ខេត្តសៀមរាប គ្រោងបើកសាលារៀន ឲ្យដំណើរការសាកល្បង នៅដើមសប្តាហ៍ទី៣ ខែតុលានេះ
Connect with us
Helistar Cambodia - Helicopter Charter Services

ព័ត៌មានជាតិ

ខេត្តសៀមរាប គ្រោងបើកសាលារៀន ឲ្យដំណើរការសាកល្បង នៅដើមសប្តាហ៍ទី៣ ខែតុលានេះ

បានផុស

នៅ

លោក ពៅ ពិសិដ្ឋ អភិបាលរងខេត្តសៀមរាប និងជាអនុប្រធានប្រចាំការ នៃគណៈកម្មការត្រួតពិនិត្យ និងវាយតម្លៃការបើកដំណើរការឡើងវិញ នូវគ្រឹះស្ថានសិក្សាសាធារណៈ និងឯកជន នៅព្រឹកថ្ងៃទី១៣ ខែតុលានេះ បានដឹកនាំ​កិច្ចប្រជុំពិភាក្សា អំពីគម្រោងនៃការបើកដំណើរការសាលារៀនឡើងវិញ។ កិច្ចប្រជុំ ដែលមានការចូលរួមផ្តល់មតិយោបល់ ពីសំណាក់មន្រ្តីតំណាងគណៈអភិបាលស្រុក និងមន្រ្តីការិយាល័យអប់រំ យុវជន និងកីឡាក្រុង-ស្រុកទាំង១២របស់ខេត្តសៀមរាប បានឯកភាពគ្នាជាគោលការណ៍ អំពីការបើកដំណើរការសាលារៀនសាកល្បង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលការណ៍នេះ ត្រូវបានដាក់ជាសំណើទៅកាន់អភិបាលខេត្តសៀមរាប និងជាប្រធានគណៈកម្មការត្រួតពិនិត្យ-វាយតម្លៃការបើកដំណើរការឡើងវិញ នូវគ្រឹះស្ថានសិក្សាសាធារណៈ និងឯកជន ដើម្បីសុំសេចក្តីសម្រេចជាផ្លូវការ។បើសិនជាកោលការណ៍នេះ មិនមានការយល់ជំទាស់ទេនោះ ខេត្តសៀមរាបនឹងត្រូវបើកឲ្យដំណើរការសាកល្បង សាលាកម្រិតមធ្យមសិក្សាចំនួន ៤៤សាលា នៅថ្ងៃទី១៨ ខែតុលា និងសាលាកម្រិតបឋមសិក្សាចំនួន ១២៩សាលា នៅថ្ងៃទី២០ ខែតុលា ឆ្នាំ២០២១ខាងមុខ។ សាលារៀនទាំងនេះ ស្ថិតនៅក្នុងចំណុះ នៃរដ្ឋបាលស្រុកទាំង ៨ ដែលបានដាក់ពាក្យស្នើសុំកន្លងមក។

លោក ពៅ ពិសិដ្ឋ អភិបាលរងខេត្តសៀមរាប មានប្រសាសន៍បន្តថា ដំណាក់កាលនៃការរៀនរស់ជាមួយកូវីដ-១៩ គឺជាដំណាក់កាលថ្មីមួយ ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ របស់សម្តេចតេជោ ហ៊ុន សែន បានជំរុញទាំងនៅថ្នាក់ជាតិ និងនៅថ្នាក់ក្រោមជាតិ ឲ្យប្រើប្រាស់នូវយន្តការដោយការទទួលខុសត្រូវ ធ្វើឲ្យដំណើរការឡើងវិញ លើវិស័យដែលមានផលប៉ះពាល់។ នៅក្នុងនេះវិស័យអប់រំ ដែលជាថ្នាលបណ្តុះបណ្តាលធនធានមនុស្សប្រកបដោយគុណភាព ដូចនេះការមិនដំណើរការសាលារៀន វាជាវិបត្តិសម្រាប់ការរីកចំរើនលូតលាស់ នៃសហគមន៍ និងសង្គមជាតិទាំងមូល នាថ្ងៃអនាគត។

លោកអភិបាលរងខេត្តរូបនេះ បានគូសបញ្ជាក់ថា ឈានមកដល់ពេលនេះ វាគឺជាដំណាក់កាលដែលមិនអាចរង់ចាំការស្ងប់ស្ងាត់ទាំងស្រុង នៃវិបត្តិកូវីដ-១៩នោះទេ តែការប្រុងប្រយ័ត្ន និងការចូលរួម គឺជាមូលដ្ឋាននៃការបោះជំហ៊ាន ឈានចេញពីស្ថានភាពដ៏អាក្រក់ ដែលបង្ករឡើងដោយជំងឺរាតត្បាតកូវីដ-១៩។

យ៉ាងណាក៏ដោយ កិច្ចប្រជុំនេះបានបង្ហាញថា ការបើកដំណើរការសាលារៀនសាកល្បងនៅខេត្តសៀមរាប គឺត្រូវបានត្រៀមរួចជាស្រេច នូវការអនុវត្តគោលការណ៍ប្រតិបត្តិស្តង់ដារ ដែលបានដាក់ចេញដោយក្រសួងអប់រំ យុវជន និងកីឡា ការអនុវត្តវិធានការ ៣ការពារ និង៣កុំ រួមទាំងការណែនាំរបស់ក្រសួងសុខាភិបាល ផងដែរ។ ទាំងបុគ្គលិកអប់រំ គ្រូបង្រៀន និងសិស្សានុសិស្ស ត្រូវតែធានាថា បានចាក់វ៉ាក់សាំងបង្ការជំងឺកូវីដ-១៩ រួចហើយ។ អាជ្ញាធរមូលដ្ឋាន ការិយាល័យអប់រំ គណៈកម្មការទ្រទ្រង់សាលា សមាគមមាតាបិតាសិស្ស រួមទាំងស្ថាប័នពាក់ព័ន្ធទាំងអស់ ត្រូវរួមគ្នាទទួលខុសត្រូវ ដែលជាពិសេសនោះ គឺការផ្តល់កិច្ចសហការគាំទ្រយ៉ាងពេញទំហឹង ពីមន្ទីរសុខាភិបាលខេត្ត៕

អត្ថបទ៖ គឿន​ វេត

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services