អាជ្ញាធរជាតិអប្សរាកំពុងស្ថាបនា​ស្ពានផ្លូវកង់២ទីតាំងក្នុងតំបន់រមណីយដ្ឋានអង្គរ​

នៅ​ព្រឹក​ថ្ងៃទី​០៧ ខែកញ្ញា ឆ្នាំ២០២១​នេះ លោក ឡុង កុសល អ្នក​នាំពា​ក្យអាជ្ញាធរ​ជាតិ​អប្សរា បាន​ប្រាប់​ កម្ពុ​ជាថ្មី​ ឲ្យ​ដឹងថា បច្ចុប្បន្នអាជ្ញាធរ​ជាតិ​អប្សរា​កំពុង​ដំណើរ​ការសាងសង់​ស្ពាន​លើ​កំណាត់​ផ្លូវ​កង់ ប្រភេទ​បេតុង​ចំនួន​២​កន្លែង​ផ្សេងគ្នានៅក្នុង​រមណីយដ្ឋាន​អង្គរ​។​

អ្នក​នាំពា​ក្យ​អាជ្ញាធរ​ជាតិ​អប្សរា ក៏បាន​បញ្ចាក់​ដែរ​ក្នុងនោះ ស្ពាន​ទី​១មាន​ប្រវែង​១៥០​ម៉ែត្រ ស្ថិតក្នុង​ភូមិ​មណ្ឌល​៣ សង្កាត់​ស្លរ​ក្រាម ក្រុង​សៀមរាប​។ រីឯ​ស្ពាន​ទី​២ មាន​ប្រវែង​២៥​ម៉ែត្រ ស្ថិតក្នុងភូមិ​រហាល សង្កាត់​នគរធំ ក្រុង​សៀមរាប​។

ក្រោយពេល​បញ្ចប់​ការសាងសង់​ស្ពាន​ខាងលើ​រួមនឹង​កំណាត់​ផ្លូវ​កង់​ទាំងពីរ​នេះ នឹង​រួមចំណែក​យ៉ាង​សំខាន់​ក្នុងការ​លើ​ក​កម្ពស់​វិស័យ​ទេសចរណ៍ រួមទាំង​បានផ្តល់​បទពិសោធន៍​ថ្មី​បន្ថែមទៀត​ដល់​អ្នក​ទស្សនា និង​អ្នក​និយម​មធ្យោបាយ​ធ្វើដំណើ​រ​ដោយ​កង់ ជាពិសេស​សម្រួល​ដល់​ការ​ធ្វើ​ដំណើ​រ​របស់​បងប្អូន​ប្រជាពលរដ្ឋ និង​សិស្សានុសិស្ស​ជាដើម​៕​

អត្ថបទ៖ គឿន​វេត​