សប្តាហ៍​ទី ២​ បន្លែសុវត្ថិភាព​​ផ្សារចុងសប្តាហ៍​​​​នៅ​ក្រុងបាត់ដំបង ទទួល​​ការគាំទ្រ​កាន់តែច្រើន​

សប្តាហ៍ទី ២ នៃការ​តាំងលក់​បន្លែ​សុវត្ថិភាព​នៅ​ផ្សារចុងសប្តាហ៍នៅ​ក្រុង​បាត់ដំបង សង្កេតឃើញមានអតិថិជនគាំទ្រ​កាន់​តែ​​ច្រើន ក្នុងនោះមានទាំងជនបរទេសផងដែរ។

នៅក្នុងការដាក់តាំងលក់នៅសប្តាហ៍​ទី ២ ក៏សង្កេតឃើញបន្លែសុវត្ថិភាពគ្រប់ប្រភេទពីសហគមន៍មានផ្លែឈើ ត្រី ស្រស់ៗ អាហារកែច្នៃ និងវត្ថុអនុស្សាវរីយ៍ជាដើម។

អ្នកស្រី មុំ រស់នៅក្នុងក្រុងបាត់ដំបងបានឲ្យដឹងថា អ្នកស្រីទើបតែដឹង​មានផ្សារ​ចុង​សប្តាហ៍នេះ។ នៅអាទិត្យទី ២ អ្នកស្រីបាន​មក​ផ្សារដើម្បីទិញបន្លែខ្លះៗ ហើយអ្វីដែលអ្នកស្រីចាប់អារម្មណ៍​នោះ គឺបន្លែដែលមានសភាពស្រស់បំព្រងគ្រប់ប្រភេទនិងមាន​ប្រភពច្បាស់លាស់។

អ្នកស្រីបន្តថា “ខ្ញុំពេញចិត្តដែលបានបង្កើតផ្សារនេះឡើង ហើយ​ខ្ញុំឃើញមានមនុស្សចូលមក​ច្រើនគួរសម មានទាំង​ជនបរទេសក៏មានដែរ រីឯតម្លៃក៏សមរម្យអាចទទួលយកបាន”។

លោក ចាន់ធី នៅជិតផ្សារបឹងឈូកនៃក្រុងបាត់ដំបង ក៏បានបញ្ចេញមតិថា នៅអាទិត្យទី ២ នេះ លោក​ក៏បានទៅទិញម្ហូប​អាហារនៅទីនោះដែរ ហើយលោក​ឃើញ​ថា នៅអាទិត្យទី២នេះ មានដាក់តាំងលក់បន្លែស្រស់ៗគ្រប់ប្រភេទច្រើន​ជាង​​អាទិត្យទីមួយ។

«ការដាក់តាំងលក់មានរបៀបល្អ មានស្តង់ដាអនាម័យគួរ​ឲ្យ​ទុកចិត្ត ខណៈ​មាន​មនុស្សច្រើន​បាន​មក​​គាំទ្រ​ទិញ​ផលិតផលខ្មែរ ដែលជាបន្លែសុវត្ថិភាព ហើយ​មាន​តម្លៃក៏​សមរម្យ»។ លោក ចាន់ធី បន្ថែម។

បើទោះបី​យ៉ាងណា មន្ទីរពាណិជ្ជកម្មខេត្តបាត់ដំបង បានអំពាវនាវដល់ប្រជាពលរដ្ឋមន្ត្រីរាជការទាំងអស់ ចូលរួមគាំទ្រ​ទិញផលិតផល​នៅ​ផ្សារ​ចុងសប្តាហ៍​ ដែលរៀបចំ​​មួយសប្តាហ៍ ២ ថ្ងៃ នៅបរិវេណខាងមុខ​ផ្សារទំនើប-បុរីថ្មី (តាមបណ្តោយផ្លូវលេខ ៣) ក្រុងបាត់ដំបង ដែលមានតាំង​មានលក់​បន្លែសុវត្ថិភាព​ក្នុងស្រុក​គ្រប់ប្រភេទ ប្រកបដោយគុណភាព និងស្តង់ដាអនាម័យ ត្រឹមត្រូវសម្រាប់សុខភាពប្រជាពលរដ្ឋទូទៅ៕

អត្ថបទ÷សៅ សារិទ្ធ