អាមេរិកអនុញ្ញាតឱ្យចាក់វ៉ាក់សាំង Pfizer សម្រាប់ពលរដ្ឋអាយុពី ១២ ទៅ ១៥ ឆ្នាំបន្ថែម

បន្ទាប់ពីបានពិនិត្យទិន្នន័យ សុវត្ថិភាព និងប្រសិទ្ធភាពរបស់វ៉ាក់សាំង Pfizer ពីការសាកល្បងព្យាបាលរបស់ខ្លួន រដ្ឋបាលចំណីអាហារ និងឱសថអាមេរិក (FDA) បានអនុញ្ញាតឱ្យប្រើប្រាស់ជាបន្ទាន់នូវវ៉ាក់សាំង Pfizer-BioNTech សម្រាប់ប្រជាពលរដ្ឋខ្លួន ដែលមានអាយុចន្លោះពី ១២ ទៅ ១៥ ឆ្នាំ ។ មុនការប្រកាសពីប្រសិទ្ធភាពវ៉ាក់សាំងទៅលើចន្លោះអាយុប្រជាជនវ័យក្មេងថ្មីនេះ ក្រុមហ៊ុនវ៉ាក់សាំង Pfizer ក៏ត្រូវបានផ្តល់ការអនុញ្ញាតឱ្យប្រើសម្រាប់ចាក់ទៅលើប្រជាជនដែលមានអាយុចាប់ពី ១៦ ឆ្នាំឡើងទៅរួចមកហើយផងដែរ។

ក្រុមហ៊ុនផលិតវ៉ាក់សាំងប្រឆាំងកូវីដ-១៩ ដ៏ឈានមុខរបស់អាមេរិកដដែលនេះ ក៏បានបញ្ជាក់ថា ខ្លួនគ្រោងនឹងដាក់ពាក្យសុំការអនុញ្ញាតប្រើប្រាស់ជាបន្ទាន់ សម្រាប់ក្រុមមនុស្សអាយុទាំងនេះនៅក្នុងខែកញ្ញា ឆ្នាំនេះ។ ស្របពេលជាមួយគ្នានេះដែរ ក្រុមហ៊ុនវ៉ាក់សាំងរបស់សហរដ្ឋអាមេរិក ២ផ្សេងទៀត រួមមាន Moderna និង Johnson & Johnson ក៏កំពុងធ្វើតេស្តវ៉ាក់សាំង ការពារជំងឺកូវីដ ១៩ លើកុមាររហូតដល់អាយុ ១៧ ឆ្នាំ ផងដែរ ៕