កម្ពុជាដាក់ឱ្យប្រើប្រព័ន្ធអេឡិចត្រូនិកនៅដើមខែក្រោយ ខណៈអ្នកជំនាញឱ្យយោបល់បន្ថែម​គោល​នយោ​បាយទាក់ទាញទេសចរ

រាជរដ្ឋាភិបាលកម្ពុជាត្រៀមដាក់ឱ្យប្រើ​ប្រាស់​ប្រព័ន្ធ​​អេឡិក​ត្រូនិកសម្រាប់អ្នកដំណើរតាមជើង​ហោះហើរនៅកម្ពុជា ដើម្បីសម្រួលដល់​ការធ្វើដំ​ណើរចាប់ពីថ្ងៃទី ០១ ខែកញ្ញា ខាងមុខ ខណៈអ្នកនៅក្នុងវិស័យនេះលើកឡើងថាការប្រើប្រាស់ប្រព័ន្ធបច្ចេកវិទ្យានេះផ្តល់ភាពងាយស្រួលច្រើនដល់ភ្ញៀវទេចរចូលមកទស្សនាប្រទេសកម្ពុជា​។

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា បាន​ប្រាប់​កម្ពុជាថ្មីនៅថ្ងៃទី ១៣ ខែសីហា ឆ្នាំ ២០២៤ នេះថា លោកទទួលស្គាល់ថា ការដាក់ឱ្យ​ដំណើរការប្រព័ន្ធ​​អេឡិក​ត្រូនិកទាំងការបង់ពន្ធ និងការដាក់ពាក្យសុំទិដ្ឋការនៅពេលមកដល់​ (Visa on Arrival) និងវីសារនៅក្រៅវាជួយសម្រួលដល់អ្នកដំណើរ ងាយស្រួលជាងមុន ប៉ុន្តែលោកថា នេះមិនមែនជាគោលនយោបាយធំដុំ ដែលទាក់ទាញ និងលើកទឹក​ចិត្តភ្ញៀវ​ទេសចរ​មកកម្ពុជានោះទេ។

លោក ធួន ស៊ីណាន បន្តថា៖ «រដ្ឋាភិបាលគួរដាក់បន្ថែមគោលនយោបាយណាដែលមាន​ភាព​ទាក់​ទាញ​ភ្ញៀវ​ទេសចរដូចជាការសាកល្បងមិនយកថ្លៃវីសាជាដើម ឬសេវាកម្មផ្សេង​ទៀត ដែល​ជាចំណុចទាក់ទាញ ដោយ​សារទេសចរដែលមកលេង​ច្រើនគឺភាគច្រើននៅ​ប្រទេស​ជិតខាង​កម្ពុជា»។

យោងតាមរបាយការណ៍ អាកាសចរណ៍ស៊ីវិលកម្ពុជាទទួលបានអ្នកដំណើរចេញ-ចូលតាម​ជើងអាកាសចំនួនជាង ៣ លាននាក់ (៣,០៣៦,៩៤៤ នាក់) ក្នុងនោះរួមមាន​អ្នកដំណើរ​អន្តរជាតិ មានចំនួន ២,៨៨៤,៧៤៦នាក់ ខណៈអ្នកដំណើរក្នុងស្រុក មានចំនួន ១៥២,១៩៨​នាក់។

នៅក្នុងឆមាសទី១ ឆ្នាំ ២០២៤ នេះ កម្ពុជាទទួលបានភ្ញៀវអន្តរជាតិសរុបចំនួនជាង ៣,១៦ លាន​​​នាក់ (៣ ១៦៦ ៤៩៧) មានការកើនឡើង ២២,៧% ធៀបនឹង​រយៈពេល​ដូច​គ្នានៅឆ្នាំ​២០២៣។ នេះបើយោង​តាម​ក្រសួងទេសចរណ៍។

ក្នុងចំណោមទេសចរជាង ៣,១៦ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ៩៥៥ ២៥០ នាក់ កើន ៩,៧% វៀតណាមចំនួន ៦៣៩ ៥៤៩ នាក់ កើន ៣៨% ចិន ៣៨៩ ៣៦០ នាក់ កើន ៤៥,២% ឡាវ ១៨៨ ៧២៦ កើន​៣៤,៤% អាមេរិក ១១២ ០៤៣ កើន ១៥,៧% កូរ៉េ ១០១ ៤៣៥ កើន ១៦,៧%៕

អត្ថបទ៖ ឡេង ដេត