ខេត្ត​បាត់ដំបង ត្រៀម​វិទ្យាល័យ​មួយទៀត សម្រាប់​ព្យាបាល​ជំងឺ​កូ​វីដ​-១៩

នៅ​ព្រឹក​ថ្ងៃទី​៩ ខែកក្កដា ឆ្នាំ​២០២១​នេះ លោក ផេង សិទ្ធី អភិបាលក្រុង​បាត់ដំបង បានបញ្ជាក់​ប្រាប់​កម្ពុជា​ថ្មី​ថា បច្ចុប្បន្ន​កន្លែង​សម្រាប់​ព្យាបាល​អ្នកជំងឺ​កូ​វីដ​-១៩ ក្រៅពី​មន្ទីរពេទ្យ​ខេត្ត គឺ​រដ្ឋបាលខេត្ត ក៏ដូចជា​រដ្ឋបាល​ក្រុង បាន​យក​វិទ្យាល័យ​សម្តេចឪ ជា​កន្លែង​ព្យាបាល​បន្ថែម ដោយសារតែ​អ្នក​ឆ្លង​កូ​វីដ កាន់​តែមាន​កំណើនច្រើនឡើង​។​

លោក​បន្ថែមថា បច្ចុប្បន្ន​ចំនួន​អ្នក​សម្រាក​ព្យាបាល​នៅក្នុង​វិទ្យាល័យ​សម្តេចឪ​ មាន​ចំនួន​ប្រមាណជាង​២០០​នាក់​ទៅហើយ ដូច្នេះ​បើទោះបីជា​ស្ថិតិ​នេះ​មិនទាន់​ពេញ​បន្ទប់​ក៏ដោយ ក៏​រដ្ឋបាល​ក្រុង ក៏ដូចជា​រដ្ឋបាល​ខេត្ត​ ត្រូវតែ​ត្រៀម​ទីតាំង​ថ្មី​បន្ថែមទៀត ដើម្បី​ចៀសវាង​ពេល​ដែលមាន​បញ្ហា​បន្ទាន់ រក​កន្លែង​ដាក់​មិនបាន ដោយ​ទីតាំង​ថ្មី​នេះ​បាន​ឯកភាពគ្នា​កំណត់​យក​អនុវិទ្យាល័យ​ព្រះមុនីវង្ស ធ្វើជា​កន្លែង​សម្រាប់​ព្យាបាល​អ្នកជំងឺ​កូ​វីដ​-១៩ ។​

គួរ​បញ្ជាក់ថា បច្ចុប្បន្ន​ខេត្តបាត់ដំបង​បើ​គិត​មកដល់​ល្ងាច​ថ្ងៃទី​៨ ខែកក្កដា នេះ មាន​អ្នក​វិជ្ជមាន​កូ​វីដ​-១៩ សរុប​ចំនួន ១.៤២៧ នាក់​ហើយ ដោយមាន​អ្នកជា​សះស្បើយ​ចំនួន ៦៦៥ នាក់ ស្លាប់ ៩ នាក់ និង​អ្នក​នៅសល់​ដែល​កំពុង​សម្រាក​ព្យាបាល​មាន​ចំនួន៧៥៣ នាក់​៕

អត្ថបទ ៖ សោ និយម​រ័ត្ន​