សម្តេចតេជោ ហ៊ុន សែន៖ ពលរដ្ឋខ្មែរមិនឆ្លងឆ្នាំក្រៅប្រទេស អាចដេកសណ្ឋាគារក្នុងព្រៃ តម្លៃ ៣ ពាន់ដុល្លារ

មានប្រសាសន៍នៅក្នុងពិធីបើក ការដ្ឋានគម្រោងសាងសង់លើកកម្រិតគុណភាពផ្លូវជាតិលេខ ៤៨ ប្រវែងសរុប ​១៤៨ គីឡូម៉ែត្រ ពីអូរជ្រៅ ដល់ក្រុងខេមរភូមិន្ទ ខេត្តកោះកុង ក្រោមឥណទានសម្បទាន ពីរដ្ឋាភិបាលនៃសាធារណរដ្ឋកូរ៉េ នាថ្ងៃចន្ទ ទី ០៣ ខែមករា ឆ្នាំ ២០២២ នេះ សម្តេច​តេជោ ហ៊ុន សែន បានលើកឡើងថា បុណ្យឆ្លងឆ្លងឆ្នាំសកល​កន្លងទៅនេះ ពលរដ្ឋខ្មែរមិនឆ្លងឆ្នាំក្រៅប្រទេស អាចដេកសណ្ឋាគារក្នុងព្រៃ តម្លៃ ៣ ពាន់ដុល្លារ។

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា​ មានប្រសាសន៍ថា មានប្រសាសន៍ថា ប្រជា​ពលរដ្ឋខ្មែរ​នៅក្នុងឱកាសឆ្លងឆ្នាំនេះ មិនបានចេញទៅក្រៅប្រទេសទេ គឺដើរលេងនៅក្នុងប្រទេសរបស់ខ្លួន ហើយនៅតាមសណ្ឋាគារមួយចំនួន ដែលបង្កប់ខ្លួននៅតាមព្រៃធម្មជាតិ​ មានតម្លៃរហូតដល់ខ្ទង់ ៣ ពាន់ដុល្លារ​។

សម្ដេចតេជោបានបញ្ជាក់ថា តម្លៃបន្ទប់សណ្ឋាគារនេះថ្លៃជាងតម្លៃសណ្ឋាគារមួយចំនួននៅក្រៅប្រទេស​ ហើយបើផ្អែកតាមរបាយការណ៍បញ្ជាក់ថា ប្រជាពលរដ្ឋមានលទ្ធភាពដេកតាមសណ្ឋាគារ ដែលមានតម្លៃថ្លៃ ដែល​ពីមុនប្រជាពលរដ្ឋខ្មែរយើងយកលុយទៅដេកនៅសណ្ឋាគារបរទេស ប៉ុន្តែបច្ចុប្បន្នប្រជាពលរដ្ឋខ្មែរយកលុយដេកនៅក្នុងប្រទេសវិញ ដែលធ្វើឱ្យចរន្តសេដ្ឋកិច្ចរបស់យើងបានងើបឡើងវិញផងដែរ។

សម្ដេច​តេជោ ហ៊ុន សែន មានប្រសាសន៍ថា ​គ្រាន់តែរយៈពេល​៣​ថ្ងៃ ចំនួន​​ភ្ញៀវទេសចរណ៍​​ជាង ២ លាននាក់ ហើយគ្រាន់តែថ្ងៃឆ្លងឆ្នាំជាង ១ លាន ១ ​សែននាក់​។​ នៅ​ក្នុង​រយៈពេល៣ ថ្ងៃនេះ សៀមរាបបានក្លាយជាគោល​ដៅទី១ នៃដំណើរទៅទស្សនាកម្សាន្តរបស់ប្រជាពលរដ្ឋ ហើយលេខ២ គឺខេត្តព្រះសីហនុ៕

អត្ថបទ៖ កោះកែវ