កីឡា

ចេញទៅ អាមេរិក លើកដំបូង ពេជ្រ សម្បត្តិ ប៉ះជើងខ្លាំង ធ្លាប់ជួប Rodtang

បានផុស

២ ខែ មុន

នៅ

ថ្ងៃសៅរ៍ ៥ មេសា ២០២៥

ដោយ

អ្នកប្រដាល់កម្ពុជារហស្សនាមក្របីព្រៃ ពេជ្រ សម្បត្តិ ជាអ្នកលេងគុនខ្មែរម្នាក់ ក្នុងចំណោមអត្តពលិកគុនខ្មែរ៤នាក់ដែលរួមមាន ធន់ រិទ្ធី, រឿង សុភ័ណ្ឌ និងកីឡាការិនី អេ យ៉ានុត បានចេញទៅប្រកួតនៅ សហរដ្ឋអាមេរិក ដែលគ្រោងប្រកួតនៅថ្ងៃទី១៣ ខែមេសា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាសភាពគូប្រកួតរបស់កីឡាករ កីឡាការិនីកម្ពុជា ទាំង ៤ រូប បានប្រកាសរួចរាល់ហើយដែរ ប៉ុន្តែកីឡាករគួរឲ្យចាប់អារម្មណ៍បំផុត គឺដៃគូរបស់ ពេជ្រ សម្បត្តិ ជាកីឡាករសញ្ជាតិ ម៉ិកស៊ិក មានឈ្មោះថា Edgar Tabares។

យោងតាមប្រវត្តិត្រួសៗ ដែលដកស្រង់ចេញពីបណ្តាញសង្គម អ្នកប្រដាល់សញ្ជាតិ ម៉ិកស៊ិក រូបនេះ ធ្លាប់ឆ្លងកាត់ការប្រកួតបានចំនួន ៤២ ដង គឺ ឈ្នះ ៣២ ដង ស្មើ ១ ដង និងចាញ់ ៩ ដង។ អ្វីដែលគួរឱ្យចាប់អារម្មណ៍ គឺ Edgar Tabares ធ្លាប់បានឡើងសង្វៀន ONE បានចំនួន ៣ ដង។ ក្នុងនោះ រូបគេធ្លាប់បានជួបអ្នកប្រដាល់លំដាប់លេខ១របស់ថៃ Rodtang ផងដែរ ប៉ុន្តែលទ្ធផលទាំង ៣ ដងនោះ គឺបរាជ័យទាំងអស់។

Poster ការប្រកួតរវាង Tabares និង Rodtang

រឿងគួរឲ្យចាប់អារម្មណ៍មួយទៀត គឺ Tabares ធ្លាប់បានឈ្នះខ្សែក្រវាត់ WBC ២ ដង និងខ្សែក្រវាត់ IFMA ផងដែរ។ ចំណុចពិសេសរបស់ អ្នកប្រដាល់វ័យ ២៨ ឆ្នាំរូបនេះ មានទម្ងន់ជើងទាត់ធ្ងន់ ចេញ-ចូលលឿន ហើយអាវុធដ៏គ្រោះថ្នាក់របស់គេ គឺកែងបក។

គួរដឹងថា នេះជាប្រវត្តិសាស្ត្រសម្រាប់គុនខ្មែរហើយ ដែលបានចេញទៅប្រកួតនៅ សហរដ្ឋអាមេរិក ដែលជាព្រឹត្តិការណ៍ប្រកួតគុនខ្មែរទ្រង់ទ្រាយធំ និងបានចាប់ដៃគូប្រកួតជាមួយស្ថាប័នប្រដាល់ WCK ដោយប្រើឈ្មោះ និងច្បាប់គុនខ្មែរទៀតផង៕