Miss Tourism 2023 សេន ស្រីឡៃ តំណាងកម្ពុជាកាន់ទង់ជាតិទៅប្រកួតនៅម៉ាឡេស៊ី

បវរកញ្ញាតំណាងកម្ពុជាកញ្ញា សេន ស្រីឡៃ ជា Miss TourismCambodia 2023បាននាំយកទង់ជាតិអរិយធម៌វប្បធម៌ដ៏ល្អផូផង់របស់ខ្មែរចេញទៅប្រកួតនៅលើឆាកអន្តរជាតិនៃប្រទេសម៉ាឡេស៊ីដែលមានបវរកញ្ញាជាច្រើនប្រទេសចូលរួមបង្អូតសម្រស់។

ការចេញដំណើររបស់ស្រីស្អាតកម្ពុជាកញ្ញា សេន ស្រីឡៃ កាលពីថ្ងៃទី១០ ខែវិច្ឆិកា ឆ្នាំ២០២៣ គេឃើញមានការលើកទឹកចិត្ត និងការជូនដំណើរពីសំណាក់អ្នកគាំទ្រព្រមទាំងមិត្តភក្តិ និងក្រុមគ្រួសារមួយចំនួន។ ក្នុងដំណើរចេញទៅប្រកួតនេះ គឺនាងបានត្រៀមខ្លួនរួចរាល់សម្រាប់ព្រឹត្ដិការណ៍លក្ខណៈអន្ដរជាតិនោះ។

អ្វីដែលកត់សម្គាល់ទៀតនោះ កញ្ញា សេន ស្រីឡៃ មិនត្រឹមតែបង្ហាញភាពជឿជាក់ដោយស្នាមញញឹមនោះទេ នាងក៏បានរំលេចសម្រស់ជាមួយការបង្ហាញទង់ជាតិកម្ពុជាដោយភាព​ថ្លៃថ្នូរ​បង្ហាញភាពជាកុលស្រ្តីទៅកាន់​ឆាកអន្តរជាតិ។ កន្លងមកនាងក៏លេចមុខស្នើសុំឲ្យមានការផ្តល់កំលាំងចិត្តពីមហាជនអ្នកគាំទ្រ និងប្រជាជនកម្ពុជាផងដែរ។

សូមបញ្ជាក់ដែរថា ការចេញទៅប្រកួតរបស់ សេន ស្រីឡៃ នៅក្នុងកម្មវិធី Miss TourismInternational 2023 នេះនឹងនាំយកប្រទេសកម្ពុជាទង់ជាតិរបស់កម្ពុជា វប្បធម៌ អរិយធម៌ ដ៏ស្រស់ផូផង់របស់កម្ពុជា ទៅបង្ហាញនៅលើឆាកអន្តរជាតិផងដែរ។ ជាការកត់សម្គាល់មុនពេលចេញទៅប្រកួតស្រី ឡៃ បានត្រៀមខ្លួនរួចជាស្រេចពោរពេញដោយភាពជឿជាក់ក្លាហានក្នុងនាមបវរកញ្ញាដែលតំណាងកម្ពុជា ចូលរួមប្រកួតលើឆាកអន្តរជាតិឆ្នាំនេះ៕

អត្ថបទ៖ ចាន់រ៉ា