​ជនជាតិ​រ៉ូហ៊ីងយ៉ា១៨ម៉ឺនាក់ដែល​ភៀសខ្លួនទៅបង់ក្លាដែស​ទំនង​អា​ចធ្វើមាតុភូមិនិវត្តន៍ឆាប់ៗ​

រដ្ឋាភិបាលបង់ក្លាដែស បានឲ្យដឹងថា ជនភៀសខ្លួនរ៉ូហ៊ីងយ៉ាចំនួន១៨ម៉ឺននាក់ ដែលរស់នៅក្នុងប្រទេសបង់ក្លាដែស ចាប់តាំងពីបានភៀសខ្លួនចេញពីប្រទេសកំណើតរបស់ពួកគេ មានសិទ្ធិវិលត្រឡប់ទៅផ្ទះរបស់ពួកគេវិញ។ នេះបើយោងតាមការចេញផ្សាយរបស់សារព័ត៌មាន Al Jazeera កាលពីថ្ងៃទី០៤ខែមេសា។

ការប្រកាសរបស់រដ្ឋាភិបាលបង់ក្លាដែសនេះធ្វើឡើង បន្ទាប់ពីកិច្ចប្រជុំរវាង លោក Khalilur Rahman តំណាងជាន់ខ្ពស់នៃរដ្ឋាភិបាលបណ្តោះអាសន្នរបស់ប្រទេសបង់ក្លាដែស ដឹកនាំដោយម្ចាស់ជ័យលាភីណូបែលលោក Muhammad Yunus និងលោក Than Swe ឧបនាយករដ្ឋមន្ត្រី និងជារដ្ឋមន្ត្រីការបរទេសមីយ៉ាន់ម៉ា នៅខាងក្រៅកិច្ចប្រជុំកំពូល BIMSTEC នៅទីក្រុងបាងកក។

កិច្ចពិភាក្សានៅទីក្រុងបាងកកនេះ បានផ្តល់នូវរបកគំហើញដែលអាចកើតមាននៅក្នុងដំណើរការធ្វើមាតុភូមិនិវត្តន៍ដែលបានជាប់គាំងជាយូរមកហើយ ខណៈជនភៀសខ្លួនរ៉ូហ៊ីងយ៉ាជាច្រើននិយាយថា ពួកគេទាំងអស់គួរតែត្រូវបានអនុញ្ញាត​ឱ្យត្រឡប់ទៅផ្ទះវិញ។

ឈ្មោះចំនួន១៨០០០០នាក់នេះ គឺជាផ្នែកមួយនៃបញ្ជីឈ្មោះជនជាតិរ៉ូហ៊ីងយ៉ា ៨០ម៉ឺននាក់ ដែលបង់ក្លាដែសបានបញ្ជូនទៅកាន់ប្រទេសមីយ៉ាន់ម៉ាជាក្រុមចំនួន៦ ចន្លោះឆ្នាំ ២០១៨ និង ២០២០។

មីយ៉ាន់ម៉ាក៏បានចង្អុលបង្ហាញថា ការផ្ទៀងផ្ទាត់ចុងក្រោយនៃជនភៀសខ្លួន៧ម៉ឺននាក់ផ្សេងទៀតកំពុងរង់ចាំការពិនិត្យបន្ថែមលើរូបថត និងព័ត៌មានលម្អិតអំពីអត្តសញ្ញាណ។ ប្រទេសមីយ៉ាន់ម៉ាក៏បានសន្យានឹងពន្លឿនដំណើរការផ្ទៀងផ្ទាត់ចំពោះឈ្មោះដែលនៅសល់ចំនួន ៥៥ម៉ឺននាក់នៅក្នុងបញ្ជីដើម ខណៈមិន​មាន​ការ​អត្ថាធិប្បាយ​ភ្លាមៗ​ពី​រដ្ឋាភិបាល​មីយ៉ាន់ម៉ា​អំពី​លទ្ធផល​នៃ​កិច្ច​ចរចា​ក្រុង​បាងកក​នោះ​ទេ។

ជនភៀសខ្លួនរ៉ូហ៊ីងយ៉ាម្នាក់បានប្រាប់​ Reuters ថា៖«ពួកគេចង់បានដំណោះស្រាយមួយ ដោយមីយ៉ាន់ម៉ាត្រូវតែយកយើងទាំងអស់គ្នាទៅវិញ មិនមែនត្រឹមតែមួយចំនួនដែលត្រូវបានជ្រើសរើសនោះទេ ហើយមីយ៉ាន់ម៉ាត្រូវតែធានាថាពួកគេត្រឡប់ទៅវិញជាមួយនឹងសិទ្ធិពេញលេញ សេចក្តីថ្លៃថ្នូរ និងសញ្ជាតិ។ បើគ្មានដំណោះស្រាយនេះនោះ ដំណើរការនេះគ្មានន័យអ្វីសម្រាប់ពួកគេទេ»។

សូមបញ្ជាក់ថាប្រជាជនរ៉ូហ៊ីងយ៉ាជាងមួយលាននាក់ត្រូវបានប្រមូលផ្តុំទៅក្នុងជំរុំនៅភាគអាគ្នេយ៍ប្រទេសបង់ក្លាដែស ដែលជាកន្លែងតាំងទីលំនៅជនភៀសខ្លួនដ៏ធំបំផុតរបស់ពិភពលោក។ ភាគច្រើនបានភៀសខ្លួនចេញពីការបង្រ្កាបដ៏ឃោរឃៅដោយយោធាមីយ៉ាន់ម៉ាក្នុងឆ្នាំ ២០១៧។

ជនជាតិរ៉ូហ៊ីងយ៉ាប្រហែល ៧០០០០ នាក់បានឆ្លងចូលទៅក្នុងប្រទេសបង់ក្លាដែសកាលពីឆ្នាំមុន ដោយមនុស្សជាច្រើនបានភៀសខ្លួនចេញពីភាពអត់ឃ្លាន និងអំពើហិង្សាកាន់តែអាក្រក់ៗនៅក្នុងរដ្ឋរ៉ាឃីនរបស់ប្រទេសមីយ៉ាន់ម៉ា៕

អត្ថបទ៖ ប៊ុន សុភាព