នគរបាលស្រុកបាទី បង្ក្រាបក្រុមគ្រឿង​ញៀន​១៥​នាក់ ដកហូតអាវុធខ្លី២ដើម និងសម្ភារៈមួយចំនួន

កម្លាំងជំនាញនគរបាលយុត្តិធម៌ នៃអធិការដ្ឋាននគរបាលស្រុកបាទី បានស្រាវជ្រាវបង្ក្រាបក្រុមជនសង្ស័យគ្រឿងញៀនជាបន្តបន្ទាប់សរុប១៥នាក់ ដកហូតអាវុធខ្លីចំនួនពីរដើម រួមទាំងថ្នាំញៀន និងសម្ភារៈប្រើប្រាស់គ្រឿងញៀនមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការបង្ក្រាបនេះបានធ្វើឡើងកាលពីថ្ងៃទី២៩ ខែមីនា ឆ្នាំ២០២៥ នៅចំណុចភូមិពូនភ្នំ ឃុំលំពង់ ស្រុកបាទី ក្រោមការសម្របសម្រួលនីតិវិធីពីលោក ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ។

តាមរបាយការណ៍របស់អធិការដ្ឋាននគរបាលស្រុកបាទី បានឲ្យដឹងនៅព្រឹកថ្ងៃទី១មេសានេះថា ការបង្ក្រាបក្រុមជនសង្ស័យទាំងនេះ ធ្វើឡើងនៅពេលកម្លាំងចុះល្បាតក្នុងភូមិសាស្ត្រ ដើម្បីការពារសុខសុវត្ថិភាពជូនប្រជាពលរដ្ឋក្នុងមូលដ្ឋាន ហើយក៏ប្រទះឃើញជនសង្ស័យចំនួនពីរនាក់ដែលមានការសង្ស័យទើបឃាត់សួរនាំ តែជនសង្ស័យមិនព្រមសហការ និងព្យាយាមរត់គេចខ្លួន ប៉ុន្តែត្រូវបានកម្លាំងសមត្ថកិច្ចចាប់បានម្នាក់។ តាមរបាយការណ៍ ជនសង្ស័យដែលត្រូវឃាត់ខ្លួនបានភ្លាមៗមានឈ្មោះ ហៃ ម៉េងហ័ង និងបានឆែកឆេរត្រួតពិនិត្យរកឃើញវត្ថុតាងមានដូចជា កាំភ្លើងខ្លី ម៉ាកឡុក១៧ជែន៥ ពណ៌ខ្មៅ លេខAHCH៦២០ ចំនួន១ដើម និងម្សៅក្រាមពណ៌សថ្លា សង្ស័យសារធាតុខុសច្បាប់ចំនួន ៣កញ្ចប់តូច រីឯជនសង្ស័យឈ្មោះ ម៉ី ម៉ន បានរត់គេចខ្លួនបាត់ស្រមោល។

នៅថ្ងៃខែឆ្នាំដដែល កម្លាំងជំនាញនគរបាលយុត្តិធម៌ នៃអធិការដ្ឋាននគរបាលស្រុកបាទី បានបន្តឃាត់ជនសង្ស័យដែលជាប់ពាក់ព័ន្ធបានជាបន្តបន្ទាប់ចំនួន ១៤នាក់បន្ថែមទៀតដែលសុទ្ធសឹងតែជាមុខសញ្ញាប្រើប្រាស់ និងចែកចាយគ្រឿង​ញៀនយ៉ាងសកម្មក្នុងភូមិសាស្ត្រស្រុកបាទី។

ក្នុងប្រតិបត្តិការបង្ក្រាប កម្លាំងជំនាញបានដកហូតអាវុធខ្លីសរុបចំនួន២ដើម(មានក្នុងរូប) និងវត្ថុតាងម្សៅក្រាមពណ៌សថ្លាសង្ស័យសារធាតុញៀនខុសច្បាប់មួយចំនួនធំទៀត យកមកអធិការដ្ឋាននគរបាលស្រុកបាទី ដើម្បីធ្វើការសាកសួរ និងកសាងសំណុំរឿងតាមនីតិវិធី។ បច្ចុប្បន្នជនសង្ស័យខាងលើ ត្រូវបានកម្លាំងជំនាញកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់៕

អត្ថបទ៖ សុខុម