គណៈប្រតិភូវិនិយោគចិន សិក្សាកាលានុវត្តភាព និងច្បាប់វិនិយោគកម្ពុជា

លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជានៅថ្ងៃទី ២៥ ខែកក្កដា ឆ្នាំ ២០២៤ បានទទួល​ជួបពិភាក្សា ការងារជាមួយគណៈ​ប្រតិភូវិនិយោគិន​ដែលដឹកនាំដោយលោក ZHONG ZHENGBING​ អនុប្រធានសមាគមវឌ្ឍនភាពកម្ពុជា-ចិន ដើម្បីពង្រីកកិច្ច សហប្រតិបត្តិការលើការអភិវឌ្ឍក្នុងវិស័យ​ហេដ្ឋារចនាសម្ព័ន្ធ និងសិក្សាស្វែងយល់ពីកាលានុវត្តភាព និងច្បាប់ និងបទបញ្ញត្តិស្ដីពីវិនិយោគនៅកម្ពុជា។

នៅក្នុងជំនួបនោះ គណៈប្រតិភូបានបង្ហាញពីចេតនាក្នុងការចូលរួមចំណែកវិនិយោគលើវិស័យសក្ដានុពលលទ្ធភាព​នានាក៏ដូចជាចូលរួមជាមួយរាជរដ្ឋាភិបាល​ការអភិវឌ្ឍ​ហេដ្ឋារចនា​សម្ព័ន្ធរូបវន្ត ឆ្ពោះទៅរកការអភិវឌ្ឍប្រព័ន្ធដឹកជញ្ជូនអន្តរមធ្យោ​បាយ មានការតភ្ជាប់ខ្ពស់ និងភាពប្រទាក់ក្រឡា ទាំងផ្ទៃក្នុងប្រទេស និងជាមួយតំបន់ ដែលនឹងបន្តរួមចំណែកជំរុញ និងទ្រទ្រង់កំណើនសេដ្ឋកិច្ចជាតិ ព្រមទាំងបំពេញ​សេចក្តីត្រូវការសង្គម-សេដ្ឋកិច្ចប្រកបដោយចីរភាព និងបរិយាបន្ន។

លោក សួន សុផល បានជម្រាបជូនអំពីគំនិតផ្ដួចផ្ដើមកិច្ចសហប្រតិបត្តិការ រៀបចំបង្កើត​របៀងឧស្សាហកម្ម និងច្រករបៀង​មច្ឆា និងអង្ករ ដែលនឹងក្លាយទៅជាកម្លាំង ចលករ​រុញ​ច្រានកំណើនសេដ្ឋកិច្ចកម្ពុជាឈានខ្ពស់សម្រេចបាននូវចក្ខុវិស័យកម្ពុជា ឆ្នាំ ២០៥០៕