ជំនាញគីមីចំណីអាហារ នៅតែមានសារៈសំខាន់ ទោះស្ថិតនៅសម័យបច្ចេកវិទ្យាឌីជីចល

ជំនាញគីមីចំណីអាហារ ជាជំនាញមួយដែលមានតម្រូវការខ្ពស់ នាថ្ងៃអនាគត ព្រោះបច្ចុប្បន្ន វិស័យឧស្សាហកម្មចំណី អាហារនៅកម្ពុជា កំពុងមានការអភិវឌ្ឍជាខ្លាំង។ បន្ថែមពីនេះទៀត សុវត្ថិភាពនៃចំណីអាហារមានសារៈសំខាន់ណាស់ ចំពោះសង្គម ក្នុងការធានាសុវត្ថិភាព និងគុណភាពរបស់អាហារ។ ជាពិសេសយើងអាចផលិតផលិតផលអាហារ ដែល មានគុណភាព សុវត្ថិភាព និងអាហារូបត្ថម្ភទៀតផង។

កញ្ញា ជួន ណៃ មានតួនាទីជាអ្នក Quality Control នៅក្រុមហ៊ុនឯកជនមួយ បានលើកឡើងថា នាពេលបច្ចុប្បន្ន ​ជំនាញគីមីចំណីអាហារនេះ ហាក់មានកំណើននិស្សិតចាប់អារម្មណ៍ចូលរៀនច្រើនជាងមុន បើធៀបទៅនឹងរយៈពេល កន្លងមក។ ចំពោះវិស័យការងារវិញ គឺអាចមានច្រើន ក្នុងករណីសេដ្ឋកិច្ចរបស់ប្រទេសមានការរីកចម្រើន លើវិស័យ ម្ហូបអាហារ ពិសេស ទៅលើការកែច្នៃផលិលផលម្ហូបអាហារ ដើម្បីផ្គត់ផ្គង់ទីផ្សារក្នុងស្រុក និងសម្រាប់នាំចេញទៅ កាន់ទីផ្សារអន្តរជាតិ។

បើការនាំចេញលើវិស័យនេះ កាន់មានកំណើនជាលំដាប់ នោះក្រុមហ៊ុន ឬសហគ្រាស នឹងបង្កើនចង្វាក់ផលិតកម្ម ជាកត្តានាំឱ្យមានតម្រូវការកម្លាំងពលកម្មជំនាញផ្នែកកែច្នៃចំណីអាហារនេះ។ នេះជាការបន្ថែមរបស់កញ្ញា ជួន ណៃ។

អតីតនិស្សិតបញ្ចប់ការសិក្សាពីវិទ្យាស្ថានបច្ចេកវិទ្យាកំពង់ស្ពឺ បានបន្ថែមថា «កត្ដាដែលធ្វើឱ្យខ្ញុំ ចាប់យកជំនាញគីមីចំណី អាហារ ព្រោះដឹងថាខ្លួនឯងចូលមុខវិជ្ជាគីមីវិទ្យាតាំងពីវិទ្យាល័យមកម្លេះ។ ម្យ៉ាងវិញទៀត ក៏ស្រឡាញ់ការធ្វើម្ហូបផងនោះ ទើបជំនាញគីមីចំណីអាហាគឺជាជម្រើងល្អសម្រាប់បន្តថ្នាក់មហាវិទ្យាល័យ»។

បើតាមតាម កញ្ញា ជួន ណៃ ការរៀនជំនាញនេះមានច្រើនផ្នែក ច្រើនសណ្ឋាន រួមមា៖ Food processing technologies ជាដំណើរការកែច្នៃទៅលើវត្ថុធាតុដើមទៅជាផលិតផល សម្រេចមួយ និង Food safety and microbiology  ជាសិក្សាទៅលើប្រភេទសារធាតុប្រូតេអ៊ីន សារធាតុរ៉ែ ឬសារធាតុចិញ្ចឹម​ផ្សេងៗដទៃ​ទៀតមាន​នៅក្នុងវត្ថុធាតុដើមនោះ។

យ៉ាងណាមិញ នៅមានផ្នែកផ្សេងៗជាច្រើនទៀតដូចជាសិក្សាត្រួតពិនិត្យ និងវិភាគទៅលើពពួកបាក់តេរី ឬមេរោគ ផ្សេងៗ ដែលមានផ្ទុកនៅក្នុងអាហារ នាំឱ្យអាហារនោះខូចគុណភាព ឬអាចបង្កឱ្យប៉ះពាល់ដល់អ្នកប្រើប្រាស់ ជាដើម។

ដោយឡែកសម្រាប់ឱកាសការងារមានជាច្រើន នៅក្នុងវិស័យនេះ មានដូចជា៖ អ្នកផលិតអាហារ, អ្នកវិទ្យាសាស្ត្រអាហារ ផលិតករ ឬអ្នកបច្ចេកទេសចំណីអាហារ អ្នកស្រាវជ្រាវនិងអ្នកអភិវឌ្ឍន៍ ទីផ្សារ វេចខ្ចប់ អ្នកកែច្នៃផលិតផលអាហារ ឬវិស្វករដំណើរការ, និងអ្នកគ្រប់គ្រងគុណភាព / ការធានា ជាដើម៕

អត្ថបទ៖ ផល ធារិត