វិនិយោគិនអារ៉ាប់ប៊ីសាអូឌីតកំពុងសម្លឹងរកឱកាសវិនិយោគនៅកម្ពុជា

កម្ពុជា និងអារ៉ាប់ប៊ីសាអូឌីត បានគូសបញ្ជាក់ពីការពង្រឹងកិច្ចសហប្រតិបត្តិការទ្វេភាគីលើវិស័យសេដ្ឋកិច្ច និងពាណិជ្ជកម្ម ដោយវិនិយោគិនអារ៉ាប់ប៊ីសាអូឌីតកំពុងសម្លឹងរកឱកាសវិនិយោគក្នុងប្រទេសកម្ពុជា។ ការបញ្ជាក់ដូច្នេះធ្វើឡើងដោយឯកអគ្គរាជទូតអារ៉ាប់ប៊ីសាអូឌីតប្រចាំកម្ពុជា ក្នុងជំនួបជាមួយប្រធានព្រឹទ្ធសភា សម្ដេចតេជោ ហ៊ុន សែន នាព្រឹកថ្ងៃទី៦ ខែមករា ឆ្នាំ២០២៦។

សម្ដេចតេជោ ហ៊ុន សែន និងឯកអគ្គរាជទូតអារ៉ាប់ប៊ីសាអូឌីត លោក Mohammed Ismaeil A. Dahlwy គូសរំលេចអំពីទំនាក់ទំនងរវាងកម្ពុជា និងអារ៉ាប់ប៊ីសាអូឌីត ដែលមានភាពរីកចម្រើន តាមរយៈការផ្លាស់ប្ដូរទស្សនកិច្ចទៅវិញទៅមករបស់ថ្នាក់ដឹកនាំនៃប្រទេសទាំងពីរ ខណៈដែលទំនាក់ទំនងលើវិស័យពាណិជ្ជកម្ម ក៏ដូចជាការវិនិយោគក៏មានភាពរីកចម្រើន។

ឯកអគ្គរាជទូតអារ៉ាប់ប៊ីសាអូឌីត បានបញ្ជាក់នៅចំពោះមុខសម្ដេចតេជោ ថា ក្នុងឆ្នាំ២០២៦នេះ អ្នកវិនិយោគរបស់អារ៉ាប់ប៊ីសាអូឌីត នឹងមកបំពេញទស្សនកិច្ចនៅកម្ពុជា ដើម្បីស្វែងរកនូវឱកាសវិនិយោគផ្សេងៗ តាមរយៈសភាពាណិជ្ជកម្មរបស់អារ៉ាប់ប៊ីសាអូឌីត។

គម្រោងមកបំពេញទស្សនកិច្ច និងស្វែងរកឱកាសវិនិយោគរបស់អ្នកវិនិយោគអារ៉ាប់ប៊ីសាអូឌីតនៅកម្ពុជា ត្រូវបានទទួលការសាទរពីសម្ដេចតេជោ ដោយសម្ដេចតេជោ បញ្ជាក់ថា នេះគឺជាស្នូលនៃទំនាក់ទំនងដែលសម្ដេចចង់ឃើញ ពិសេសនោះគឺទំនាក់ទំនងពាណិជ្ជកម្ម ក៏ដូចជាការវិនិយោគរវាងប្រទេសទាំងពីរតែម្ដង។

សម្រាប់ដំណើរទស្សនកិច្ចផ្លាស់ប្ដូរគ្នាទៅវិញទៅមកកន្លងទៅ សម្ដេចតេជោ ថា គឺជាផ្នែកធ្វើឱ្យទំនាក់ទំនងប្រទេសទាំងពីរកាន់តែមានការរីកចម្រើន ហើយសម្ដេចរំពឹងថា ទំនាក់ទំនងរវាងប្រជាជន និងប្រជាជនប្រទេសទាំងពីរ និងមានភាពល្អប្រសើរបន្ថែមទៀត ដែលទាំងអស់នេះជាការរួមចំណែកធ្វើឱ្យទំនាក់ទំនងកាន់តែមានភាពរីកចម្រើន៕