កម្ពុជានឹងចូលរួមពិព័រណ៍ទេសចរណ៍ចិន-អាស៊ាននៅខែកញ្ញាខាងមុខ

កម្ពុជានឹងចូលរួមពិព័រណ៍ទេសចរណ៍ចិន-អាស៊ានចាប់ពីថ្ងៃទី ២៤-២៩ ខែកញ្ញា ឆ្នាំ២០២៤ នៅមជ្ឈមណ្ឌលសន្និសីទ និងពិព័រណ៍ អន្តរជាតិនៅទីក្រុងគួយលីន សាធារ​ណរដ្ឋប្រជាមានិតចិន ក្រោមប្រធានបទ៖ ​«សមាហរណកម្មស៊ីជម្រៅនៃវប្បធម៌ និងទេសចរណ៍ រួមគ្នាកសាងខ្សែក្រវាត់ និងផ្លូវ» ដែលមានការចូលរួមពីបណ្ដាក្រុមហ៊ុន​ជាង ៨០០ ស្ដង់ អ្នកទិញជាង ៥០០ នាក់ មកពីប្រទេសក្នុងតំបន់អាស៊ាន និងអ្នកទស្សនាជាង ៥០០០ នាក់។

ក្រសួងទេសចរណ៍បានប្រកាសថា ការចូលរួមក្នុងពិព័រណ៍ទេសចរណ៍នេះ មានគោលបំណង​ផ្សព្វ​ផ្សាយ​អំពីសក្តានុពលវិស័យទេសចរណ៍កម្ពុជា ពង្រឹងទំនាក់ទំនង និងកិច្ចសហប្រតិបត្តិការ​ល្អ​ក្នុងវិស័យ​ទេសចរណ៍រវាងផ្នែករដ្ឋ-ឯកជន កម្ពុជា ចិន និងអាស៊ាន ព្រមទាំងបង្កើនការ​ផ្សព្វ​ផ្សាយ​គោលដៅ​ទេសចរណ៍កម្ពុជាស្របតាមស្មារតីអាស៊ាន និងគំនិតផ្តួចផ្តើមយុទ្ធសាស្ត្រ “បង្កើន៥ អភិវឌ្ឍ៣” របស់ក្រសួងទេសចរណ៍ ព្រមទាំងចូលរួមជំរុញយុទ្ធនាការ “ឆ្នាំទស្សនាសៀមរាប ២០២៤ ជាពិសេសដើម្បីបន្តជំរុញការអនុវត្ត “ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤” សំដៅទាក់​ទាញទេសចរ និងវិនិយោគិនចិន ព្រមទាំងទេសចរ និងវិនិយោគិនក្នុងតំបន់អាស៊ានឱ្យមកទស្សនា និងវិនិយោគនៅកម្ពុជាកាន់តែច្រើនថែមទៀត។

ក្រសួងទេសចរណ៍ អំពាវនាវដល់ប្រតិបត្តិករទេសចរណ៍ គ្រប់សមាគមទេសចរណ៍ និងដៃគូពាក់ព័ន្ធ ចូលរួមឱ្យបានច្រើន ដើម្បីចាប់យកឱកាសក្នុងការលក់កញ្ចប់ទស្សនកិច្ចទេសចរណ៍កម្ពុជាទៅកាន់ទីផ្សារចិន និងអន្តរជាតិ៕