ពិធីករ រតនៈ វិសិដ្ឋ ត្រូវស្ត្រីម្នាក់រស់នៅក្រៅប្រទេសទម្លាយរឿងរៀបការ និងមានកូន

ថ្មីៗនេះ ពិធីករ និងជាតារាសម្តែង គឺ លោក រតនៈ វិសិដ្ឋ បានផ្ទុះនូវរឿងរ៉ាវដ៏រសើប បន្ទាប់ពីស្រ្តីម្នាក់រស់នៅក្រៅប្រទេសទម្លាយរឿងរ៉ាវរៀបការ និងមានកូនជាមួយយ៉ាងភ្ញាក់ផ្អើល។

បន្ទាប់ពីមានការទម្លាយនូវដំណឹងដ៏រសើបនេះ តារាប្រុសលោក រតនៈ វិសិដ្ឋ ក៏បានចេញមុខប្រតិកម្ម និងច្រានចោលចំពោះព័ត៌មានមួយនេះ។ ក្នុងនោះ លោក រតនៈ វិសិដ្ឋ​ បានសម្តែងការហួសចិ​ត្ត​ជាខ្លាំងក្រោយមានការបញ្ចេញព័ត៌មានគ្មានការពិតបែបនេះ ដែលធ្វើឲ្យប៉ះពាល់ដល់កិត្តិយសលោកជាអ្នកសិល្បៈ។

តារាប្រុសរូបសង្ហាលោក រតនៈ វិសិដ្ឋ បានបង្ហោះសារដោយអះអាងថា លោកនិងស្រ្តីរូបនេះ មិនដែលបានរៀបការជាមួយគ្នាទេ។ ចំណែករឿងមានកូនកាន់តែផ្ទុយស្រលះពីការពិតថែមទៀត។ លោក រតនៈ វិសិដ្ឋ បានលើកឡើងថា មនុស្សមិនដែលជួបគ្នាផង ឲ្យខ្ញុំទៅមានកូនជាមួយគាត់យ៉ាងម៉េច ហើយថ្មីៗនេះមកចោទថាខ្ញុំបោកលុយគាត់ទៀត។

លោក រតនៈ វិសិដ្ឋ បានបន្តថា ពុទ្ធោមានមនុស្សល្ងង់ឲ្យគេបោកលុយស្រួលម្លេះ ហើយតែងយករូបខ្ញុំបង្ហោះជាមួយកូនគាត់ឥឡូវខ្ញុំ Block អ៊ុំស្រីម្នាក់នេះហើយ។

ទាក់ទងព័ត៌មានដ៏រសើបខាងលើ នៅរសៀលថ្ងៃទី ១៦ ខែសីហា ឆ្នាំ ២០២២ នេះ កម្ពុជាថ្មី មិនទាន់អាចទាក់ទងស្វែងរកការសួរនាំពីតារាប្រុសលោក រតនៈ វិសិដ្ឋ បានទេ៕

អត្ថបទ ៖ ចាន់រ៉ា