ប៉ូលិសថៃ រកឃើញហើយ! មូលហេតុនាំឲ្យឆេះរថយន្តដឹកសិស្ស 

ទីបំផុត ប៉ូលិសថៃ បានសន្មត់ថា ករណីឆេះរថយន្តដឹកសិស្សដែលឆក់យកជីវិតក្មេងៗចំនួន២០នាក់និងគ្រូបង្រៀន៣នាក់កាលពីថ្ងៃអង្គារទី១ខែតុលាឆ្នាំ២០២៤ គឺបណ្តាលមកពីធ្លាយហ្គាស់ មិនមែនផ្ទុះកង់ដូចការអះអាងរបស់តៃកុងនោះទេ។ នេះបើតាមការចុះផ្សាយរបស់ Bangkok Post នៅថ្ងៃសៅរ៍ទី៥ខែតុលាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការរកឃើញរបស់ប៉ូលិស, មានធុងហ្គាស់ចំនួន១១ធុង ត្រូវបានច្នៃដាក់ក្នុងរថយន្ត ប៉ុន្តែក្នុងនោះមានតែ៦ធុងប៉ុណ្ណោះដែលត្រូវបានចុះបញ្ជីត្រឹមត្រូវខណៈ៥ធុងទៀត ត្រូវគេលួចដាក់។

លោក Chirute Visalachitra អគ្គនាយក​នៃនាយកដ្ឋាន​ដឹកជញ្ជូន​ផ្លូវគោក​ បានប្រាប់អ្នកសារព័ត៌មានថា តាមការរកឃើញ, ហ្គាស់គឺធ្លាយចេញពីធុងមួយ ដែលមិនមានការចុះបញ្ជីនិងមិនត្រូវបានត្រួតពិនិត្យដោយវិស្វករ ខណៈបច្ចុប្បន្ន ប៉ូលិសកំពុងធ្វើការជាមួយនាយកដ្ឋាន ដើម្បីកំណត់ថាអ្នកណាជាអ្នកទទួលខុសត្រូវលើរឿងនេះ។

ស្របពេលជាមួយគ្នានោះ បើតាមការបញ្ជាក់ពីរដ្ឋមន្ត្រីក្រសួងដឹកជញ្ជូន លោក Suriya Jungrungreangkit, អាជ្ញាធរថៃ បានរឹបអូសយករថយន្តដឹកអ្នកដំណើរចំនួន៥គ្រឿងទៀតពីក្រុមហ៊ុនទេសចរណ៍ Shinbutr Tour ដែលជាម្ចាស់រថយន្តដែលឆេះ បន្ទាប់ពីរកឃើញថា រថយន្តនីមួយៗ សុទ្ធតែមានដំឡើងធុងហ្គាស់ដល់ទៅ១១ ខណៈច្បាប់កំណត់ត្រឹម៦ធុងប៉ុណ្ណោះ។

លោកបញ្ជាក់ថា ក្រុមហ៊ុនមិនបានបញ្ជូនរថយន្តទៅការិយាល័យដឹកជញ្ជូន​ផ្លូវគោកក្នុងខេត្ត Lop Buri ដើម្បីធ្វើការពិនិត្យទេ ដូច្នេះមន្ត្រីក៏ប្រើ GPS ដើម្បីតាមដាន ហើយរកឃើញរថយន្តនៅការ៉ាសមួយកន្លែងក្នុងខេត្ត Nakhon Ratchasima។ ពេលមន្ត្រីទៅដល់ គេបានឃើញជាងឡានកំពុងដកធុងហ្គាស់ចេញពីរថយន្តទាំង៥គ្រឿងនោះ ទើបឈានដល់ការរឹបអូសតែម្តង។

លោកសង្កត់ធ្ងន់ថា នឹងមានការ​ចោទ​ប្រកាន់ទៅ​លើ​ក្រុមហ៊ុននិង​អ្នក​ពាក់ព័ន្ធ​ការកែច្នៃខុស​ច្បាប់នេះ ហើយ​អាជ្ញាធរ​នឹង​កំណត់​ថា តើ​យានដ្ឋាន​ត្រូវ​ប្រឈម​នឹង​វិធានការ​ផ្លូវ​ច្បាប់​ឬ​អត់។ លើសពីនេះ នាយកដ្ឋានដឹកជញ្ជូនផ្លូវគោកប្រកាសថា ខ្លួននឹងត្រួតពិនិត្យយានយន្តប្រើហ្គាស់ទាំង ១៣ ៤២៦គ្រឿងនៅទូទាំងប្រទេសក្នុងរយៈពេល៦០ថ្ងៃ។

សូមបញ្ជាក់ជាថ្មី រថយន្តក្រុងនេះមានដឹកសិស្សតូចៗចំនួន៣៨នាក់ និងគ្រូ៦នាក់ មកពីសាលា Wat Khao Praya Sangkharam ក្នុងស្រុក Lan Sak នៃខេត្ត Uthai Thani ធ្វើដំណើរក្នុងល្បឿន ៧០-៨០ គីឡូម៉ែត្រក្នុងមួយម៉ោង នៅពេលជួបហេតុការណ៍ដ៏រន្ធត់លើផ្លូវ Vibhavadi Rangsit ជិតផ្សារទំនើប Zeer Rangsit ក្នុងស្រុក Lam Luk Ka៕

អត្ថបទ៖ សុខ សុវណ្ណ

ចុចអាន៖ ប៉ូលិសថៃ រកឃើញតម្រុយបណ្តាលឲ្យឆេះរថយន្តដឹកសិស្ស, មិនមែនដោយសារផ្ទុះកង់ទេ