ព័ត៌មានជាតិ
សម្ដេចក្រឡាហោម ស ខេង ប្រាប់ឲ្យអភិបាលរាជធានី ខេត្ត ត្រៀមធនធានមនុស្សសម្រាប់តំណែងរដ្ឋបាលថ្នាក់ក្រោមជាតិ
មានប្រសាសន៍នៅក្នុងពិធីប្រកាសចូលកាន់មុខតំណែងអភិបាល នៃគណៈអភិបាលខេត្តពោធិ៍សាត់ នាព្រឹកថ្ងៃព្រហស្បតិ៍ ទី១៤ ខែតុលា ឆ្នាំ២០២១ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រាប់ឲ្យអភិបាលរាជធានី ខេត្ត ទាំងអស់ត្រៀមធនធានមនុស្ស ជាពិសេសយុវជន ដែលរៀបចប់ថ្នាក់បរិញ្ញាប័ត្រ សម្រាប់តំណែងរដ្ឋបាលថ្នាក់ក្រោមជាតិ ដែលមានដូចជាអភិបាលស្រុក អភិបាលរងស្រុក អភិបាលខេត្ត អភិបាលរងខេត្តជាដើម ដើម្បីអនុវត្តកំណែទម្រង់វិមជ្ឈការ និងវិសហមជ្ឈការ ឲ្យទទួលបានជោគជ័យ។
សម្ដេចក្រឡាហោម ស ខេង បានលើកឡើងថា កំណែទម្រង់វិមជ្ឈការ និងវិសហមជ្ឈការ បានធ្វើដំណើររយៈពេល១០ ឆ្នាំមកហើយ ហើយយើងត្រូវបន្តដំណើរកម្មវិធីជាតិនេះរយៈពេល១០ ឆ្នាំទៅទៀត គឺពីឆ្នាំ២០២១ ដល់២០៣០ ដែលពេលនោះ យើងនឹងប្រមូលផ្ដុំទាក់ទងទៅ នឹងការផ្ទេរអំណាច និងធនធាន ទាំងធនធានមនុស្ស និងធនធានថវិកា។ ក្នុងន័យនេះ សម្ដេចបានស្នើរដ្ឋបាលរាជធានី ខេត្ត រដ្ឋបាល ក្រុង ស្រុក ខណ្ឌ ឃុំ សង្កាត់ ចាំបាច់ត្រូវខិតខំប្រឹងប្រែងបន្ត ដើម្បីចូលរួមក្នុងការនយោបាយកំណែទម្រង់នេះឲ្យមានប្រសិទ្ធភាព និងទទួលបានលទ្ធផលល្អ។
ទាក់ទងទៅនឹងការកសាងធនធានមនុស្សនេះ សម្ដេចក្រឡាហោម ស ខេង បញ្ជាក់ថា វិមជ្ឈការ និងវិសហមជ្ឈការទាមទារឱ្យរៀបចំនូវធនធានមនុស្ស ដែលមានសមត្ថភាពគ្រប់គ្រាន់ និងមានបទពិសោធន៍ បើមិនដូច្នោះទេ នៅពេលមានការផ្ទេរអំណាច ផ្ទេរធនធាន ទៅរដ្ឋបាលថ្នាក់ក្រោមជាតិ ហើយអនុវត្តមិនបាន ធ្វើឲ្យគោលនយោបាយនេះបរាជ័យ ហើយការកំណែទម្រង់ទាំងមូលមានបញ្ហា និងប្រឈមឧបស័គ្គ។
បើតាមសម្ដេចក្រឡាហោម ស ខេង កាលពីមុនយើងពិបាករកមនុស្សឈរឈ្មោះណាស់ សម្រាប់ការបោះឆ្នោត ឃុំ សង្កាត់ ប៉ុន្តែមកដល់ពេលនេះមិនខ្វះទេ សម្រាប់អ្នកឈរឈ្មោះនៅថ្នាក់ឃុំ សង្កាត់ បើទោះបីជាការឈរឈ្មោះនេះ គឺជាបញ្ហាគណបក្សក៏ដោយ ក៏ជាបញ្ហាដែលរដ្ឋបាលជាតិទទួលខុសត្រូវដែរ។ សម្តេចបន្តថា ពេលនេះ យើងមិនពិបាករកមនុស្សដែលមានសញ្ញាបត្រទៅឈ្មោះនោះទេ ត្រឹមកម្រិតឌីប្លូម ឬបាក់ឌុប ។ យ៉ាងណាមិញ អភិបាល អភិបាលរង និងក្រុមប្រឹក្សាស្រុក ខណ្ឌ ខេត្ត ក៏ដូចគ្នា ត្រូវតែរៀបចំអ្នកដែលមានសមត្ថភាពមានលទ្ធភាព ក្នុងការចាត់ចែងការងារតាមការប្រគល់ភារកិច្ច។
សម្ដេចក្រឡាហោម ស ខេង ឲ្យដឹងដែរថា មានខេត្តមួយចំនួនបានគិតគូរពីចម្ងាយរួចហើយ និងបានបញ្ជូនមន្ត្រីជាយុវជន ដែលបានរៀនសូត្រចប់បរិញ្ញាបត្រចុះទៅធ្វើការនៅមូលដ្ឋាន នៅថ្នាក់ស្រុក នៅការិយាល័យថ្នាក់ស្រុកជាដើម ហើយមួយរយៈក្រោយមក គេបានស្រង់ឈ្មោះអ្នកទាំងនោះ ដើម្បីតែងតាំងជាអភិបាលរងស្រុក និងអភិបាលស្រុក រហូតអភិបាលរងខេត្ត និងអភិបាលខេត្តជាដើម។ សម្ដេចបន្តថា ការទទួលខុសត្រូវរបស់មន្ត្រីថ្នាក់ក្រោមជាតិ ព្រះរាជក្រឹត្យបានទម្លាក់ឱ្យរដ្ឋបាលខេត្តទទួលខុសត្រូវ ដូច្នេះយើងត្រូវគិតអំពីបញ្ហានេះពីចម្ងាយ ដើម្បីនៅពេលយើងត្រូវរកមនុស្សដាក់ក្នុងដំណែងនេះ ដំណើរនោះ នៅថ្នាក់ស្រុកក្តី នៅថ្នាក់ខេត្តក្តី ជួបបញ្ហាលំបាក ដោយសារតែយើងមិនបានគិតទុកជាមុន។
ជាមួយគ្នានោះសម្ដេចក្រឡាហោម ស ខេង បានស្នើឲ្យអភិបាលរាជធានីខេត្តពិនិត្យមើលលើបញ្ហានេះ ដោយសម្ដេចអះអាងថា វាជាបញ្ហាអនាគតរបស់ជាតិយើង ហើយក៏ជាការបើកឱកាសឲ្យក្មួយៗប្អូនៗនិស្សិត ដែលបានរៀនសូត្រ ចូលមកប្រឡូកនៅក្នុងកិច្ចការរដ្ឋបាលថ្នាក់ក្រោមជាតិ ទោះបីជាថ្នាក់ស្រុកក្តី ថ្នាក់រាជធានី ខេត្ត ក្តី។
សម្ដេចក្រឡាហោម ស ខេង បញ្ជាក់ដែរថា ប្រទេសរបស់យើងនៅមិនទាន់មានធនធានមនុស្សសម្បូរហូរហៀរដូចប្រទេសគេដែលគ្មានសង្គ្រាមនោះទេ គ្រាន់តែថា មកដល់ពេលនេះយើងមិនខ្វះទេ ប៉ុន្តែបើខ្វះ គឺខ្វះដោយសារតែយើងមិនបានយកចិត្តទុកដាក់៕
អត្ថបទ៖ កោះកែវ
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ម៉ោង ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៣ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៧ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៥ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)