វៀតណាម គ្រោងឈប់ឲ្យម៉ូតូចាស់ៗធ្វើចរាចរណ៍លើដងផ្លូវ

នាយករដ្ឋមន្រ្តីវៀតណាមលោក Nguyen Xuan Phuc បានស្នើឲ្យក្រសួងដឹកជញ្ជូនធ្វើការជាមួយមូលដ្ឋាននានា ដើម្បីយកយានយន្តចាស់ៗដែលមិនត្រូវតាមស្តង់ដាចេញពីដងផ្លូវឈប់ឲ្យធ្វើចរាចរណ៍។

ការបញ្ចេញផ្សែងនិងសំឡេងឮពីម៉ូតូចាស់ៗ ត្រូវបានគេស្តីបន្ទោសថាជាមូលហេតុមួយនៃការបំពុលបរិយាកាសនិងហានិភ័យសុវត្ថិភាពនៅក្នុងទីក្រុងធំៗដូចជាទីក្រុង ហាណូយនិងហូជីមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីគណៈកម្មាធិការប្រជាជនក្រុងហាណូយបានបង្ហាញថា មានម៉ូតូជាង៥.៧លានគ្រឿងកំពុងប្រើប្រាស់នៅក្នុងទីក្រុងនេះ ដោយជិតពាក់កណ្តាលគឺជាម៉ូតូចាស់ដែលផលិតមុនឆ្នាំ២០០០។

មានរថយន្តជាង៧៣ម៉ឺនគ្រឿងនិងយានយន្តជាច្រើនគ្រឿងមកពីខេត្តផ្សេងៗ ដែលធ្វើដំណើរចូលមកក្នុងទីក្រុងនេះជាប្រចាំ ដោយបង្កឲ្យមានការបំពុលបរិស្ថានយ៉ាងខ្លាំង។

ម៉ូតូក៏មានចំណែកពី៨០ទៅ៩០ភាគរយនៃកាបូនម៉ូណូអុកស៊ីតនិងអ៊ីដ្រូកាបូនសរុប និង៥០ភាគរយនៃអុកស៊ីដអាសូតសរុប ដែលបញ្ចេញពីយានយន្តតាមដងផ្លូវទាំងអស់ផងដែរ។

យានយន្តចាស់ៗបានបញ្ចេញឧស្ម័នពុលច្រើនជាងកម្រិតយានយន្តដែលថែរក្សាទុកជាប្រចាំ។

ការបំពុលទាំងនេះ បានប៉ះពាល់យ៉ាងខ្លាំងដល់គុណភាពនៃបរិយាកាសខ្យល់ក្នុងទីក្រុងនិង ប៉ះពាល់ផ្ទាល់ដល់សុខភាពមនុស្ស។

កាលពីឆ្នាំ២០១០ អតីតនាយករដ្ឋមន្រ្តី Nguyen Tan Dung បានចេញគម្រោងមួយដើម្បីគ្រប់គ្រងការបំភាយចេញពីម៉ូតូនៅតាមទីក្រុងនានាទូទាំងប្រទេស។

ចាប់ពីខែកញ្ញាឆ្នាំ២០២០ ទីក្រុងហាណូយក៏បានអនុវត្តគម្រោងសាកល្បងមួយលើការវាស់វែងការបំភាយឧស្ម័នផងដែរ។

ក្រោមកម្មវិធីនេះ ម្ចាស់ម៉ូតូមានអាយុលើសពី១៨ឆ្នាំដែលមិនបំពេញតាមស្តង់ដានៃការបំភាយ អាចដាក់ពាក្យសុំប្រាក់ពី២ទៅ៤លានដុងដើម្បីទិញយានយន្តថ្មី។

ថវិកានេះនឹងត្រូវផ្តល់ដោយសមាគមអ្នកផលិតម៉ូតូវៀតណាម។

ប៉ុន្តែរហូតមកដល់ពេលនេះ កម្មវិធីនេះមិនទាន់ត្រូវបានអនុវត្តនៅឡើយទេ ព្រោះវិធានការបែបនេះតម្រូវឲ្យមានការចំណាយសង្គមនិងនីតិវិធីរដ្ឋបាលមួយចំនួនដែលមិនត្រូវបានបញ្ជាក់នៅក្នុងច្បាប់៕

ប្រែសម្រួលដោយ៖ Vann Vann

ប្រភព៖ Vietnam Plus

ចុចអាន៖ បុរសវៀតណាមត្រូវរថយន្តបុកស្លាប់ អូសសពចម្ងាយ ៦០គីឡូម៉ែត្រ