បុរសម្នាក់បើករថយន្តលឿន ជ្រុលទៅបុកពីក្រោយ រថយន្តមួយគ្រឿងទៀត រងការខូចខាតយ៉ាងដំណំ

បុរសម្នាក់សង្ស័យស្រវឹង បើករថយន្តក្នុងល្បឿនលឿន ជ្រុលចង្កូតទៅបុកគូទរថយន្តតាកូម៉ាពេញទំហឹង បណ្តាលឲ្យរងការខូចខាតយ៉ាងដំណំ តែសំណាងមិនបង្កឲ្យមានមនុស្សណាម្នាក់ រងរបួសនោះឡើយ។ ហេតុការណ៍នេះបានកើតឡើងកាលពី វេលាម៉ោង១១យប់ ថ្ងៃទី២៦ ខែកក្កដា ឆ្នាំ២០២១ នៅតាមបណ្តោយផ្លូវព្រះនរោត្តម  សង្កាត់​ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញ រថយន្តម៉ាកតាកូម៉ា ពណ៌ស ពាក់ស្លាកលេខភ្នំពេញ 2X 7593 បើកបរដោយបុរសម្នាក់ និងប្រពន្ធកូនរួមដំណើរជាមួយ ធ្វើដំណើរតាមបណ្តោយផ្លូវព្រះនរោត្តម ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែមានបុរសម្នាក់សង្ស័យស្រវឹងបើករថយន្តម៉ាក mini cooper ពណ៌ប្រផេះ ពាក់ស្លាកលេខភ្នំពេញ 2X 5010 ធ្វើដំណើរមកពីក្រោយក្នុងល្បឿនលឿន ក៏ជ្រុលបុកគូទពីក្រោយពេញទំហឹង បណ្តាលឲ្យរងការខូចខាតយ៉ាងដំណំ តែសំណាងល្អមិនមានមនុស្សរងរបួសឡើយ។

ក្រោយកើតហេតុ ភាគគីខាងម្ចាស់រថយន្តបង្ក ព្រមទទួលកំហុស និងព្រមចេញថ្លៃជួសជុល ចំនួន១០០ ដុល្លារ ដើម្បីបញ្ចប់រឿង នៅកន្លែងកើតហេតុ៕ (ដោយ)៖សុខា