កូវីដ-១៩

មកដឹងពីសកម្មភាពគួរធ្វើ និងមិនគួរធ្វើ មុន-ក្រោយចាក់វ៉ាក់សាំងកូវីដ-១៩

បានផុស

៤ years មុន

នៅ

ថ្ងៃពុធ ៥ ឧសភា ២០២១

ដោយ

Sonya

ការចាក់វ៉ាក់សាំង គឺជាវិធានការមានប្រសិទ្ធភាពបំផុតក្នុងការការពារខ្លួនយើងជំងឺកូវីដ-១៩ រួមផ្សំជាមួយនឹងការពាក់ម៉ាស់ លាងដៃនឹងសាប៊ូជាដើម។ ខាងក្រោមនេះ ជាសកម្មភាពដែលគួរ និងមិនគួរធ្វើមុនពេលចាក់ និងក្រោយពេលចាក់វ៉ាក់សាំងហើយ គ្នាយើងគួរកត់ចំណាំដើម្បីឲ្យរាងកាយឆ្លើយតបបានល្អជាមួយវ៉ាក់សាំងកូវីដ-១៩។

សកម្មភាពគួរធ្វើ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. ត្រៀមទប់ទល់ផលរំខាន៖ ធម្មតា ក្រោយចាក់វ៉ាក់សាំងរួច រាងកាយយើងនឹងបញ្ចេញអាការៈមួយចំនួនដូចជា ក្ដៅខ្លួន ឈឺមុខម្ជុល វិលមុខ។ដែលនេះជាបញ្ហាទូទៅ មិនមានអីគួរឲ្យបារម្ភ ហើយយើងអាចលេបថ្នាំបំបាត់ក្ដៅខ្លួនក្រោយចាក់បាន ក្នុងករណីឡើងកម្ដៅ។
២. ពាក់ម៉ាស់៖ ការពាក់ម៉ាស់នៅតែជាវិធានការល្អមួយក្នុងការកាត់បន្ថយភាគរយនៃការឆ្លងកូវីដ-១៩ ឲ្យនៅទាប។ ម៉្យាងនៅពេលដែលដល់កន្លែងចាក់វ៉ាក់សាំង យើងនឹងជួបមនុស្សច្រើន ជាហេតុយើងចាំបាច់ត្រូវពាក់ម៉ាស់ និងបន្តរក្សាគម្លាត។
៣. ពាក់អាវដៃខ្លី៖ យើងត្រូវចាក់វ៉ាក់សាំងនៅលើស្មា ដូចនេះហើយគួរតែពាក់អាវដៃខ្លី រលុងៗ ងាយស្រួលក្នុងការលាត់ដៃអាវឲ្យគ្រូពេទ្យចាក់វ៉ាក់សាំង។

សកម្មភាពមិនគួរធ្វើ

១. បង្ហោះរូបកាតវ៉ាក់សាំងលើបណ្ដាញសង្គម៖ នៅលើកាតវ៉ាក់សាំងកូវីដ-១៩ មានព័ត៌មានមួយចំនួន ដូចជាឈ្មោះ ថ្ងៃខែឆ្នាំកំណើត ប្រភេទថ្នាំវ៉ាក់សាំងដែលយើងចាក់ ទីតាំងកន្លែងចាក់ និងថ្ងៃខែឆ្នាំដែលយើងទទួលវ៉ាក់សាំង ដែលអាចធ្វើឲ្យងាយស្រួលមានការបន្លំអត្តសញ្ញាណ។
២. បោះចោល ឬធ្វើឲ្យបាត់កាត៖ សម្រាប់អ្នកដែលចាក់វ៉ាក់សាំងលើកទី១រួច ដើម្បីចាក់លើកទី២បាន ត្រូវបង្ហាញកាតឲ្យអ្នករៀបចំពិនិត្យ។ បើសិនយើងមិនមានបង្ហាញកាតទេនោះ ក្រុមគ្រូពេទ្យនឹងបដិសេធមិនចាក់ឲ្យយើងទេ។ ណាមួយ កាតវ៉ាក់សាំងកូវីដ-១៩ អាចចាំបាច់ពេលយើងធ្វើដំណើរ ឬចូលរួមកន្លែងមនុស្សច្រើន។ល។
៣. ចាក់វ៉ាក់សាំងដទៃក្រោយវ៉ាក់សាំងកូវីដ-១៩៖ CDC អាមេរិកបានណែនាំឲ្យចាំរយៈពេល១៤ថ្ងៃ ក្រោយចាក់វ៉ាក់សាំងកូវីដ-១៩សិន សឹមចាក់វ៉ាក់សាំងផ្សេង ព្រោះនៅមិនទាន់មានការសិក្សាគ្រប់គ្រាន់ដើម្បីបញ្ជាក់ពីប្រតិកម្មរបស់វ៉ាក់សាំងកូវីដ-១៩ និងវ៉ាក់សាំងដទៃទៀតនៅឡើយ។

៤. ញ៉ាំថ្នាំមុនមុនចាក់វ៉ាក់សាំង៖ មានគ្នាយើងខ្លះ ញ៉ាំថ្នាំបំបាត់ការឈឺចាប់ ឬបញ្ចុះកម្ដៅមុនពេលចាក់វ៉ាក់សាំង ដើម្បីបង្ការអាការៈក្រោយចាក់វ៉ាក់សាំង។ ប៉ុន្តែអ្នកជំនាញហាមដាច់ខាត មិនត្រូវធ្វើបែបនេះទេ ព្រោះអ្នកវិទ្យាសាស្ត្រមិនទាន់ដឹងថា តើវាឆ្លើយតបនឹងកូវីដ-១៩ ដូចម្ដេច ឬអាចប៉ះពាល់ដល់ប្រសិទ្ធភាពវ៉ាក់សាំងឬយ៉ាងណានោះទេ។
៥.ឈប់ពាក់ម៉ាស់ ឬរក្សាគម្លាត៖ ត្បិតតែយើងចាក់វ៉ាក់សាំងបានមែន តែវាមិនទាន់បង្កើតអង់ទីករការពាររាងកាយបានភ្លាមទេ ទាល់តែរង់ចាំ១៤ថ្ងៃសិន ឬលើសនេះ ទើបរាងកាយមានលទ្ធភាពប្រឆាំងនឹងវីរុសកូវីដ-១៩បាន។ ហេតុនេះហើយ ទោះចាក់វ៉ាក់សាំងហើយក៏ដោយ ក៏មិនត្រូវឈប់ពាក់ម៉ាស់ ឬមិនអនុវត្តតាមការណែនាំរបស់ក្រសួងសុខាភិបាលដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ សារៈសំខាន់នៃកាតចាក់វ៉ាក់សាំងកូវីដ-១៩ យើងអាចមិនទាន់ដឹង

ចុចអាន៖ អ្នកជំនាញទូន្មានឱ្យតមភេសជ្ជៈផ្អែមៗ ក្រោយចាក់វ៉ាក់សាំងកូវីដ-១៩ ព្រោះ…

Related Topics: