៦ខែដើមឆ្នាំនេះ គ្រោះអគ្គិភ័យបណ្តាលឱ្យមនុស្សស្លាប់និងរបួស៤៣នាក់ ខូចខាតផ្ទះជាង៣០០ខ្នង

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា រយៈពេល៦ខែដើមឆ្នាំ២០២១​នេះ មានគ្រោះអគ្គិភ័យកើតឡើងចំនួន២៨៨លើកនៅទូទាំងប្រទេស បណ្តាលឱ្យមនុស្សស្លាប់ចំនួន១៤នាក់និងរបួសចំនួន២៩នាក់ ព្រមទាំងខូចខាតផ្ទះសម្បែងចំនួន៣២១ខ្នង។

ក្រៅពីនេះគ្រោះអគ្គិភ័យក៏បានបណ្តាលឲ្យខូចខាតតូបផ្សារចំនួន៨០តូប ឃ្លាំងទំនិញចំនួន១១កន្លែង រោងចក្រនិងសិប្បកម្មចំនួន១១កន្លែង និងអគាររដ្ឋបាលចំនួន១៧កន្លែង។

របាយការណ៍ដដែលបានបន្តថា ក្នុងចំណោមគ្រោះអគ្គិភ័យកើតឡើង២៨៨លើកនោះ ក្នុងនោះនៅរាជធានីភ្នំពេញកើតឡើងចំនួន៥៩លើក ខូចខាតផ្ទះសម្បែង៦៥ផ្ទះ តូបផ្សារចំនួន១តូប ឃ្លាំងទំនិញចំនួន៦កន្លែង រោងចក្រសិប្បកម្មចំនួន២កន្លែង ស្លាប់មនុស្សចំនួន៦នាក់និងរបួស២០នាក់។

យោងតាមរបាយការណ៍ខាងលើបានបន្តទៀតថា ចំនួនតួលេខខូខខាត និងរងគ្រោះខាងលើនេះបើប្រៀបធៀបទៅនឹង​រយៈពេល៦ខែដូចគ្នាឆ្នាំ២០២០កន្លងទៅឃើញថា មានការថយចុះគួរឲ្យគត់សម្គាល់ដោយ៦ខែឆ្នាំមុនមានគ្រោះអគ្គិភ័យ​បានកើតឡើងចំនួន៤០៦លើកបណ្តាលឱ្យខូចខាតលំនៅដ្ឋានចំនួន៤៤៦ខ្នង តូបផ្សារចំនួន១០០តូប
ឃ្លាំង​ទំនិញចំនួន៥កន្លែង រោងចក្រសិល្បកម្មចំនួន២១កន្លែង អគាររដ្ឋបាលចំនួន៨កន្លែងស្លាប់​មនុស្ស​ចំនួន១៣នាក់និងរងរបួសចំនួន២៤នាក់៕

អត្ថបទ ៖ សំអឿន