ផ្ទុះគ្រាប់បែកក្បែរស្ថានទូតមីយ៉ាន់ម៉ានៅថៃ បន្ទាប់ពីបាតុកម្មប្រឆាំងរដ្ឋប្រហារ

សម្លេងផ្ទុះចំនួនពីរត្រូវបានគេឮភ្លាមៗ បន្ទាប់ពីក្រុមបាតុករប្រឆាំងរដ្ឋប្រហារមីយ៉ាន់ម៉ា និងក្រុមអ្នកស្ម័គ្រចិត្ត (WeVo) បានបញ្ចប់ការប្រមូលផ្តុំរបស់ពួកគេកាលពីល្ងាចថ្ងៃ ចន្ទ ទី៨ ខែកុម្ភៈ និងបានបំបែកចេញពីមុខស្ថានទូតមីយ៉ាន់ម៉ាប្រចាំប្រទេសថៃនៅលើផ្លូវ Sathon Nua ក្នុងសង្កាត់ Bang Rak ក្រុងបាងកក ។

មិនមានរបាយការណ៍អំពីការរងរបួសនោះទេ បន្ទាប់ពីឧប្បត្តិហេតុនេះ ។

អ្នកនាំពាក្យកងរាជអាវុធហត្ថថៃលោក Yingyot Thepjamnong បាននិយាយថា “អង្គភាពកម្ចាត់ជាតិផ្ទុះ (EOD) បានធ្វើការស៊ើបអង្កេតនៅកន្លែងកើតហេតុ ហើយបានរកឃើញបំណែកនៃវត្ថុធាតុដើមពីគ្រឿងផ្ទុះតូចៗបញ្ជាដោយតេឡេស្រដៀងនឹងផាវគ្រាប់បែក” ។

លោកបាននិយាយថា “ផាវគ្រាប់បែកមានកាំផ្ទុះតូច ហើយមិនគំរាមកំហែងដល់អាយុជីវិតទេ ។ យើងសង្ស័យថា អ្នកបោះផាវគ្រាប់បែកមានគោលបំណងបង្កើតការភាន់ច្រឡំ” ។

លោកបន្តថា “ប៉ូលិសចង់ស្នើឲ្យប្រជាជនធ្វើជាភ្នែក និងត្រចៀករបស់យើងក្នុងអំឡុងពេលដ៏រសើបនេះ ។ ប្រសិនបើអ្នកឃើញជនសង្ស័យ ឬឧប្បត្តិហេតុគួរឲ្យសង្ស័យ សូមទូរស័ព្ទទៅប៉ូលិសភ្លាមៗ” ។

ទន្ទឹមនោះលោកឧត្តមសេនីយ៍ទោ Phukphong Phongpetra ស្នងការប៉ូលិសក្រុងនឹងធ្វើសន្និសីទកាសែតនៅរសៀលថ្ងៃអង្គារនេះទាក់ទងនឹងឧប្បត្តិហេតុ និងដំណើរការនៅក្នុងការស៊ើបអង្កេតនេះ ៕

ប្រែសម្រួលដោយ ៖ ជីវ័ន្ត

ប្រភព ៖ AsiaOne

ចុចអាន ៖ បាតុករមួយចំនួនរងរបួស បន្ទាប់ពីប៉ូលិសមីយ៉ាន់ម៉ាបាញ់គ្រាប់ជ័រ

ចុចអាន ៖ កងទ័ពមីយ៉ាន់ម៉ា គំរាមបាញ់គ្រាប់ពិតលើបាតុករ