ព័ត៌មានអន្ដរជាតិ

អ៊ីរ៉ង់ វាយប្រហារសងសឹកលើមូលដ្ឋានទ័ពអាមេរិកនៅគុយវ៉ែត ដោយចោទអាមេរិកថា បានវាយប្រហារលើកោះ Qeshm

បានផុស

២៨ វិនាទី មុន

នៅ

ថ្ងៃពុធ ៣ មិថុនា ២០២៦

ដោយ

កងឆ្មាំបដិវត្តន៍អ៊ីរ៉ង់ (IRGC) បានលើកឡើងនៅព្រឹកថ្ងៃពុធនេះថា ខ្លួនបានបើកការវាយប្រហារដែលផ្តោតលើមូលដ្ឋានទ័ពអាមេរិកក្នុងប្រទេសគុយវ៉ែត បន្ទាប់ពីសហរដ្ឋអាមេរិកបានវាយប្រហារជិតច្រកសមុទ្រ Hormuz និងនៅលើកោះ Qeshm នៅភាគខាងត្បូងអ៊ីរ៉ង់។

ក្នុងសេចក្តីថ្លែងការណ៍មួយ កងឆ្មាំបដិវត្តន៍អ៊ីរ៉ង់ បាននិយាយថា នាវាដឹកប្រេងអ៊ីរ៉ង់មួយគ្រឿងនៅជិតច្រកសមុទ្រ Hormuz ត្រូវបានវាយប្រហារដោយគ្រាប់ផ្លោងតាមអាកាស នៅយប់ថ្ងៃអង្គារ បណ្តាលឱ្យខូចខាតដល់ផ្នែកម៉ាស៊ីន។

កងឆ្មាំបដិវត្តន៍ បានអះអាងទៀតថា ក្រោយមកកងកម្លាំងអាមេរិក បានកំណត់គោលដៅលើបណ្តាញទំនាក់ទំនងជាកម្មសិទ្ធិរបស់កងឆ្មាំបដិវត្តន៍អ៊ីរ៉ង់នៅភាគខាងត្បូងនៃកោះ Qeshm ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

IRGC និយាយថា កងកម្លាំងទ័ពអាកាសរបស់ខ្លួន បានធ្វើការវាយប្រហារដោយមីស៊ីល និងដ្រូន ផ្តោតលើទីតាំងយោធាអាមេរិកក្នុងតំបន់ រួមទាំងទីតាំងដែលភ្ជាប់ទៅនឹងកងនាវាទីប្រាំរបស់សហរដ្ឋអាមេរិក។

កងឆ្មាំបដិវត្តន៍ បានព្រមានថា ការវាយប្រហារបន្ថែមទៀតប្រឆាំងនឹងអ៊ីរ៉ង់នឹងបង្កឱ្យមានការឆ្លើយតបយ៉ាងម៉ឺងម៉ាត់! កងកម្លាំងដែលពាក់ព័ន្ធនឹងសកម្មភាពប្រឆាំងនឹងអ៊ីរ៉ង់នឹងប្រឈមមុខនឹងផលវិបាក។

សេចក្តីថ្លែងការណ៍នេះ បានកើតឡើងភ្លាមៗ បន្ទាប់ពីទូរទស្សន៍រដ្ឋអ៊ីរ៉ង់ IRIB រាយការណ៍ពីការផ្ទុះជាច្រើននៅជិតតំបន់ Suza និង Masen លើកោះ Qeshm។

គួរបញ្ជាក់ថា ភាពតានតឹងក្នុងតំបន់បានកើនឡើង ចាប់តាំងពីចុងខែកុម្ភៈ បន្ទាប់ពីសហរដ្ឋអាមេរិក និងអ៊ីស្រាអែលបានបើកការវាយប្រហារតាមអាកាសលើអ៊ីរ៉ង់ ដោយបានសម្លាប់មនុស្សជាង ៣ ០០០នាក់ រួមទាំងមេដឹកនាំកំពូល លោក Ayatollah Ali Khamenei, មេបញ្ជាការយោធាជាន់ខ្ពស់ និងមន្ត្រីរដ្ឋាភិបាលមួយចំនួន។

បទឈប់បាញ់សម្របសម្រួលដោយប៉ាគីស្ថានបានចូលជាធរមាននៅថ្ងៃទី៨ ខែមេសា ប៉ុន្តែកិច្ចខិតខំប្រឹងប្រែង ដើម្បីឈានដល់កិច្ចព្រមព្រៀងទូលំទូលាយមួយរហូតមកដល់ពេលនេះនៅតែបរាជ័យ៕

សម្រួល៖ ណឺ មិនា