អាកាស​យានដ្ឋាន​តារា​សាគរ លើកពេលដាក់ឱ្យដំណើរការនៅដំណាច់ឆ្នាំ ២០២៤

លោក ម៉ៅ កែវពេជ្រច័ន្ទមុន្នី នាយក​អាកាសយានដ្ឋាន​អន្តរជាតិ​តារាសាគរ​ បានប្រាប់កម្ពុជា​ថ្មី​នៅ​ថ្ងៃទី ០៧ ខែវិច្ឆិកា ឆ្នាំ ២០២៤ នេះថា ការដាក់ឱ្យដំណើរការអាកាសយានដ្ឋាន​អន្តរជាតិ​តារាសាគរ ស្ថិតនៅស្រុក​បុទុមសាគរ​ ខេត្តកោះកុង នឹងត្រូវលើកពេល​ទៅដាក់ឱ្យដំណើរ​ការនៅ​ថ្ងៃទី ៣១ ខែ ធ្នូ ឆ្នាំ ២០២៤។

លោក ម៉ៅ កែវពេជ្រច័ន្ទមុន្នីបញ្ជាក់ថា៖ «ព្រលានយន្តហោះតារាសាគរ ដើមឡើយគ្រោងដាក់​ឱ្យដំណើរ​ការ​​នៅថ្ងៃទី ២៨ ខែវិច្ឆិកា ប៉ុន្តែការដ្ឋានសំណង់មិនទាន់បញ្ចប់រួចរាល់ទាន់ពេល ដូច្នេះក្រុមហ៊ុនត្រូវ​លើក​ទៅថ្ងៃទី ៣១ ខែធ្នូ ឆ្នាំ ២០២៤»។

បើតាមលោក ម៉ៅ កែវពេជ្រច័ន្ទមុន្នី ការសាងសង់ និងបច្ចេកទេសខ្លះៗ ត្រូវមានការកែ​តម្រូវ​ឡើងវិញ ទី១ អាគារអ្នកដំណើរត្រូវ​ជួស​ជុល​​លាបពណ៌ឡើងវិញ និងបញ្ចប់ការដ្ឋានឱ្យរួចរាល់​ ទី២ គំនូសផ្លូវ និងការកាត់​ស្មៅ​ជុំវិញផ្លូវ​រត់ និងផ្លូវហោះ និងឧបករណ៍ប្រើប្រាស់​តម្រូវតាម​ស្ដង់​ដារ​តាមច្បាប់ ទី៣ បញ្ហា​អាកាស​ធាតុ​ត្រូវមានអ្នកព្យាករណ៍អាកាសធាតុ និងទី៣ សន្ដិសុខ ខណៈ​​ក្រុមហ៊ុន​កំពុង​ពន្លឿនការងារនេះ។

ក្រុមហ៊ុន Union Development Group (UDG) បាន​ទទួល​បាន​ដី​សម្បទាន​ពី​រដ្ឋាភិបាល​វិនិយោគ​អាកាស​យានដ្ឋាន​តារា​សាគរ​តម្លៃ​ ២០០ លាន​ដុល្លារ នៅស្រុក​បុទុមសាគរ​ ក្នុង​ខេត្តកោះកុង។

អាកាស​យានដ្ឋាន​ថ្មី​នេះ​​ មាន​ផ្លូវយន្តហោះ​ចុះប្រវែង ៣២០០ ម៉ែត្រ ទទឹង​ ៦០ ម៉ែត្រ ដែល​មាន​សមត្ថភាព​​អាច​ទទួលយន្តហោះ​ប្រភេទ A-350-900 និង Boeing 777 ជាដើម។

លោក ម៉ៅ កែវពេជ្រច័ន្ទមុន្នី បានឱ្យដឹងថា ប្រសិនបើដំណើរការ​ជើងហោះហើរតារាសាគរ​នឹង​ជួយ​សម្រួលការធ្វើដំណើរក្នុងស្រុក ចំណេញ​ពេលវេលា បើធៀបនឹងការធ្វើដំណើរ​តាមផ្លូវ​គោក និងជួយ​លើកមុខមាត់ខេត្តកោះ​កុងថែមមួយកំរិត​ទៀត ហើយក៏ជាទិសដៅសម្រាប់​អ្នកវិនិយោគ​ជាតិ និងអន្តរជាតិ ធ្វើឱ្យខេត្តកោះកុង កាន់​តែ​រីកចម្រើនបន្ថែមទៀត៕

អត្ថបទ៖ ឡេង ដេត