ព័ត៌មានអន្ដរជាតិ

រកឃើញជនចំណាកស្រុក ៤៦នាក់ស្លាប់ ក្នុងរថយន្តដឹកទំនិញនៅរដ្ឋ Texas

បានផុស

២ years មុន

នៅ

ថ្ងៃអង្គារ ២៨ មិថុនា ២០២២

ដោយ

មនុស្សចំនួន៤៦នាក់ ត្រូវបានគេរកឃើញ ស្លាប់ក្នុងរថយន្តដឹកទំនិញមួយគ្រឿង ដែលគេបោះបង់ចោលនៅជាយក្រុង San Antonio នៃរដ្ឋ Texas នៅថ្ងៃអង្គារទី ២៨ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីពន្លត់អគ្គិភ័យម្នាក់បាននិយាយថា មនុស្សចំនួន ១៦ នាក់ ក្នុងនោះមានកុមារ ៤ នាក់ ក៏ត្រូវបាន បញ្ជូនទៅមន្ទីរពេទ្យផងដែរ។

អ្នករស់រានមានជីវិត មានអាការក្តៅរាងកាយដូចភ្លើង ហើយមានបញ្ហាដាច់សរសៃឈាមខួរក្បាលនិងអស់កម្លាំងខ្សោះខ្លួន។

ទីក្រុង San Antonio ដែលមានចម្ងាយ ២៥០គីឡូម៉ែត្រ ពីព្រំដែនអាមេរិក-ម៉ិកស៊ិក គឺជាផ្លូវឆ្លងកាត់ដ៏សំខាន់សម្រាប់អ្នករត់ពន្ធមនុស្ស។

អ្នកជួញដូរមនុស្ស តែងតែប្រើប្រាស់រថយន្តដឹកទំនិញ ដើម្បីដឹកជញ្ជូនជនចំណាកស្រុកមិនមានឯកសារ បន្ទាប់ពីជួបពួកគេនៅតំបន់ដាច់ស្រយាល ពេលដែលពួកគេព្យាយាមឆ្លងចូលទៅក្នុងសហរដ្ឋអាមេរិក។

ប្រធានក្រុមពន្លត់អគ្គិភ័យទីក្រុង San Antonio លោក Charles Hood បានប្រាប់អ្នកយកព័ត៌មានថា ក្រុមសង្គ្រោះបន្ទាន់ ដំបូងបានទៅដល់កន្លែងកើតហេតុនៅម៉ោងប្រហែល ១៨:០០ (ម៉ោងក្នុងស្រុក) បន្ទាប់ពីទទួលរបាយការណ៍អំពីសាកសពមនុស្ស។ លោកបន្ថែមថា រថយន្តដែលអ្នកបើកទុកចោលនោះ គឺគ្មានម៉ាស៊ីនត្រជាក់ និងគ្មានទឹកផឹកនៅខាងក្នុងនោះទេ។

អាកាសធាតុនៅទីក្រុង San Antonio គឺក្តៅខ្លាំងបំផុតក្នុងរដូវនេះ ដោយសីតុណ្ហភាពនៅទីនោះ ឡើងដល់ ៣៩.៤អង្សាសេ កាលពីថ្ងៃចន្ទ។

ស្របពេលជាមួយគ្នានោះ រដ្ឋមន្ត្រីការបរទេសម៉ិកស៊ិក លោក Marcelo Ebrard បាននិយាយថា ជនជាតិហ្គាតេម៉ាឡាពីរនាក់ ស្ថិតក្នុងចំណោមអ្នកដែលត្រូវបានបញ្ជូនទៅមន្ទីរពេទ្យ។ សញ្ជាតិរបស់ជនរងគ្រោះផ្សេងទៀត មិនទាន់ដឹងច្បាស់នៅឡើយទេ។

មនុស្សបីនាក់កំពុងត្រូវបានឃុំខ្លួននៅក្នុងមន្ទីរឃុំឃាំង ហើយការស៊ើបអង្កេតត្រូវបានប្រគល់ទៅឲ្យភ្នាក់ងារសហព័ន្ធ៕

ប្រែសម្រួល៖ Vann Vann

ប្រភព៖ BBC

ចុចអាន៖ ជនចំណាកស្រុក ១២ នាក់ ជាប់ក្នុងព្រំដែន តួកគី និង ក្រិក ត្រជាក់រហូតស្លាប់