ចំណូលប្រតិបត្តិការរបស់ក្រុមហ៊ុនសែលកាតធ្លាក់ចុះ៨៧%

ក្រុមហ៊ុន ខេម ជ្ជីអេសអេម (CamGSM) ឬសែលកាត ដែលជាប្រតិបត្តិករទូរស័ព្ទចល័តដ៏ធំ​ជាងគេនៅកម្ពុជា និងបានចុះបញ្ជីនៅលើផ្សារមូលបត្រកម្ពុជា បានរាយការណ៍ពីធ្លាក់ចុះ​នៃចំណូលអាជីវកម្ម​៨៧% នៅក្នុងត្រីមាសទី៣​ឆ្នាំ​នេះដែលសម្រេចបានចំនួន ៤ ពាន់លានរៀល ដែលថយចុះចំនួន ២៧ ពាន់លានរៀល ​ បើធៀបនឹងត្រីមាសទី៣ ២០២៣។

យោងតាមរបាយការណ៍របស់ក្រុមហ៊ុនផ្ញើរទៅកាន់ផ្សារមូលបត្រកម្ពុជាបានបង្ហាញថា គិតត្រឹមថ្ងៃទី៣០ ខែកញ្ញា ឆ្នាំ២០២៤ ក្រុមហ៊ុន ខេម ជ្ជីអេសអេម មានទ្រព្យសកម្មសរុបចំនួន ២,៧២៧ ពាន់លានរៀល កើនឡើងចំនួន ៦% បើប្រៀបនឹងឆ្នាំ២០២៣។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុនសែលកាតបានថ្លែងក្នុង​របាយ​ការណ៍នោះថា ទោះបីជាជួបប្រទះបញ្ហាប្រឈមជាបន្តបន្ទាប់ ក្នុងវិស័យ ទូរគមនាគមន៍យ៉ាងណាក្តី ក៏ក្រុមហ៊ុន សែលកាត នៅតែរឹងមាំ និងបន្តរីកលូត លាស់គួរឱ្យកត់សម្គាល់ផងដែរ។

​អ្នកឧកញ៉ាថាជាមួយនឹងយុទ្ធសាស្ត្រក្នុងការពង្រីកទីផ្សារ រួមមានការពង្រីកកញ្ចប់សេវាអ៊ីនធឺណិតតាមផ្ទះ និងយុទ្ធនាការទីផ្សារដ៏មានភាពច្នៃប្រឌិត ក្រុមហ៊ុន សែលកាត បានទទួលលទ្ធផលគួរជាទីគាប់ចិត្ត។

អ្នកឧកញ៉ា គិត ម៉េង បានថ្លែងបន្តទៀតថា៖«ក្រុមហ៊ុនមានទ្រព្យសកម្មសរុប បានកើន ឡើងដល់ ២,៧២៧ ប៊ីលានរៀល ដែលបានឆ្លុះបញ្ចាំងពីការវិនិយោគឥតឈប់ ឈរ ទៅលើហេដ្ឋារចនាសម្ព័ន្ធបណ្តាញទូរគមនាគមន៍ និងការប្តេជ្ញាចិត្តក្នុងការ ពង្រីកនូវវិសាលភាព និងសេវារបស់ក្រុមហ៊ុនយើង។ ភាគហ៊ុនរបស់ភាគហ៊ុនិក ក៏បានកើនឡើងពី ៧% ទៅ ១,៨៣ ប៊ីលានរៀល ដែលការកើនឡើងនេះ សបញ្ជាក់ពីស្ថេរភាពហិរញ្ញវត្ថុ និងភាពរឹងមាំរបស់ក្រុមហ៊ុនយើង»។

«ខណៈដែលប្រាក់ចំណូលរបស់ក្រុមហ៊ុន មានការប្រែប្រួលបន្តិចបន្តួចនៅត្រីមាស នេះ បានធ្វើឲ្យក្រុមហ៊ុនដាក់ចេញនូវយុទ្ធសាស្ត្រថ្មី ក្នុងការសម្របខ្លួនទៅនឹងបទ ប្បញ្ញត្តិនាៗ ដែលបានដាក់ចេញ ក៏ដូចជាការវិវត្តនៃទីផ្សារផងដែរ។ យើងមាន ទំនុកចិត្តថា យុទ្ធសាស្ត្របង្ការនេះ នឹងជួយឲ្យក្រុមហ៊ុនមាននិរន្តរភាព និង កំណត់ពីភាពជោគជ័យជាក់លាក់ របស់យើងនាពេលអនាគត»។ នេះបើយោងតាមការថ្លែងអះអាងរបស់អ្នកឧកញ៉ា គិត ម៉េង៕