ថ្ងៃទី២៣នេះ ខេត្តឧត្ដរមានជ័យ បន្តរកឃើញករណីអ្នកជំងឺកូវីដ-១៩ ចំនួន២៧ករណីថ្មី បន្ថែមទៀត

ឧត្តរមានជ័យ៖ ផ្អែកតាមសេចក្តីប្រកាសព័ត៌មាន របស់រដ្ឋបាលខេត្តឧត្តរមានជ័យ នៅថ្ងៃទី២៣ ខែមិថុនា ឆ្នាំ២០២១ អោយដឹងថា រដ្ឋបាលខេត្តបានបន្តរកឃើញករណីវិជ្ជមានកូវីដ-១៩ចំនួន២៧ករណីថ្មី ក្នុងនោះ ( ០១ករណីពាក់ព័ន្ធព្រឹត្តិការណ៍សហគមន៍២០កុម្ភះ ) និង ២៦ករណីនាំចូលពីប្រទេសថៃ និងជាសះស្បើយ០៣នាក់បន្ថែមទៀត ។

ដោយគិតត្រឹមម៉ោង១៧:៣០នាទី ថ្ងៃទី២៣ ខែមិថុនា ឆ្នាំ២០២១នេះ ខេត្តឧត្តរមានជ័យ រកឃើញអ្នកវិជ្ជមានជំងឺកូវីដ១៩ ចំនួន ២២៧ករណី ក្នុងនោះករណីនាំចូលពីក្រៅប្រទេសចំនួន ១៦៥ករណី និងករណីឆ្លងក្នុងសហគមន៍ ២០កុម្ភៈ ចំនួន ៣៦ករណី និងបានព្យាបាលជាសះស្បើយចំនួន ៩០ នាក់ កំពុងសម្រាកព្យាបាលចំនួន ១៣៥នាក់ និងស្លាប់ចំនួន ០២នាក់។

ដើម្បីចូលរួមទប់ស្កាត់នូវការចម្លងជំងឺកូវីដ-១៩ ឱ្យកាន់តែមានប្រសិទ្ធភាព រដ្ឋបាលខេត្តឧត្ដរមានជ័យ សូមជំរុញឱ្យប្រជាពលរដ្ឋគ្រប់រូប ចងចាំ និងចូលរួមអនុវត្តឱ្យបានខ្ជាប់ខ្លួនជានិច្ចនូវវិធានការការពារខ្លួនសាមញ្ញៗ និងត្រូវបន្ដប្រុងប្រយ័ត្នផ្ទាល់ខ្លួនពីការឆ្លងជំងឺកូវីដ-១៩ ដោយអនុវត្តឱ្យខាងតែបាននូវវិធានការ «បីកុំ និង បីការពារ» របស់សម្តេចតេជោ នាយករដ្ឋមន្ត្រី នៃកម្ពុជា ៕

អត្ថបទ ៖ ចាន់ ធី