ព័ត៌មានជាតិ

អាជ្ញាធរខេត្តសម្រេចបញ្ចប់ការបិទខ្ទប់បណ្ដោះអាសន្នក្រុងស្ទឹងត្រែងនិងមូលដ្ឋានមួយចំនួនក្នុងខេត្ត

បានផុស

៤ years មុន

នៅ

ថ្ងៃអង្គារ ៣១ សីហា ២០២១

ដោយ

អាជ្ញាធរខេត្តស្ទឹងត្រែងបានសម្រេចបញ្ចប់ការបិទខ្ទប់បណ្ដោះអាសន្ន ក្រុងស្ទឹងត្រែង មូលដ្ឋានភូមិថ្មី សង្កាត់សាមគ្គី និងមូលដ្ឋាន ឃុំអូរត្រែលស្រុកថាឡាបរិវ៉ាត់ នៅវេលាម៉ោង ២៣និង៥៩នាទីយប់ថ្ងៃទី ៣១សីហានេះតទៅ ក្រោយពីធ្វើការបិទខ្ទប់អស់រយៈពេល ២ សប្ដាហ៍កន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីសម្រេចបានបញ្ជាក់ថា ក្នុងនោះក៏បានអនុញ្ញាតឲ្យដំណើរការឡើងវិញនៅទីតាំងអាជីវកម្ម “ធនាគារស្ថាបនាសាខា”ខេត្តស្ទឹងត្រែង ស្ថិតនៅក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង ចាប់ពីថ្ងៃទី ១ ខែកញ្ញាឆ្នាំ ២០២១ នេះតទៅ។

រដ្ឋបាលខេត្តបានបញ្ជាក់បន្ថែមថា ក្រោយបញ្ចប់ការបិទខ្ទប់ត្រូវបន្តអនុវត្តវិធានការរដ្ឋបាល និងវិធានការសុវត្ថិភាព ផ្នែកសុខាភិបាល ដើម្បីប្រយុទ្ធ នឹងទប់ស្កាត់ ការរីករាលដាលជំងឺកូវី១៩ ក្នុងភូមិសាស្ត្រខេត្តស្ទឹងត្រែង ដែលរួមមាន ផ្អាកជាបណ្ដោះអាសន្នសកម្មភាព មុខរបរ និងអាជីវកម្ម ក្លឹបកម្សាន្តគ្រប់ប្រភេទ រមណីយដ្ឋាន និងសួនកំសាន្តនានាអាជីវកម្មម៉ាស្សា ហាងលក់និងសេដគ្រឿងស្រវឹង គ្រប់ប្រភេទ ក្លឹបហាត់ប្រាណទីតាំងលេងកីឡាគ្រប់ប្រភេទ និងការជួបជុំមានមនុស្សច្រើន ខុសពីវិធានការសុវត្ថិភាពសុខាភិបាល ក្នុងមូលដ្ឋាន ក្រុងស្ទឹងត្រែងចាប់ពីវេលាម៉ោង ២៣និង៥៩នាទី យប់ថ្ងៃទី ៣១សីហាឆ្នាំ ២០២១ នេះ តទៅរហូតដល់មានការសម្រេចជាថ្មី។

ក្នុងការសម្រេចបញ្ចប់ការបិទខ្ទប់ ក៏នៅមានអនុវត្តបម្រាមគោចរ ពីចន្លោះម៉ោង ២១ យប់ដល់ម៉ោង ៣ ភ្លឺ សម្រាប់ភូមិសាស្ត្រ ក្រុងស្ទឹងត្រែង និងទីប្រជុំជននានាក្នុងមូលដ្ឋានស្រុកទាំង ៥ក្នុងខេត្តស្ទឹងត្រែងផងដែរ៕

ដោយ ៖ ងិនលីម