង ស៊ើបអង្កេតបន្តឈានឃាត់ខ្លួនជនសង្ស័យ៤មុខសញ្ញា ជាប់ពាក់ព័ន្ធករណីគ្រឿងញៀន ក្នុងនោះដោយមានការសម្របសម្រួលពីលោក លាង អ៊ូ ព្រះរាជអាជ្ញារងអមសាលាដំបូងខេត្ត។

ប្រតិបត្តិការចុះបង្ក្រាបគ្រឿងញៀននេះ បានធ្វើឡើងកាលពីវេលាម៉ោង៧និង០០នាទីព្រឹក ថ្ងៃទី២ ខែមីនា ឆ្នាំ២០២១ ត្រង់ចំណុចចម្ការស្វាយចន្ទីស្ថិតនៅក្នុងភូមិភ្នំ សង្កាត់យក្ខឡោម ក្រុងបានលុង។

យោងតាមរបាយការណ៍របស់នគរបាលក្រុងបានលុងបានឲ្យដឹងថា ជនសង្ស័យ៤នាក់រួមមាន ទី១.ឈ្មោះ ឆ្វេន កាញ់ ភេទប្រុស អាយុ៣០ឆ្នាំ ជនជាតិទំពូន មុខរបរមិនពិតប្រាកដ វិជ្ជមាន(+)។

ទី២.ឈ្មោះ ភឿក សុខ ភេទប្រុស អាយុ១៩ឆ្នាំ ជនជាតិទំពូន មុខរបរមិនពិតប្រាកដ វិជ្ជមាន(+)។ ទី៣.ឈ្មោះ ពរ ពុយ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ វិជ្ជមាន(+)។

ទី៤.ឈ្មោះ យ៉ន សីហា ភេទប្រុស អាយុ១៥ឆ្នាំ ជនជាតិទំពូន មុខរបរមិនពិតប្រាកដ រស់នៅភូមិភ្នំ សង្កាត់យក្ខឡោម ក្រុងបានលុង ខេត្តរតនគិរី ធ្វើតេស្តរកសារធាតុញៀន អវិជ្ជមាន(-) ទាំង៤នាក់មានទីលំនៅភូមិភ្នំ សង្កាត់យក្ខឡោម ក្រុងបានលុង ខេត្តរតនគិរី។

ក្រោយពីការឃាត់ខ្លួនជនសង្ស័យសមត្ថកិច្ចបានដកហូតវត្ថុតាងរួមមាន -ម្សៅក្រាមពណ៌សថ្លា សង្ស័យជាសារធាតុញៀន ចំនួន២កូនថង់តូច។ -ទូរសព្ទដៃចំនួន៤គ្រឿង និងសម្ភារៈសម្រាប់វេចខ្ចប់និងសេពមួយចំនួនទៀត។

បច្ចុប្បន្នជនសង្ស័យ រួមទាំងវត្ថុតាងកំពុងឃាត់ និងរក្សាទុកបណ្តោះអាសន្ននៅអធិការដ្ឋាននគរបាលក្រុងបានលុង ដើម្បីកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់៕

ដោយ ៖ វុទ្ធឦសាន