មន្ត្រីកសិកម្ម អំពាវនាវឱ្យកសិករ ចូលរួមជាមួយ​សហគមន៍​​កសិកម្មទំនើប ដើម្បីធានាស្ថិរភាពតម្លៃកសិផល

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានអំពាវនាវ​ឱ្យកសិករ ចូលរួមជាមួយសហគមន៍កសិកម្មទំនើប ដើម្បីរក្សាស្ថិរភាព​តម្លៃកសិផល។

លោក ឃឹម ហ្វីណង់បានបញ្ជាក់នៅថ្ងៃទី ៣១ ខែមីនា ឆ្នាំ ២០២៥ថា មិនថាសម្រាប់ដំណាំម្រេច ស្វាយចន្ទី ស្រូវ ឬបន្លែចម្រុះ សហគមន៍កសិកម្មទំនើបគឺជាយន្តការដែលផ្តល់ទំនុកចិត្តខ្ពស់ ដល់ទាំងបងប្អូនកសិករ និងទាំងក្រុមហ៊ុនដៃគូដែលធ្វើអាជីវកម្មនៅក្នុងវិស័យកសិកម្ម។

តាមរយៈការគាំទ្រខាងផ្នែកដើមទុន បច្ចេកទេស ទីផ្សារ និងការគ្រប់គ្រងច្បាស់លាស់ សហគមន៍កសិកម្មទំនើបតភ្ជាប់តួអង្គទាំងពីរប្រកបដោយប្រសិទ្ធភាព តាមរយៈការធ្វើ​ផលិតកម្មកសិកម្មតាមកិច្ចសន្យា ដែលមានក្រសួងកសិកម្មជាអ្នកសម្របសម្រួលដោយផ្ទាល់។

លោក ឃឹម ហ្វីណង់ថ្លែងថា៖ «សម្រាប់បងប្អូន ដែលជាកសិករ សូមឱ្យបងប្អូនយល់ថា ឥឡូវនេះ យើងមានសហគមន៍កសិកម្មទំនើប ដែលអាចមានលទ្ធភាពផ្ដល់ភាពច្បាស់លាស់ជូនបងប្អូន មិន​ដូចពេលដែលបងប្អូនធ្វើការដាំដុះដោយខ្លួនឯងទេ ពេលដែលបងប្អូននៅលក្ខណៈតូចៗ ជា​លក្ខណៈ​គ្រួសារ បងប្អូនទទួលយកហានិភ័យពីទីផ្សារទាំងស្រុង ដាំហើយមិនច្បាស់​ទីផ្សារតម្លៃប៉ុន្មាន លក់នៅឯណាទេ គេឱ្យប៉ុន្មានភាគច្រើនយើងទទួលយក​​ តែឥឡូវយើង​មានសហគមន៍កសិកម្មទំនើប គឺយើងដោះបញ្ហាបានច្រើនដោយសារតែយើងដឹងតម្លៃទីផ្សារ​មួយច្បាស់លាស់ យើងមានការគាំពារពីទីផ្សារ ចឹងយើងមិន​រងហានិភ័យ​ដូចពេលដែលយើងនៅរៀងខ្លួនទេ»។

លោក ឃឹម ហ្វីណង បន្ថែមថា៖ «សម្រាប់ក្រុមហ៊ុនដែលចង់ទិញម្រេច ឬកសិផលផ្សេងៗ គឺបច្ចុប្បន្នយើងមាន​សហ​គមន៍កសិកម្មទំនើបដែលនិយាយម៉ាត់ណាម៉ាត់ហ្នឹង ចរចារជា​មួយ​សហ​គមន៍ ចរចារបានចុះហត្ថលេខាងហើយ យើងនឹងបំពេញកាតព្វកិច្ចរបស់យើង ១០០% បើសិន​ជាមានតួអង្គណាខូច នៅក្នុងពេលធ្វើកិច្ចសន្យានេះ ក្រសួងនឹងដើរតួនាទីជា​អាជ្ញា​កណ្ដាលដោះ​ស្រាយបញ្ហា មិនថាក្រុមហ៊ុន ឬសហគមន៍ជាអ្នកខូច ក្រសួងដឹងតែកាន់ញញួ ដើម្បី​រឹតបន្តឹង​វិន័យ»៕