ថ្ងៃទី ០២ធ្នូ តុលាការកាត់ទោសលោក រ៉ុង ឈុន

បើពុំមានការកែប្រែទេ នៅថ្ងៃទី២ ខែធ្នូ ឆ្នាំ២០២០ខាងមុខនេះ ចៅក្រមសាលាដំបូងរាជធានីភ្នំពេញ នឹងបើកសវនាការកាត់ទោស លោក រ៉ុង ឈុន ប្រធានសហភាពសហជីពកម្ពុជា ដែលជាប់ពាក់ព័ន្ធនិងបទល្មើស « ញុះញង់បង្កឲ្យមានភាពចលាចលធ្ងន់ធ្ងដល់សង្គមជាតិ » ដែលផ្ដើមចេញពីការធ្វើអត្ថាធិប្បាយបញ្ហាព្រំដែនដ៏រសើប ។

ជនជាប់ចោទ ត្រូវបានអាជ្ញាធរចាប់ខ្លួន កាលពីយប់ថ្ងៃទី៣១ ខែកក្តដា ឆ្នាំ២០២០ បន្ទាប់ពីរូបលោកបានធ្វើអត្ថា​ធិ​ប្បាយពីបញ្ហាព្រំដែនកម្ពុជា-វៀតណាម នៅក្នុងខេត្តត្បូងឃ្មុំ។ បន្ទាប់មកតុលាការបានចោទប្រកាន់ និងឃុំខ្លួន ដាក់ពន្ធនាគារជាបណ្ដោះអាសន្ន ។

នាពេលថ្មីៗនេះ មេធាវីការពារក្ដីឲ្យលោក រ៉ុង ឈុន គឺលោកមេធាវី ជូង ជូងី បានប្ដឹងឡើងសាលាឧទ្ធរណ៍ ពីបញ្ហាដីកាសម្រេចឃុំខ្លួនជនត្រូវចោទ ប៉ុន្តែសាលាឧទ្ធរណ៍បានបដិសេធ ហើយសម្រេចបន្តការឃុំខ្លួនរហូតដល់តុលាការអង្គសេចក្ដីសម្រេចតាមច្បាប់ ៕

អត្ថបទ ៖ មករា