អ្នកជំនាញថា គោលការណ៍បន្តលើកលែងពន្ធសម្រាប់វិស័យអចលនទ្រព្យ​រហូតដល់ដំណាច់ឆ្នាំ ២០២៥ ជាការសម្រាលបន្ទុកអ្នកវិនិយោគ

រាជរដ្ឋាភិបាលបានសម្រេចបន្តគោលការណ៍លើកលែងពន្ធក្នុងវិស័យអចលនទ្រព្យ ដែលជួយ​កាត់បន្ថយ​បន្ទុកចំណាយដល់អ្នកអភិវឌ្ឍអចលនទ្រព្យ និងប្រជាពលរដ្ឋ។ អ្នកជំនាញនៅក្នុងវិស័យអចលទ្រព្យយល់ឃើញថា ការសម្រេចបែបនេះ គឺបានជួយបន្ធូរ​បន្ថយ​ខ្លះ នៅក្នុងស្ថានភាពពេលលំបាករបស់អ្នកវិនិយោគ។

លោក ច្រឹក សុខនីម អគ្គនាយកក្រុមហ៊ុន Century21 Mekong ប្រាប់កម្ពុជាថ្មីនៅថ្ងៃទី ២៣ ខែសីហា ឆ្នាំ ២០២៤ នេះថា ការបន្តវិធានការនេះ បានជួយសម្រួលបន្ទុកការក្នុងការចំណាយ​សម្រាប់អ្នកអភិវឌ្ឍអចលនទ្រព្យ និងប្រជាពលរដ្ឋ ប៉ុន្តែបើចង់ឱ្យវិស័យអចលនទ្រព្យដំណើរ​ការឡើងវិញ ទាល់តែមានយន្តការច្រើន​ជានេះបន្ថែម​ទៀត ជាពិសេសការជំរុញឱ្យមាន​ចរន្តនៅ​ក្នុងការដោះដូរ​អចលនទ្រព្យនៅក្នុង​ស្រុកឱ្យបានច្រើន តាមយន្តការជម្រុញ​ការទិញដូច​ជាការផ្ដល់ប្រាក់កម្ចី ឬជំរុញចលនា SME ឱ្យសេដ្ឋកិច្ចកើន​ឡើង​​បន្តិចម្ដងនោះចរន្ត​ដំណើរ​ការនឹងដើរទៅមុខ។

លោក ច្រឹក សុខនីមលើកឡើងថា៖ «នៅលើពិភពលោកប្រឈមបញ្ហាសេដ្ឋកិច្ច សង្គ្រាមផង អញ្ចឹងលំហូរទុនពីខាងក្រៅទៅលើវិស័យអចលនទ្រព្យក៏មានកម្រិត»។

លោក ច្រឹក សុខនីម បន្តថា ការដោះដូរទីផ្សារអចលនទ្រព្យក្នុងស្រុកមានកំណើនយឺត នៅរយៈពេល ៣ ឆ្នាំចុងក្រោយ នេះ ជាពិសេសលំនៅឋានថ្មីៗ មិនសូវមានការដោះដូរ ខណៈគ្រឹះស្ថានធានាគារ និងហិរញ្ញវត្ថុរឹតបន្តឹងទៅលើវិស័យអចលនទ្រព្យ ធ្វើឱ្យការដោះ​ដូរទិញ​លក់បន្តជាប់គាំង។

លោក ឡោ វិចិត្រ អនុប្រធានសមាគមពាណិជ្ជកម្ម កម្ពុជា-ចិន យល់ឃើញថា៖ «រដ្ឋាភិបាល​ចង់ឱ្យវិស័យអចលនទ្រព្យមានដង្ហើម និងមានលំហូរបន្ថែម ក្នុងការលូតលាស់ឡើងវិញ»។

ធនាគារជាតិនៃកម្ពុជា បានព្យាករថា វិស័យសំណង់នៅកម្ពុជានឹងសម្រេចបានកំណើន​ក្នុងកម្រិតទាប១,១% នៅឆ្នាំក្នុង២០២៤ នេះ ដែលគាំទ្រដោយកំណើនលំហូរទុនវិនិយោគពីបរទេស និងគម្រោងសំណង់ហេដ្ឋារចនាសម្ព័ន្ធ​សាធារណៈ។

តែយ៉ាងណា វិស័យនេះអាចបន្តប្រឈមនឹងភាពមិនច្បាស់លាស់នៃសេដ្ឋកិច្ចសកល បញ្ហាសង្គ្រាម និងភាពតានតឹងផ្នែកភូមិសាស្ត្រនយោបាយសកល ជាពិសេសជម្លោះពាណិជ្ជកម្មរវាងប្រទេសចិន និងសហរដ្ឋអាមេរិក ក៏ដូចជាការធ្លាក់ចុះនៃទីផ្សារអចលនទ្រព្យនៅក្នុងប្រទេសចិន។

រាជរដ្ឋាភិបាលបានសម្រេចបន្តគោលការណ៍លើកទឹកចិត្តពន្ធដារ ក្នុងវិស័យអចលនទ្រព្យ ដែល​បាន​កាត់បន្ថយបន្ទុកចំណាយបង់ពន្ធ ដល់អ្នកអភិវឌ្ឍអចលនទ្រព្យ និងប្រជាពលរដ្ឋ។

គោលការណ៍លើកទឹកចិត្តនោះរួមមាន៖ ការលើកលែងពន្ធលើចំណេញមូលធន, ការអនុញ្ញាតការបង់ពន្ធជាកញ្ចប់តាមគម្រោងដល់ក្រុមហ៊ុនអភិវឌ្ឍន៍សំណង់, ការលើកលែង​ពន្ធប្រថាប់ត្រា លើការផ្ទេរកម្មសិទ្ធិ ឬសិទ្ធិកាន់កាប់លំនៅឋាន គ្រប់ប្រភេទ ដែលមាន​លក្ខណៈ​ជាបុរី ដែលមានតម្លៃក្រោម ៧ ម៉ឺនដុល្លារ៕

អត្ថបទ៖ ឡេង ដេត