ព័ត៌មានអន្ដរជាតិ

អនុប្រធានធនាគារកណ្តាលអឺរ៉ុប៖ លោក ត្រាំ អាក្រក់ជាង កូវីដ-១៩ ទៀត

បានផុស

៣ ខែ មុន

នៅ

ថ្ងៃចន្ទ ១៧ មីនា ២០២៥

ដោយ

ក្នុងបទសម្ភាសជាមួយ The Sunday Times កាលពីថ្ងៃអាទិត្យទី១៦ខែមីនាឆ្នាំ២០២៥ អនុប្រធានធនាគារកណ្តាលអឺរ៉ុប (ECB) លោក Luis de Guindos បាននិយាយថា ប្រធានាធិបតីអាមេរិក ដូណាល់ ត្រាំ បានបង្កភាពមិនប្រាកដប្រជា ដល់វិស័យសេដ្ឋកិច្ចពិភពលោក អាក្រក់ជាងជំងឺរាតត្បាតកូវីដ-១៩ ទៅទៀត។

ប្រធានាធិបតីអាមេរិកលោក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពី៥ឆ្នាំមុន វិបត្តិជំងឺរាត្បាតកូវីដ-១៩ បានធ្វើសេដ្ឋកិច្ចសកលដួលដាំក្បាលចុះ និងបង្កការរឹតត្បិតពេញមួយពិភពលោក ធ្វើឲ្យមនុស្សត្រូវរងទុក្ខវេទនាទាំងនឹកស្មានមិនដល់។

យ៉ាងណា ឥឡូវលោក Guindos បានត្អូញត្អែរថា គោលនយោបាយរបស់លោកត្រាំ រួមទាំងពន្ធគយ ការគ្រប់គ្រងប្រព័ន្ធហិរញ្ញវត្ថុ និងកំណែទម្រង់ពន្ធសាជីវកម្មផងដែរនោះ កំពុងធ្វើឲ្យទីផ្សារប្រែប្រួល និងបង្កភាពស្មុគស្មាញដល់ស្ថិរភាពសេដ្ឋកិច្ចជាសកល។

អនុប្រធានធនាគារកណ្តាលអឺរ៉ុប លោក Luis de Guindos (រូបថត៖ Reuters)

លោក De Guindos សង្កត់ធ្ងន់ថា ភាពមិនអាចទាយទុកជាមុនបានដែលកើតចេញពីគោលនយោបាយទាំងនេះ គឺខ្លាំងជាងបទពិសោធន៍ក្នុងអំឡុងពេលជំងឺរាតត្បាតទៅទៀត។ ការងាកចេញឆ្ងាយពីពហុភាគីនិយម និងកិច្ចសហប្រតិបត្តិការអន្តរជាតិ កំពុងជះឥទ្ធិពលយ៉ាងធ្ងន់ធ្ងរដល់ទំនុកចិត្តរបស់អ្នកប្រើប្រាស់ នាំឲ្យការប្រើប្រាស់ និងការវិនិយោគធ្លាក់ចុះនៅក្នុងតំបន់ចាយប្រាក់អឺរ៉ូ។

ទន្ទឹមនោះ លោក De Guindos បានបង្ហាញក្តីបារម្ភថា ពិភពលោកមិនអាចមើលចិត្តលោក ត្រាំ ធ្លុះឡើយ ដូច្នេះអ្វីៗស្ថិតក្នុងភាពស្រពិចស្រពិលព្រោះគេមិនដឹងថាតើលោក ត្រាំ នឹងធ្វើអ្វីបន្ទាប់ទៀត។ ពិភពលោកត្រូវតែត្រៀមខ្លួនចំពោះភាពបត់បែនរបស់ប្រធានាធិបតីអាមេរិក។

សូមជម្រាបជាថ្មី ការដំឡើងពន្ធ២៥% របស់លោកត្រាំ លើដែកថែបនិងអាលុយមីញ៉ូមពី EU បានចូលជាធរមានកាលពីសប្តាហ៍មុន។ ពាក់ព័ន្ធបញ្ហានេះ ទីក្រុងព្រុចសែលបានប្តេជ្ញាសងសឹកវិញ ជាមួយវិធានការតបតយ៉ាងរហ័សនិងសក្តិសមបំផុត៕

អត្ថបទ៖ សុខ សុវណ្ណ

ចុចអាន៖ ត្រាំ នឹងនិយាយរឿងបែងចែកទឹកដី និងរោងចក្រថាមពល ក្នុងជំនួបលើកទី២ជាមួយ ពូទីន