សន្តិសុខសង្គម

ពលករខ្មែរ សម្រុកចេញមកមុនពេលចូលឆ្នាំ ត្រូវភាគីថៃឃាត់ខ្លួន

បានផុស

២ years មុន

នៅ

ថ្ងៃពុធ ២៣ មីនា ២០២២

ដោយ

ពលករខ្មែរមួយចំនួនធំ ដែលធ្វើការនៅក្នុងប្រទេសថៃ កំពុងសម្រុកចេញមកប្រទេសកម្ពុជាជាបណ្តើរៗ ក្នុងគោលបំណងមកលេងក្នុងថ្ងៃចូលឆ្នាំខ្មែរ ដែលនេះជាបញ្ហាមួយ ដូចជាខ្លះត្រូវតម្រួតថៃឃាត់ខ្លួន ឯខ្លះទៀតបាននាំមកជាមួយនូវរោគសញ្ញាកូវីដ ឬអូមីក្រុងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងនៅថ្ងៃទី២៣ ខែមីនា ឆ្នាំ២០២២ វេលាម៉ោង ១១ និង ២០ នាទីថ្ងៃត្រង់ កម្លាំងតម្រួតការពារព្រំដែនថៃលេខ ១២ ដែលឈរជើងត្រង់ចំណុចភូមិណូនស៊ូង ឃុំណូនម៉ាកម៉ុន ស្រុកគោកខ្យូង ខេត្តស្រះកែវ បានឃាត់រថយន្តចំនួន ២ គ្រឿង បន្ទាប់ពីមានការសង្ស័យ។ រថយន្តទាំងពីរនោះម៉ាក តូយូតា រីវ៉ូ ដូចគ្នា ពណ៌ខ្មៅ ១ គ្រឿង និងពណ៌ស ១ គ្រឿង បើកបរដោយជនជាតិថៃ ប្រុសម្នាក់ ស្រីម្នាក់ ដោយក្នុងរថយន្តទាំងពីរគ្រឿងនេះ សមត្ថកិច្ចថៃបានរកឃើញពលករខ្មែរសរុបចំនួន ៨ នាក់ ក្នុងនោះមនុស្សធំ ៤ នាក់ និងក្មេង ៤ នាក់ ។

ក្រោយពីបានសាកសួរអ្នកបើកបរបានសារភាពថា គេបានស៊ីឈ្នួលដឹកពលករទាំងអស់នេះ ក្នុងតម្លៃខ្ពស់ ដោយទិសដៅចេញពីខេត្តសមុទ្រប្រាកាន មកកាន់ព្រំដែនកម្ពុជា។ ដោយឡែកសម្រាប់ពលករខ្មែរបាននិយាយថា ពួកគេចង់វិលទៅស្រុកកំណើតឲ្យទាន់មុនពេលចូលឆ្នាំ ដោយសារតែគ្មានច្បាប់នេះហើយទើបពួកគេសុខចិត្តចំណាយម៉ៅរថយន្តមកតែម្តង។

បច្ចុប្បន្នដោយសារតែគ្មានច្បាប់អនុញ្ញាត សមត្ថកិច្ចបានបញ្ជូនទាំងអ្នកបើកបរ ទាំងពលករ និងមធ្យោបាយធ្វើដំណើរទៅកាន់អធិការដ្ឋានតម្រួតស្រុកគោកខ្យូង ដើម្បីអនុវត្តតាមផ្លូវច្បាប់៕

អត្ថបទ៖ សោ និយមរ័ត្ន

Related Topics:ពលករខ្មែរ