លោក Ancelotti ជឿជាក់​លើ​កីឡាករ​ម្នាក់​នឹងអាចសាងស្នាដៃដូច CR7 នៅ Madrid

អ្នកចាត់ការទូទៅក្រុម Real Madrid លោក Carlo Ancelotti បានបង្ហាញការកោតសរសើរជាខ្លាំងលើ Kylian Mbappe ហើយលោកក៏មានគំនិតសុទិដ្ឋិនិយមលើរូបគេ ក្នុងការសាងស្នាដៃដូច Cristiano Ronaldo នៅទឹកដី Santiago Bernabeu ផងដែរ។

Mbappe ត្រូវបាន Real Madrid ចុះកុងត្រាមកកាន់ក្លិប កាលពីរដូវក្តៅកន្លងទៅ ដោយគ្មានតម្លៃខ្លួន បន្ទាប់ពីរូបគេផុតសុពលភាពកិច្ចសន្យាជាមួយក្រុម Paris Saint-Germain។ យ៉ាងណាមិញ សម្រាប់ការមកដល់រដូវកាលដំបូង ខ្សែប្រយុទ្ធសញ្ជាតិ បារាំង វ័យ ២៦ ឆ្នាំរូបនេះពិតជាបង្ហាញសមត្ថភាពលេចធ្លោរមែនទែន ដោយរូបគេបង្ហាញខ្លួនបានចំនួន ៤៥ ប្រកួត រកបាន ៣៣ គ្រាប់ និង ៥ បញ្ជូន(assist) ខណៈចំនួនគ្រាប់បាល់នេះ ក៏បានតាមស្មើកំណត់ត្រារបស់ Ronaldo នៅក្នុងរដូវកាលដំបូងជាមួយក្រុមអធិរាជសផងដែរ។

ជុំវិញការបង្ហាញសមត្ថភាពដ៏ល្អបែបនេះ លោក Acelotti បានយក Mbappe ទៅប្រៀបធៀបជាមួយខ្សែប្រយុទ្ធម្ចាស់ពាន Ballon d’Or ៥ សម័យយ៉ាងដូច្នេះថា៖ «អ្វីដែលខ្ញុំសង្ឃឹមចំពោះ Mbappe គឺគេអាចសាងស្នាដៃបានដូចអ្វី ដែល Cristiano Ronaldo ធ្លាប់ធ្វើនៅ Real Madrid។ ខ្ញុំគិតថា គាត់អាចធ្វើបាន។ ប្រសិនបើគាត់ធ្វើបានបែបនោះមែន គាត់នឹងក្លាយជាវីរបុរសនៅ Real Madrid ដូច Cristiano Ronaldo ដែរ»៕

ប្រែសម្រួលអត្ថបទ៖ សេម កុសល
ប្រភព៖ ESPN