Connect with us

ព័ត៌មានជាតិ

ភ្នំពេញ​នៅ​រដូវ​ប្រាំង​ ឆ្នាំ២០២១​នេះ​​ ​ខ្វះ​ភ្លើង​​​ប្រើ​ឬ​​ទេ?

បានផុស

នៅ

ទីក្រុងភ្នំពេញនឹងមិនជួបបញ្ហាកង្វះខាតថាមពលអគ្គីសនីទៀតទេនៅរដូវប្រាំងឆ្នាំ២០២១នេះ បន្ទាប់ពីកម្ពុជាបានដាក់ឱ្យដំណើរការម៉ាស៊ីនផលិតថាមពលអគ្គីសនីចំនួនពីរ ដែលបានបញ្ជាទិញពីប្រទេសអាល្លឺម៉ង់ និងហ្វាំងឡង់ ជាមួយនឹងអនុភាពផលិតកម្លាំង៤០០មេហ្គាវ៉ាត់រួចមក។

ឯកឧត្តម វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពល បានបញ្ជាក់ថា៖ «នៅរដូវប្រាំងឆ្នាំ២០២១នេះ ទីក្រុងភ្នំពេញលែងជួបបញ្ហាកង្វះខាតថាមពលអគ្គីសនីទៀតហើយ។ យើងអាចមានលទ្ធភាពគ្រប់គ្រាន់សម្រាប់ផ្គត់ផ្គង់តម្រូវការទាំងអស់ ដោយសារម៉ាស៊ីន៤០០មេហ្គាវ៉ាត់ ដែលយើងបានដំឡើងកាលពីឆ្នាំ២០២០បានដាក់ឱ្យដំណើរការហើយ។ ក្រៅពីនេះ ស្ថានភាពនៃការផ្គត់ផ្គង់តាមរយៈប្រភពផ្សេងៗទៀតក៏អាចមានលទ្ធភាពដើម្បីបំពេញតាមតម្រូវការដែរ។»

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា កាលពីឆ្នាំ២០២០ យើងក៏មិនជួបបញ្ហាខ្វះខាតថាមពលអគ្គីសនីដែរ ប៉ុន្តែយើងខ្វះខាតថាមពលអគ្គីសនីប្រើប្រាស់នៅឆ្នាំ២០១៩។ កាលពីឆ្នាំ២០២០ ជំងឺកូវីដ១៩បានធ្វើឱ្យរោងចក្រ និងសណ្ឋាគារមួយចំនួនបិទទ្វារ ដែលនាំឱ្យតម្រូវការមានការធ្លាក់ចុះបន្តិច ស្របពេលដែលសមត្ថភាពផ្គត់ផ្គង់របស់យើងនៅដដែល។ ដូច្នេះ យើងអាចគ្រប់គ្រងស្ថានការណ៍បាននៅឆ្នាំ២០២១។

ឯកឧត្តម វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពល

ទោះបីជាយ៉ាងណាក៏ដោយ លោក វិចទ័រ ហ្សូនា បានពន្យល់ថា កម្ពុជានៅតែបន្តនាំចូលថាមពលពីប្រទេសជិតខាងដូចជា ថៃ ឡាវ និងវៀមណាម ប្រមាណ១៥ភាគរយនៃតម្រូវការផ្គត់ផ្គង់សរុប។ បច្ចុប្បន្ន កម្ពុជាមានសមត្ថភាពផ្គត់ផ្គង់តម្រូវការក្នុងស្រុកបាន៨៥ភាគរយប៉ុណ្ណោះនៃតម្រូវការផ្គត់ផ្គង់សរុប។

យោងតាមរបាយការណ៍បូកសរុបលទ្ធផលការងារចុងឆ្នាំ២០២០នៃក្រសួងរ៉ែ និងថាមពល ក្នុងចំណោមភូមិជាង ១៤,០០០នៅទូទាំងប្រទេស ការផ្គត់ផ្គង់អគ្គីសនីបានគ្របដណ្ដប់៩៧ភាគរយ។ នៅឆ្នាំ២០២១-២០២២នេះ ក្រសួងនឹងព្យាយាមផ្គត់ផ្គង់អគ្គីសនីឱ្យគ្របដណ្ដប់ទៅដល់ជិត១០០ភាគរយ។

អត្ថបទ៖ វ៉ាត វិន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម