ផ្ទុយពីប្រទេសដទៃ ឥណ្ឌូនេស៊ីនឹងចាក់វ៉ាក់សាំងកូវីដ លើក្រុមមនុស្សប្រភេទនេះមុនគេ

ប្រទេសឥណ្ឌូនេស៊ីនឹងចាក់វ៉ាក់សាំងប្រឆាំងកូវីដ ១៩ ដល់ប្រជាជនវ័យក្មេងដែលមានអាយុធ្វើការមុនមនុស្សចាស់ផ្ទុយពីពិភពលោកដែលភាគច្រើនគ្រោងនឹងចាក់វ៉ាក់សាំងដល់មនុស្សវ័យចំណាស់ងាយរងគ្រោះមុនគេ ។

ប្រទេសទី ១ នៅអាស៊ីអាគ្នេយ៍ដែលទទួលការចាក់វ៉ាក់សាំងកូវីដ ១៩ មួយនេះនឹងផ្តោតលើការចាក់ថ្នាំបង្ការដល់អ្នកដែលមានអាយុចន្លោះពី ១៨ ទៅ ៥៩ ឆ្នាំដោយចាប់ផ្តើមពីអ្នកដែលធ្វើការនៅជួរមុខនៃរោគរាតត្បាតដូចជា បុគ្គលិកសុខាភិបាល ប៉ូលិស និងយោធា ខណៈអង់គ្លេសបានចាប់ផ្តើមកម្មវិធីចាក់វ៉ាក់សាំងដំបូងគេបង្អស់នៅលើពិភពលោកលើស្ត្រីអាយុ ៩១ ឆ្នាំកាលពីសប្តាហ៍មុនស្របតាមបណ្តាប្រទេសដទៃទៀតរួមជាមួយនឹងអាមេរិកបានចាប់ផ្តើមកម្មវិធីចាក់វ៉ាក់សាំងលើមនុស្សចាស់នៅសប្តាហ៍នេះ ។

ទន្ទឹមនោះនៅពេលចំនួនអ្នកស្លាប់ដោយសារជំងឺរាតត្បាតនៅតែបន្តកើនឡើង រដ្ឋាភិបាលកំពុងតែដោះស្រាយជាមួយនឹងសំណួរថាតើអ្នកណាគួរចាក់វ៉ាក់សាំងមុន ខណៈក្រុមហ៊ុនកំពុងប្រញាប់ប្រញាល់ឆ្លងកាត់ការយល់ព្រម ។

លោក Amin Soebandrio នាយកវិទ្យាស្ថានជីវវិទ្យា Eijkman នៅក្រុងហ្សាកាតាបាននិយាយថា “គោលបំណងរបស់យើងគឺចាក់ដល់មនុស្សវ័យក្មេងដែលមានភាពស៊ាំអាយុចន្លោះ ១៨ ទៅ ៥៩ ឆ្នាំ ។ បន្ទាប់មកការចាក់នោះគឺធ្វើឡើងជាមួយនឹងក្រុមមនុស្សដែលសកម្ម និងប្រឈមបំផុតដើម្បីការពារក្រុមដទៃទៀត ។ វាមិនមានប្រសិទ្ធិភាពទេនៅពេលដែលយើងប្រើចំនួនវ៉ាក់សាំងមានកំណត់របស់យើងលើមនុស្សវ័យចំណាស់” ។

ស្របពេលជាមួយគ្នានេះរដ្ឋាភិបាលបានកំណត់គោលដៅនូវវ៉ាក់សាំងចំនួន ២៤៦ លានដូសដើម្បីចាក់ទៅដល់ប្រជាជនចំនួន ១០៧ លាននាក់ ឬ ៦៧ ភាគរយនៃក្រុមមនុស្សអាយុចន្លោះ ១៨ ឆ្នាំទៅ ៥៩ ឆ្នាំហើយមានតែ ៤០ ភាគរយប៉ុណ្ណោះដែលនឹងត្រូវចាក់នៃប្រជាជនអស់ ។

គួរបញ្ជាក់ថា រដ្ឋាភិបាលឥណ្ឌូនេស៊ីបានបញ្ជាទិញវ៉ាក់សាំងចំនួន ១៥៥.៥ លានដូសពីក្រុមហ៊ុនចិន Sinovac និងក្រុមហ៊ុនអាមេរិក Novavax ជាមួយនឹងការបញ្ជាទិញចំនួន ១១៦ លានផ្សេងទៀតពីក្រុមហ៊ុនអាមេរិក Pfizer ក្រុមហ៊ុនអង់គ្លេស AstraZeneca និងកម្មវិធីវ៉ាក់សាំង COVAX របស់ WHO ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ តំបន់មួយក្នុងប្រទេសចិនត្រៀមចាក់វ៉ាក់សាំងកូវីដ យកលុយពីពលរដ្ឋ

ចុចអាន ៖ រោងចក្រមួយធ្វើគ្រឿងទេសពីអាចម៍លានិងអាស៊ីដនៅប្រទេស ឥណ្ឌា