ព័ត៌មានអន្ដរជាតិ

ជប៉ុន បារម្ភថា មហាគ្រោះរញ្ជួយដីអាចសម្លាប់មនុស្ស ៣០ម៉ឺននាក់ និងខាតបង់លុយ ១,៨ទ្រីលានដុល្លារ

បានផុស

១ year មុន

នៅ

ថ្ងៃចន្ទ ៣១ មីនា ២០២៥

ដោយ

Chheang

របាយការណ៍របស់រដ្ឋាភិបាលជប៉ុន បានបង្ហាញពីក្ដីបារម្ភជាខ្លាំង ចំពោះមហាគ្រោះរញ្ជួយដីដែលអាចកើតមាននៅរណ្ដៅ Nankai ដែលអាចឲ្យជប៉ុនខាតបង់សេដ្ឋកិច្ចរហូតដល់ ១,៨១ទ្រីលានដុល្លារ និងបាត់បង់ជីវិតពលរដ្ឋប្រហែល ៣០០ ០០០នាក់។

រញ្ជួយដីនៅជប៉ុនកាលពីឆ្នាំ២០២៤ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់គណៈរដ្ឋមន្ត្រីដែលចេញផ្សាយនៅថ្ងៃចន្ទទី៣១ខែមីនាឆ្នាំ២០២៥ បានបង្ហាញថា ការខូចខាតសេដ្ឋកិច្ចដែលរំពឹងទុកចំនួន ២៧០,៣ពាន់ពាន់លានយ៉េន ឬជិតពាក់កណ្តាលនៃផលិតផលក្នុងស្រុកសរុប (GPD) របស់ជប៉ុន គឺកើនឡើងយ៉ាងខ្លាំងពីការប៉ាន់ប្រមាណពីមុនចំនួន ២១៤,២ពាន់ពាន់លានយ៉េន ដោយសារការប៉ាន់ប្រមាណថ្មីបានគិតពីសម្ពាធអតិផរណា និងទិន្នន័យភូមិសាស្ត្រដែលបានធ្វើបច្ចុប្បន្នភាពអំពីវិសាលភាពនៃទឹកជំនន់ដែលអាចគ្របដណ្ដប់លើផ្ទៃដី។

រណ្ដៅ Nankai ប្រវែង៩០០គីឡូម៉ែត្រនៅក្រោមបាតសមុទ្រប៉ាស៊ីហ្វិករបស់ប្រទេសជប៉ុន មានប្រវត្តិនៃការរញ្ជួយដីដ៏ធំរៀងរាល់ ១០០ ទៅ ១៥០ឆ្នាំម្តង។ ក្រុមប្រឹក្សារដ្ឋាភិបាល ប៉ាន់ប្រមាណថា មានឱកាសប្រហែល ៨០% នៃការរញ្ជួយដីកម្រិត ៨ ទៅ ៩រ៉ិចទ័រនៅតំបន់នេះក្នុងរយៈពេល ៣០ឆ្នាំខាងមុខ។

នៅក្រោមសេណារីយ៉ូដ៏អាក្រក់បំផុតក្នុងករណីកើតមានការរញ្ជួយដីកម្រិត៩រ៉ិចទ័រ ជប៉ុនទំនងជានឹងមានអ្នកជម្លៀសខ្លួនចំនួន ១,២៣លាននាក់ ឬស្មើនឹង ១០% នៃចំនួនប្រជាជនសរុបរបស់ខ្លួន។ របាយការណ៍បានបង្ហាញថា មនុស្សរហូតដល់ ២៩៨ ០០០នាក់អាចស្លាប់ដោយសាររលកយក្សស៊ូណាមិ និងការដួលរលំអគារ បើការរញ្ជួយដីកើតឡើងនៅពេលយប់អំឡុងរដូវរងារ។

កាលពីឆ្នាំមុន ជប៉ុនធ្លាប់បានចេញសេចក្តីព្រមានអំពីមហាគ្រោះរញ្ជួយដីកម្រិតលើកដំបូងរបស់ខ្លួន បន្ទាប់ពីគ្រោះរញ្ជួយដីកម្រិត ៧,១រ៉ិចទ័រ ជាមួយជម្រៅប្រហែល ៣០គីឡូម៉ែត្រ ដែលវាយប្រហារនៅគែមរណ្ដៅ Nankai ស្ថិតនៅភាគនិរតីប្រទេសជប៉ុនកាលពីខែសីហាឆ្នាំ២០២៤។

សូមបញ្ជាក់ថា ជប៉ុនជាប្រទេសមួយក្នុងចំណោមប្រទេសដែលងាយនឹងរញ្ជួយដីខ្លាំងបំផុតលើពិភពលោក។ មនុស្សជាង ១៥ ០០០នាក់ ត្រូវបានសម្លាប់ក្នុងគ្រោះរញ្ជួយដីកម្រិតធ្ងន់ ៩រ៉ិចទ័រនៅតំបន់ Tōhoku ឆ្នាំ២០១១ ដែលកាលនោះ ក៏បង្កឲ្យមានរលកយក្សស៊ូណាមិ និងការសាយភាយជាតិវិទ្យុសកម្មចេញពីម៉ាស៊ីនរ៉េអាក់ទ័រ នៅឯរោងចក្រថាមពលនុយក្លេអ៊ែរផងដែរ៕