អាជ្ញាធរខេត្តកណ្ដាលឱ្យប្រតិបត្តិករសេវាបញ្ញើប្រៃសណីយ៍រាយការណ៍ករណីឆែកឃើញឥវ៉ាន់សង្ស័យជាគ្រឿងញៀន

អភិបាលរងខេត្តកណ្ដាល ប្រាប់ឱ្យប្រតិបត្តិករសេវាបញ្ញើប្រៃសណីយ៍ទាំងអស់ ត្រូវផ្តល់កិច្ចសហការល្អជាមួយអាជ្ញាធរ ហើយជាពិសេសក្នុងករណីឆែកឃើញឥវ៉ាន់សង្ស័យជាគ្រឿងញៀន ត្រូវរាយការណ៍ជាបន្ទាន់។

លោក ណុប ដារ៉ា អភិបាលរងខេត្តកណ្តាល បានបញ្ជាក់ថា ប្រតិបត្តិករសេវាបញ្ញើប្រៃសណីយ៍ទាំងអស់ ត្រូវផ្តល់កិច្ចសហការល្អជាមួយអាជ្ញាធរ កម្លាំងសមត្ថកិច្ច ទាំងការទំនាក់ទំនងផ្តល់ព័ត៌មាន និងការពិនិត្យឆែកឆេរឥវ៉ាន់ដែលសង្ស័យ ។ ក្នុងករណីឆែកឃើញ ត្រូវរាយការណ៍ជាបន្ទាន់ទៅអាជ្ញាធរ ឬកម្លាំងមានសមត្ថកិច្ចនៅជិតបំផុត។

លើកឡើងរបស់លោកអភិបាលរងដូច្នេះ នៅក្នុងពិធីផ្សព្វផ្សាយ និងណែនាំអំពីបញ្ហាគ្រឿងញៀនដល់ប្រតិបត្តិករ ដែលធ្វើអាជីវកម្មបម្រើសេវាបញ្ញើប្រៃសណីយ៍ ក្នុងភូមិសាស្ត្រខេត្តកណ្តាល កាលពីថ្ងៃទី១១ ខែមីនា ឆ្នាំ២០២៥។

លោកអភិបាលរងខេត្ត ក៏បានផ្ដាំផ្ញើទៅស្នងការនគរបាលខេត្ត និងមេបញ្ជាការកងរាជអាវុធហត្ថខេត្ត ណែនាំដល់អធិការនគរបាល និងមេបញ្ជាការអាវុធហត្ថក្រុង-ស្រុក បង្កើនការយកចិត្តទុកដាក់ខ្ពស់ចំពោះបញ្ហានេះ និងឱ្យប្រតិបត្តិករសេវាបញ្ញើប្រៃសណីយ៍ទាំងអស់បើកកិច្ចប្រជុំ និងវគ្គបណ្ដុះបណ្ដាលដល់បុគ្គលិកទាំងអស់ឱ្យយល់ដឹងបន្ថែមលើកិច្ចការនេះ៕