ជីវិតកម្សាន្ដ

បាត់មុខពីសិល្បៈជិត២០ឆ្នាំ ស្រាប់តែឃើញលក់គ្រឿងម្ជូរតាមចិញ្ចើមផ្លូវ

Published

1 month ago

January 26, 2021

តារាកំប្លែងជើងចាស់មាឌល្អិតលោកតា ប៉ិគក់ បន្ទាប់ពីស្ងប់ស្ងាត់បាត់មុខពីសិល្បៈអស់មួយរយៈដែលកន្លងមកធ្លាប់លេចឮដំណឹងថា លោកតាបានធ្លាក់ខ្លួនឈឺ ហើយជួបនូវការលំបាកនោះ ពេលនេះក៏មានប្រភពបង្ហើបថា សព្វថ្ងៃលោកតាកំពុងតែប្រកបអាជីពលក់គ្រឿងម្ជូរនៅតាមចិញ្ចើមផ្លូវយ៉ាងសាមញ្ញ។

បើផ្អែកតាមការបង្ហោះរូបភាពដែលតារាកំប្លែងល្បីឈ្មោះលោកតា ប៉ិគក់ កំពុងអង្គុយលក់គ្រឿងម្ជូរទាំងទឹកមុខកម្សត់គួរឲ្យអាណិត ត្រូវបានប្រភពលើកឡើងដោយខ្លីថា សូមអ្នកសិល្បៈជួយគាំទ្រគាត់ផង។ ខណៈភ្លាមៗនោះក៏មានការសួរនាំជាច្រើនអំពីទីតាំង និងកន្លែងដែលលោកតា ប៉ិគក់ កំពុងលក់សព្វថ្ងៃផងដែរ។

កម្ពុជាថ្មី នៅរសៀលថ្ងៃទី២៥ ខែមករា ឆ្នាំ២០២១នេះ បានធ្វើការភ្ជាប់ទំនាក់ទំនងតាមប្រព័ន្ធទូរសព្ទ ដើម្បីសុំការសួរនាំពីតារាកំប្លែងលោកតា ប៉ិគក់ ដែរ តែមិនអាចទាក់ទងបានទេ។ ដោយឡែកបើតាមការបញ្ជាក់បន្ថែមពីប្រភពខាងលើបានឲ្យដឹងតាមបណ្តាញសង្គមហ្វេសប៊ុកថា លោកតា ប៉ិគក់ បច្ចុប្បន្នលក់គ្រឿងម្ជូរ ម្តុំផ្លូវ៣០៧ កែង៥៦៦។

គិតមកទល់ពេលនេះ លោកតា ប៉ិគក់ បានផ្អាកការសម្តែងរយៈពេលជាង១០ឆ្នាំមកហើយ ដោយសារតែមានជំងឺ និងមានសភាពទ្រុឌទ្រោមជាងមុន ។

តារាកំប្លែង ប៉ិគក់ មានឈ្មោះដើម ស៊ុយ ចាន់ មានស្រុកកំណើតនៅខេត្តបាត់ដំបង ពេលនេះមានអាយុប្រមាណជាង៧០ឆ្នាំ និងមានកូនស្រីចំនួន៣នាក់។ លោកតា ប៉ិគក់ ចូលបម្រើវិស័យសិល្បៈតាំងពីទសវត្សឆ្នាំ៦០ និងមានឈ្មោះល្បីបោះសំឡេងផងដែរ៕

អត្ថបទ ៖ ចាន់រ៉ា