ព័ត៌មានជាតិ

ស.ស.យ.ក នឹងផ្សព្វផ្សាយវិធានការ ៣កុំ៣ការពារតាមទីវត្តអារាមទូទាំងប្រទេសក្នុងពិធីបុណ្យកាន់បិណ្ឌ និងភ្ជុំបិណ្ឌខាងមុខ

បានផុស

១ ខែ មុន

នៅ

ថ្ងៃសៅរ៍ ១៨ កញ្ញា ២០២១

ដោយ

គណៈកម្មការអប់រំ យុវជនកីឡា ធម្មការកិច្ចការសាសនាវប្បធម៌ និងទេសចរណ៍ នៃរដ្ឋសភា និងសហភាពសហព័ន្ធយុវជនកម្ពុជា(ស.ស.យ.ក)សហការជាមួយក្រុមហ៊ុនកូកា-កូឡាកម្ពុជា នឹងផ្សព្វផ្សាយវិធានការ ៣កុំ៣ការពារ នៅតាមទីវត្តអារាមនានា ក្នុងឱកាសបុណ្យកាន់បិណ្ឌ និងភ្ជុំបិណ្ឌដែលនឹងឈានចូលមកដល់នាពេលដ៏ខ្លីខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្សព្វផ្សាយនេះ ធ្វើឡើងតាមរយៈការផលិតផ្ទាំងបដាផ្សព្វផ្សាយ ក្រោមខ្លឹមសារចូលរួមអបអរសាទរពិធីបុណ្យកាន់បិណ្ឌ និងភ្ជុំបិណ្ឌ និងដើម្បីជំរុញឱ្យពុទ្ធបរិស័ទលោកតាលោកយាយព្រះសង្ឃ និងប្រជាពលរដ្ឋ បន្តអនុវត្តវិធានការ ៣ការពារ ៣កុំ ដើម្បីជាការចូលរួមចំណែកក្នុងការជំរុញការយល់ដឹង និងបង្កើនការប្រុងប្រយ័ត្នពីគ្រោះថ្នាក់ នៃជំងឺកូវីដ១៩ សំដៅទប់ស្កាត់ការឆ្លងជំងឺកូវីដ១៩ ក្នុងសហគមន៍។

ផ្ទាំងបដាអប់រំផ្សព្វផ្សាយនេះ ត្រូវបានប្រគល់ជូនគណៈកម្មការទី៧នៃរដ្ឋសភា និងស.ស.យ.ក កាលពីថ្ងៃទី១៧ ខែកញ្ញា ឆ្នាំ២០២១ ដោយមានការចូលរួមប្រគល់-ទទួលដោយកញ្ញា សម្បត្តិ មុនីវរលក្ខណ៍ នាយកផ្នែកទំនាក់ទំនងកិច្ចការសាធារណៈនៃក្រុមហ៊ុនកូកា- កូឡាកម្ពុជា និងលោក ខៀវ ភារិទ្ធ លេខាធិការ និងជាតំណាងដ៏ខ្ពង់ខ្ពស់ លោក ហ៊ុន ម៉ានី ប្រធានគណៈកម្មការទី៧នៃរដ្ឋសភា ដែលគ្រោង នឹងចងនៅតាមបណ្តាវត្តអារាមនានា នៅទូទាំងប្រទេស តាមរយៈក្រុមការងាររបស់សហភាពសហព័ន្ធយុវជនកម្ពុជា មុនថ្ងៃកាន់បិណ្ឌទី១ ត្រូវនឹងថ្ងៃទី២២ ខែកញ្ញា ឆ្នាំ២០២១ខាងមុខ។

កញ្ញា សម្បត្តិ មុនីវរលក្ខណ៍ បានលើកឡើងថា«យើងខ្ញុំមានសេចក្តីរីករាយណាស់ដែលពិធីបុណ្យភ្ជុំបិណ្ឌត្រូវបានអនុញ្ញាតឱ្យប្រារព្វតាមប្រពៃណីជាតិ បន្ទាប់ពីកម្ពុជាសម្រេចបានអត្រាការចាក់វាក់សាំងកូវីដ-១៩ខ្ពស់គួរជាទីមោទន។ យ៉ាងណាក៏សូមឱ្យបងប្អូនទាំងអស់រីករាយដោយប្រកាន់ខ្ជាប់នូវ៣ការពារជានិច្ចដើម្បីសុខសុវត្ថិភាព ហើយយើងខ្ញុំសង្ឃឹមថា កម្ពុជានឹងអាចប្រារព្វពិធីបុណ្យជាតិធំៗទាំងឡាយទៀត តាមគន្លងថ្មីក្នុងបរិបទកូវីដ-១៩នេះ។»

លោក ខៀវ ភារិទ្ធ លេខាធិការ តំណាងលោក ហ៊ុន ម៉ានី ប្រធានគណៈកម្មការទី៧នៃរដ្ឋសភាមានប្រសាសន៍ថ្លែងអំណរគុណដល់ក្រុមហ៊ុនកូកា-កូឡាកម្ពុជា ដែលបានចូលរួមឧបត្ថម្ភដល់គណៈកម្មការក្នុងការបោះពុម្ពបដានេះឡើង ដើម្បីជាការបញ្ជ្រាបសារអប់រំ និងក្រើនរំឭកដល់លោកយាយ លោកតា អ៊ុំ ពូ មីង បងប្អូនដែលមកធ្វើបុណ្យនៅតាមទីវត្តអារាមឱ្យចូលរួមទប់ស្កាត់ការឆ្លងរាលដាលនៃជំងឺកូវីដ-១៩ ដោយប្រកាន់ខ្ជាប់នូវវិធាន ៣ការពារ ៣កុំ។

លោកបានបន្ថែមថា «កាយវិការដ៏សប្បុរសនេះ មិនត្រឹមតែជាការរួមចំណែកដល់យុទ្ធនាការប្រយុទ្ធនឹងជំងឺកូវីដ-១៩ប៉ុណ្ណោះទេ តែក៏ជាបុណ្យកុសលដ៏ថ្លៃថ្លាមួយផងដែរ។»

គួរបញ្ជាក់ផងដែរថា ក្រុមហ៊ុនកូកា-កូឡាកម្ពុជាកន្លងមក បានចូលរួមជាមួយរាជរដ្ឋាភិបាល អាជ្ញាធរមូលដ្ឋាន អង្គការក្រៅរាជរដ្ឋាភិបាល និងដៃគូពាក់ព័ន្ធនានា ក្នុងការផ្តល់ជំនួយបន្ទាន់ស្បៀង១០,០០០កញ្ចប់សម្រាប់ចែកជូនដល់កម្មករកម្មការិនីរោងចក្រ ដែលរស់នៅក្នុងតំបន់ក្រហមក្នុងរាជធានីភ្នំពេញ ដែលត្រូវបានបិទខ្ទប់អំឡុងដើមខែឧសភា ឆ្នាំ២០២១ និងបេសកកម្មក្នុងការចូលរួមទប់ស្កាត់ការរីករាលដាលជំងឺកូវីដ-១៩ និងយុទ្ធនាការចាក់វ៉ាក់សាំងការពារជំងឺកូវីដ-១៩ ដល់អាជ្ញាធរមូលដ្ឋានតាមបណ្តាខេត្ត

ក៏ដូចជាការចូលរួមអប់រំ ផ្សព្វផ្សាយនូវវិធានការ ៣កុំ ៣ការពារជាផ្ទាំងផ្សព្វផ្សាយមាននៅទីសាធារណៈនានារួចមកហើយ៕

អត្ថបទ៖ សំអឿន